தி.மலையில் ரூ.3 லட்சம் துணிகர திருட்டு காவல் துறையினர் விசாரணை

தி.மலையில் இரு சக்கர வாகன பெட்டியை உடைத்து, ரூ.3 லட்சத்தை திருடிச் சென்ற மர்ம நபர்களை காவல் துறையினர் தேடி வருகின்றனர்.

திருவண்ணாமலை அடுத்த வேங்கிக்கால் ஓம்சக்தி வீதியில் வசிப்பவர் ரமேஷ். இவர், திருவண்ணாமலையில் உள்ள ஒரு வங்கியில் இருந்து ரூ.3 லட்சத்தை நேற்று முன்தினம் எடுத்துள்ளார்.

பின்னர், அந்த பணத்தை, இரு சக்கர வாகன பெட்டியில் வைத்துக் கொண்டு வீட்டுக்கு புறப்பட்டுள்ளார். வீட்டுக்கு செல்லும் வழியில் பெரியார் சிலை அருகே உள்ள கடையில் ஜெராக்ஸ் எடுத்துக்கொண்டு திரும்பினார். அப்போது, வாகனத்தின் பெட்டி உடைக்கப்பட்டிருந்தது. அதிலிருந்த ரூ.3 லட்சத்தையும் காணவில்லை. இதுகுறித்து ரமேஷ் கொடுத்த புகாரின் பேரில் திருவண்ணாமலை கிழக்கு காவல் துறையினர் வழக்குப் பதிவு செய்து விசாரணை நடத்தினர்.

இதற்கிடையில், பெரியார் சிலை அருகே உள்ள சிசிடிவி கேமராவை காவல்துறையினர் ஆய்வு செய்தபோது, ரமேஷை பின்தொடர்ந்து இரு சக்கர வாகனத்தில் வந்த 2 இளைஞர்கள், பெட்டியை உடைத்து பணத்தை திருடிச் செல்வது தெரியவந்துள்ளது. அதன் அடிப்படையில் மர்ம நபர்களை காவல் துறையினர் தேடி வருகின்றனர்.