ஊர்க்காவல்படையில் சேர நாமக்கல் எஸ்.பி. அழைப்பு

நாமக்கல் மாவட்ட ஊர்க்காவல்படையில் சேர விண்ணப்பிக்கலாம் என மாவட்ட எஸ்பி அழைப்பு விடுத்துள்ளார்.

இதுதொடர்பாக நாமக்கல் மாவட்ட எஸ்பி சக்திகணேசன் வெளியிட்டுள்ள செய்திக்குறிப்பில் கூறியிருப்பதாவது:

நாமக்கல் மாவட்ட ஊர்க்காவல் படையில் நாமக்கல், ராசிபுரம், வேலூர் பகுதிகள் சேர்த்து 13 ஆண்கள், 1 பெண் மற்றும் திருச்செங்கோடு பகுதிக்கு 10 ஆண்கள் என மொத்தம் 24 பணியிடங்கள் நிரப்பப்படவுள்ளன. விண்ணப்பதாரர்கள் 10-ம் வகுப்பு தேர்ச்சி பெற்று இருக்க வேண்டும். 18 முதல் 45 வயதுக்குள் இருக்க வேண்டும். எவ்வித குற்ற பின்னணி இருக்கக் கூடாது.

ஊர்காவலர் பணிக்கான விண்ணப்பங்கள், நாமக்கல் காவல் நிலைய வளாகத்தில் உள்ள ஊர்க்காவல் படை அலுவலகத்தில் வழங்கப்படுகிறது. பூர்த்தி செய்த விண்ணப்பங்களை நேரிலோ, தபால் மூலமாகவோ, ஊர்க்காவல்படை அலுவலகத்தில் வரும் 16-ம் தேதிக்குள் ஒப்படைக்க வேண்டும், எனத் தெரிவித்துள்ளார்.