முன்னாள் முதல்வர் எம்ஜிஆரின் நினைவு நாளையொட்டி, திருச்சி மத்திய மண்டலத்தில் உள்ள அவரது சிலைகளுக்கு அதிமுக, தேமுதிக, அமமுக உட்பட பல்வேறு கட்சியினர் நேற்று மாலை அணிவித்து மரியாதை செலுத்தினர்.
திருச்சி மாநகரில் ஒருங்கிணைந்த நீதிமன்ற வளாகம் அருகேயுள்ள எம்ஜிஆரின் சிலைக்கு அதிமுக மாநகர் மாவட்ட அவைத் தலைவர் அய்யப்பன், அமமுக அவைத் தலைவர் சாத்தனூர் ராமலிங்கம், தேமுதிக மாநகர் மாவட்டச் செயலாளர் டி.வி.கணேஷ், புதிய நீதிக் கட்சி மாநகர் மாவட்டச் செயலாளர் டைமன்ட் பாலு ஆகியோர் தலைமையில், அந்தந்தக் கட்சியினர் மாலை அணிவித்து, மரியாதை செலுத்தினர்.
லால்குடியில் அதிமுக புறநகர் தெற்கு மாவட்டச் செயலாளர் ப.குமார், மணப்பாறையில் எம்எல்ஏ ஆர்.சந்திரசேகர் ஆகியோர் தலைமையில் எம்ஜிஆர் சிலைக்கு மாலை அணிவிக்கப்பட்டது. சோமரசம்பேட்டையில் அதிமுக புறநகர் வடக்கு மாவட்டச் செயலாளர் மு.பரஞ்ஜோதி தலைமையில், முன்னாள் அமைச்சர்கள் கு.ப.கிருஷ்ணன், கே.கே.பாலசுப்பிரமணியன் உள்ளிட்ட அதிமுகவினர் எம்ஜிஆர் சிலைக்கு மாலை அணிவித்தனர்.
இதேபோல, மாவட்டம் முழுவதும் பல்வேறு இடங்களில் உள்ள எம்ஜிஆர் சிலைகளுக்கு அதிமுக, அமமுக உட்பட பல்வேறு அரசியல் கட்சியினர் மாலை அணிவித்து மரியாதை செலுத்தினர். பொதுமக்களுக்கு நலத்திட்ட உதவிகள் வழங்கப்பட்டன.
அரியலூரில் உள்ள எம்ஜிஆர் சிலைகளுக்கு அதிமுக சார்பில் ஜெயங்கொண்டம் எம்எல்ஏ ஜெ.கே.என்.ராமஜெயலிங்கம், நகரச் செயலாளர் செந்தில், தாமரைக்குளம் ஊராட்சித் தலைவர் பிரேம்குமார் உள்ளிட்டோர் மாலை அணிவித்தனர்.
பெரம்பலூர் புதிய பேருந்து நிலையம் அருகேயுள்ள எம்ஜிஆரின் சிலைக்கு அதிமுகவினர் மாவட்டச் செயலாளர் ஆர்.டி.ராமச்சந்திரன் தலைமையிலும், அமமுகவினர் மாவட்டச் செயலாளர் கார்த்திகேயன் தலைமையிலும் மாலை அணிவித்து, மரியாதை செலுத்தினர்.
கரூர் மாவட்ட அதிமுக அவைத் தலைவர் ஏ.ஆர்.காளியப்பன் தலைமையில் எம்எல்ஏ ம.கீதா உள்ளிட்டோர், கரூர் வெங்கமேடு மற்றும் கோயம்பள்ளியில் உள்ள எம்ஜிஆர் சிலைகளுக்கு மாலை அணிவித்தனர். பின்னர், அன்னதானம் வழங்கப்பட்டது.
இதேபோல, கரூர் நகரில் 41 இடங்கள் உட்பட மாவட்டம் முழுவதும் பல இடங்களில் எம்ஜிஆரின் படங்களுக்கு அதிமுகவினர் மலர் தூவி மரியாதை செலுத்தினர்.
கரூர் பேருந்து நிலைய ரவுண்டானா அருகே எம்ஜிஆர் படத்துக்கு அமமுக மாவட்டச் செயலாளர் பி.எஸ்.என்.தங்கவேல் மாலை அணிவித்தார். கரூர் மாவட்ட தேமுதிக அலுவலகத்தில் எம்ஜிஆர், பெரியார் படங்களுக்கு மாவட்டச் செயலாளர் கே.வி.தங்கவேல் தலைமையில் மலர் தூவி, மரியாதை செலுத்தப்பட்டது.
புதுக்கோட்டை பழைய பேருந்து நிலையம் அருகேயுள்ள எம்ஜிஆர் சிலைக்கு அதிமுக எம்ஜிஆர் மன்ற மாவட்டச் செயலாளர் செல்லதுரை தலைமையில் அக்கட்சியினர் மாலை அணிவித்தனர். இதேபோல அமமுக, தேமுதிக, மக்கள் நீதி மய்யம் போன்ற கட்சியினரும் மாலை அணிவித்தனர்.
தஞ்சாவூர் ரயிலடியிலுள்ள எம்ஜிஆரின் சிலைக்கு, அதிமுக சார்பில் முன்னாள் எம்.பி கு.பரசுராமன், கும்பகோணத்தில் உள்ள எம்ஜிஆரின் சிலைக்கு அதிமுக ஒன்றியச் செயலாளர் சோழபுரம் க.அறிவழகன் உள்ளிட்டோர் மாலை அணிவித்தனர்.
மயிலாடுதுறை மாவட்டம் கொள்ளிடம் சோதனைச் சாவடி அருகேயுள்ள எம்ஜிஆரின் சிலைக்கு அதிமுக மாவட்டச் செயலாளர் செந்தில்நாதன் தலைமையில், சீர்காழி எம்எல்ஏ பாரதி உள்ளிட்டோர் மாலை அணிவித்தனர். நாகை புதிய பேருந்து நிலையத்தில் எம்ஜிஆரின் படத்துக்கு, மாவட்ட அவைத் தலைவரும், முன்னாள் அமைச்சருமான ஜீவானந்தம் தலைமையில் மலர் தூவி மரியாதை செலுத்தப்பட்டது.
திருவாரூரில் அதிமுக நகரச் செயலாளர் ஆர்.டி.மூர்த்தி, மன்னார்குடியில் முன்னாள் நகர்மன்றத் தலைவர் சிவா.ராஜமாணிக்கம், திருத்துறைப்பூண்டியில் நகரச் செயலாளர் சண்முகசுந்தரம், ஒன்றியச் செயலாளர் சிங்காரவேலு ஆகியோர் தலைமையில் அதிமுகவினர் எம்ஜிஆர் சிலைகளுக்கு மாலை அணிவித்தனர்.
திருத்துறைப்பூண்டியில் அமமுக சார்பில் ஆனந்தராஜ் தலைமையில் அக்கட்சியின் மாநில வழக்கறிஞர் பிரிவு தலைவர் கு.சீனிவாசன் உள்ளிட்டோர் எம்ஜிஆர் சிலைக்கு மாலை அணிவித்தனர்.
காரைக்கால் மாவட்டம் கிளிஞ்சல்மேடு மீனவக் கிராமத்தில் உள்ள எம்ஜிஆரின் சிலைக்கு, அதிமுக மாவட்டச் செயலாளரும், முன்னாள் எம்எல்ஏவுமான எம்.வி.ஓமலிங்கம் தலைமையில் காரைக்கால் தெற்குத் தொகுதி எம்எல்ஏ கே.ஏ.யு.அசனா உள்ளிட்ட அதிமுகவினர் மாலை அணிவித்து மரியாதை செலுத்தினர்.
முக்கிய செய்திகள்
இன்றைய செய்தி
2 years ago