பள்ளி, கல்லூரிகள் நாளை திறப்பு - வகுப்பறைகளை சுத்தம் செய்யும் பணி தீவிரம் : சுழற்சி முறையில் பாடங்களை நடத்த ஏற்பாடு

திருவண்ணாமலை மாவட்டத்தில் நாளை (செப்டம்பர் 1-ம் தேதி) பள்ளி மற்றும் கல்லூரிகள் திறக்கப்பட உள்ளதால் வகுப்பறைகளை கிருமி நாசினி கொண்டு சுத்தம் செய்யும் பணி முழுவீச்சில் நடைபெற்று வருகிறது.

தி.மலை மாவட்டத்தில் கரோனா பரவல் அதிகரித்ததால் மூடப்பட்டிருந்த பள்ளி மற்றும் கல்லூரிகள் நாளை (செப்டம்பர் 1-ம் தேதி) திறக்கப்பட உள்ளன. 9-ம் வகுப்பு முதல் பிளஸ் 2 வகுப்பு வரை சுழற்சி முறையில் மாணவர்களுக்கு வகுப்பு நடத்த உத்தரவிடப்பட்டுள்ளது. இதேபோல், கல்லூரிகளிலும் சுழற்சி முறையில் வகுப்புகளை நடத்தவும், பள்ளி மற்றும் கல்லூரிகளில் மேற்கொள்ள வேண்டிய வழிகாட்டி நெறிமுறைகளை தமிழக அரசு வெளியிட்டுள்ளது.

இதையடுத்து, திருவண்ணாமலை மாவட்டத்தில் உள்ள 1,600 அரசு மற்றும் தனியார் பள்ளிகளை சுத்தம் செய்யும் பணி முழுவீச்சில் நடைபெற்று வருகிறது. பள்ளி வளாகங்கள் மற்றும் வகுப்பறைகளை கிருமி நாசினி கொண்டு சுத்தம் செய்யப்படுகிறது. இதேபோல், அரசு மற்றும் தனியார் கல்லூரிகளிலும் சுத்தம் செய்யும் பணி இறுதி கட்டத்தை எட்டியுள்ளது. கல்வி நிறுவனங்களில் உள்ள தண்ணீர் தொட்டி, கழிப்பறைகள் தூய்மைப் படுத்தப்பட்டுள்ளன.

. திருவண்ணாமலை மாவட்டத்தில் 9-ம் வகுப்பு முதல் பிளஸ் 2 வகுப்பு வரை 1 லட்சத்து 27 ஆயிரத்து 741 மாணவ, மாணவிகள் படிக்கின்றனர். ஒரு நாளைக்கு 50 சதவீத மாணவர்களை மட்டுமே அனுமதிக்க வேண்டும் என்பதால், 2 குழுக்களாக பிரித்து பாடத்திட்ட அட்டவணை தயாரிக்கப்பட்டுள்ளது.

இதேபோல், கல்லூரிகளிலும் சுழற்சி முறையில் பாடங்களை நடத்துவதற்கான ஏற்பாடுகள் நடைபெற்று வரு கிறது. பள்ளி மற்றும் கல்லூரிகளில் கரோனா தடுப்பூசியை செலுத்திக் கொண்ட ஆசிரியர்களை மட்டுமே அனுமதிக்க ஆட்சியர் பா.முருகேஷ் உத்தரவிட்டுள்ளார். 85 சதவீதத் துக்கும் அதிகமான ஆசிரியர்கள் தடுப்பூசி செலுத்திக் கொண்டதாக கூறப்படுகிறது.

அதேபோல், கல்லூரி மாணவ, மாணவிகளும் தடுப்பூசியை செலுத்திக் கொண்டிருக்க வேண்டும். முகக்கவசம் அணிதல் மற்றும் கல்வி நிறுவன வளாகத் துக்குள் நுழையும்போது கிருமி நாசினியை கொண்டு கைகளை சுத்தம் செய்தல், வெப்ப பரிசோதனை செய்தல் ஆகியவை கட்டாயம் என தெரிவிக்கப்பட்டுள்ளது.

வேலூர் மாவட்டம்

வேலூர் மாவட்டத்தில் கல்லூரி மாணவர்களின் வசதிக்காக கரோனா தடுப்பூசி சிறப்பு முகாம்கள் 3 நாட்கள் நடத்த ஏற்பாடுகள் செய்யப்பட்டுள்ளன. கலை மற்றும் அறிவியல் கல்லூரி இரண்டாம் ஆண்டு மாணவர்களுக்கு திங்கள், புதன், வெள்ளிக்கிழமைகளிலும், 3-ம் ஆண்டு மாணவர்களுக்கு செவ்வாய், வியாழன் மற்றும் சனிக்கிழமைகளில் வகுப்புகள் நடைபெற உள்ளன. அதேபோல், முதுநிலை இரண்டாம் ஆண்டு மாணவர்கள் மற்றும் பொறியியல் இறுதியாண்டு மாணவர்களுக்கு வாரத்தில் 6 நாட்கள் வகுப்புகள் நடைபெற உள்ளன.

முதலாம் ஆண்டு மாணவர்கள்

முதலாம் ஆண்டு மாணவர் சேர்க்கை முடிந்ததும் அறிமுக கூட்ட வகுப்பு மட்டும் அனுமதி அளிக்கப்பட்டுள்ளது. அதுவும் ஒரு சில நாட்கள் மட்டுமே இந்த வகுப்பை நடத்த வேண்டும். அதிகபட்சம் ஒரு வாரத்துக்கு மேல் நடத்தக்கூடாது. அதன் பிறகு ஆன்லைன் வகுப்புகளில் மட்டும் பாடங்களை நடத்த வேண்டும் என அறிவுறுத்தப்பட்டுள்ளது.