புதுச்சேரி, தெலங்கானா ஆகிய மாநிலங்களில் உள்ளதுபோல, தமிழகத்திலும் மாதாந்திர உதவித்தொகையாக மாற்றுத்திறனாளிகளுக்கு ரூ.3,000, கடும் பாதிப்புள்ள மாற்றுத்திறனாளிகளுக்கு ரூ.5,000 என உயர்த்தி வழங்க வேண்டும் என்பது உள்ளிட்ட கோரிக்கைகளை வலியுறுத்தி, தமிழ்நாடு அனைத்து வகை மாற்றுத்திறனாளிகள் மற்றும் பாதுகாப்போர் உரிமைகளுக்கான சங்கத்தினர் நேற்று 2-வது நாளாக தமிழகம் முழுவதும் போராட்டத்தில் ஈடுபட்டனர்.
திருச்சி மத்திய பேருந்து நிலையம் பெரியார் சிலை அருகே சங்கத்தின் மாவட்டத் தலைவர் ஜெ.ஜெயபால் தலைமையில் மாவட்டச் செயலாளர் எம்.கோபிநாத், மாநில துணைச் செயலாளர் சி.புஷ்பநாதன் உள்ளிட்டோர் 2-வது நாளாக நேற்று மறியலில் ஈடுபட்டனர். இதில் பங்கேற்ற 17 பெண்கள் உட்பட 41 பேரை போலீஸார் கைது செய்தனர்.
அரியலூர் அண்ணா சிலை அருகே சங்கத்தின் மாவட்டத் தலைவர் சுப்பிரமணியன் தலைமையில், சிஐடியு மாவட்டச் செயலாளர் பி.துரைசாமி முன்னிலையில் 2-வது நாளாக ஆர்ப்பாட்டத்தில் ஈடுபட்ட 6 பெண்கள் உட்பட 18 பேரை போலீஸார் கைது செய்தனர்.
கரூர் மாவட்டத்தில் அரவக்குறிச்சி, கிருஷ்ணராயபுரம் வட்டாட்சியர் அலுவலகங்களில் நேற்று முன்தினம் குடியேறும் போராட்டம் தொடங்கிய நிலையில், கிருஷ்ணராயபுரத்தில் அன்று இரவு போராட்டம் கைவிடப்பட்டது. அரவக்குறிச்சியில் 2-வது நாளாக தொடர்ந்த போராட்டம் நேற்று மாலை கைவிடப்பட்டது.
முக்கிய செய்திகள்
இன்றைய செய்தி
2 years ago