திருவிழாக்கள் நடத்த தளர்வுகள் அளிக்க வேண்டும் : கிராமிய கலைஞர்கள், பந்தல் தொழிலாளர்கள் கோரிக்கை

திருவிழாக்கள், நிகழ்ச்சிகள் நடத்த தளர்வுகள் அளிக்க வேண்டும் என்று, கிராமியக் கலைஞர்கள், பந்தல் தொழிலாளர்கள் கோரிக்கை விடுத்துள்ளனர்.

கரோனா பரவல் மீண்டும் அதிகரித்துள்ளதால் தமிழக அரசு பல்வேறு கட்டுப்பாடுகளை விதித்துள்ளது. தென்காசி மாவட்ட ஆட்சியர் அலுவலகத்துக்கு 200-க்கும் மேற்பட்ட கிராமியக் கலைஞர்கள், 20-க்கும் மேற்பட்ட பந்தல் அமைப்பாளர்கள் திரண்டு வந்து, மனு அளித்தனர்.

கிராமிய நாட்டுப்புற கலைஞர்கள் அளித்துள்ள மனுவில், “தென்காசி மாவட்டத்தில் கிராமியநாட்டுப்புற கலைஞர்கள் பெருமளவில் வசித்து வருகிறோம். கோயில்திருவிழாக்களில் இரவு 10 மணிக்குமேல் தான் கலை நிகழ்ச்சிகள் ஆரம்பிக்கப்படுவது வழக்கம். இந்நிலையில், கரோனா பரவல் காரணமாக தமிழக அரசு கட்டுப்பாடுகளை விதித்துள்ளதால் கிராமிய நாட்டுப்புற கலை நிகழ்ச்சிகள் முற்றிலும் தடைபட்டுவிட்டது.

கடந்த ஆண்டு இதேபோல் ஊரடங்கு உத்தரவால் கலைநிகழ்ச்சிகள் நடத்த முடியாமல் போனதால் கிராமிய நாட்டுப்புறக் கலைஞர்கள் வாழ்வாதாரம் பாதிக்கப்பட்டது. தற்போது மீண்டும்கட்டுப்பாடுகள் விதிக்கப்பட்டுள்ளதால் மேலும் பாதிக்கப்பட்டுள்ளோம்.

எனவே, எங்கள் வாழ்வாதாரம் பாதுகாக்கப்படும் வகையில் கோயில் திருவிழாக்களில் இரவு 1 மணி வரையாவது நிகழ்ச்சிகள் நடத்த அனுமதிக்க வேண்டும். முகக்கவசம், தனிமனித இடைவெளியை கடைபிடித்து நிகழ்ச்சிகள் நடத்த அனுமதிக்க வேண்டும்” என்று கூறியுள்ளனர்.

வாழ்வாதாரம் பாதிப்பு

இதேபோல், பந்தல் அமைப்பாளர்கள் சார்பில் அளித்துள்ள மனுவில், “ தமிழகம் முழுவதும் திருவிழா மற்றும் நிகழ்ச்சிகளுக்கு பந்தல் அமைக்கும் தொழிலில் சுமார் 5 லட்சம் பேர் ஈடுபட்டுள்ளனர். கடந்த ஆண்டு அமல்படுத்தப்பட்ட ஊரடங்கு உத்தரவால் தொழிலாளர்களின் வாழ்வாதாரம் முற்றிலும் பாதிக்கப்பட்டது. கடந்த ஓரிருமாதங்களாக தொழில் மீண்டும்இயல்பு நிலைக்கு வந்தது. இந்நிலையில், திருவிழாக்கள் ,திருமணம் உள்ளிட்ட நிகழ்ச்சிகளுக்கு மீண்டும் கட்டுப்பாடுகள் விதிக்கப்பட்டுள்ளதால் தொழிலாளர்களின் வாழ்வாதாரம் கேள்விக்குறியாகி உள்ளது.

கட்டுப்பாடுகளுடன் நிகழ்ச்சிகளை நடத்திக்கொள்ளவும், திருமண மண்டபங்கள், அரங்குகளில் 50 சதவீதம் பேர் பங்கேற்கும் வகையில் அனுமதி அளிக்கவும் நடவடிக்கை எடுக்க வேண்டும். அனைத்து பொது நிகழ்ச்சிகளிலும் தனிமனித இடைவெளி, முகக்கவசம் அணிவது, உடல் வெப்பநிலை பரிசோதனை செய்வது, கிருமி நாசினி பயன்படுத்துவது போன்ற விதிமுறைகளை கடைபிடித்து மற்ற கட்டுப்பாடுகளை தளர்த்த நடவடிக்கை எடுக்க வேண்டும்” என்று கூறியுள்ளனர்.

நாகர்கோவில்

கன்னியாகுமரி மாவட்ட கிராமிய இசைக் கலைஞர்கள் பொதுநலச் சங்க தலைவர் பழனியாபிள்ளை தலைமையில் கிராமிய கலைஞர்கள் திரண்டு நாகர்கோவிலில் மாவட்ட ஆட்சியர் மா.அரவிந்திடம் மனு அளித்தனர்.

இசைக்கருவிகளை இசைத்து போராட்டம்

திருநெல்வேலியில் தென்மண்டல அனைத்து கலை சங்கங்களின் கூட்டமைப்பு சார்பில் கிராமிய கலைஞர்கள் ஆட்சியர் விஷ்ணுவிடம் மனுஅளித்தனர். முன்னதாக ஆட்சியர் அலுவலக வளாகத்தில் நாதஸ்வர கலைஞர்கள், மேளக்கலைஞர்கள், கணியான் கூத்து கலைஞர்கள், கரகாட்ட கலைஞர்கள் மேளதாள வாத்தியங்களை முழங்கினர். கரகாட்ட கலைஞர்கள் கரகாட்டம் ஆடி கோரிக்கைகளை வலியுறுத்தினர்.

கிராமப்புறங்களில் உள்ள திருக்கோயில்களில் கரோனா கட்டுப்பாடுகளுடன் இரவு 12 மணிவரை கலைநிகழ்ச்சி நடத்துவதற்கு அனுமதி வழங்க வேண்டும். தடை உத்தரவு நடைமுறையில் உள்ள வரை அனைத்து கலைஞர்களுக்கும் ரேஷன் பொருள் இலவசமாக வழங்க வேண்டும். கலை நிகழ்ச்சி நடத்த வெளியூர் செல்லும் அனைவருக்கும் ரயில், பேருந்துகளில் இலவச பயணம் செய்வதற்கு அனுமதி வழங்க வேண்டும், கரோனோ பேரிடர் காலத்தை எதிர்கொள்ள மாதம் பத்தாயிரம் ரூபாய் நிதி வழங்க வேண்டும் என வலியுறுத்தினர்.

தூத்துக்குடி

தூத்துக்குடியில் நாட்டுப்புற கலைஞர்கள் நேற்று மேள, தாளம், தாரை, தப்பட்டை முழங்கி, கலைநிகழ்ச்சிகளை நடத்தி ஆட்சியர் அலுவலகம் முன்பு ஆர்ப்பாட்டம் நடத்தினர். சமூக ஆர்வலர் தொண்டன் சுப்பிரமணியன் தலைமை வகித்தார். தமிழ் பண்பாடு மேம்பாட்டு மையம் இயக்குநர் செ.ஜெகஜீவன் முன்னிலை வகித்தார். பின்னர் நாட்டுப்புறக் கலைஞர்கள் ஊர்வலமாகச் சென்று மாவட்ட ஆட்சியர் அலுவலகத்தில் கோரிக்கை மனு அளித்தனர். இதேபோல் தூத்துக்குடி மாவட்ட அனைத்து கிராமிய கலைஞர்கள் மற்றும் கலை தொழிலாளர்கள் நல்வாழ்வு சங்கம், தமிழக நாட்டுப்புற இசைக்கலை பெருமன்றம் உள்ளிட்ட பல்வேறு அமைப்புகளைச் சேர்ந்த நாட்டுப்புறக் கலைஞர்கள் திரண்டு வந்து தனித்தனியாக ஆட்சியர் அலுவலகத்தில் மனு அளித்தனர்.