புலியகுளம் அரசு மகளிர் கல்லூரியில் இணையவழி வகுப்புகள் தொடக்கம்

கோவை: கோவை புலியகுளம் - லட்சுமி மில்ஸ் சாலையில் தொடங்கப்பட்டுள்ள அரசு மகளிர் கலை அறிவியல் கல்லூரியில் பி.ஏ. தமிழ், ஆங்கிலம், பி.எஸ்சி கணிதம், கணினி அறிவியல், பி.காம் ஆகிய 5 பாடப்பிரிவுகள் உள்ளன. இப்படிப்புகளுக்கு கடந்த 9-ம் தேதி தொடங்கிய மாணவியர் சேர்க்கை, இன்றுடன் (அக். 31) நிறைவு பெறுகிறது. இதுவரை சேராத மாணவிகள் இறுதிக்கட்ட சேர்க்கையில் அசல் சான்றிதழ்களுடன் வந்து சேர்ந்து கொள்ளுமாறு அழைப்பு விடுக்கப்பட்டுள்ளது. இதற்கிடையில் முதலாம் ஆண்டில் சேர்ந்த மாணவிகளுக்கு இணையவழி வகுப்புகள் தொடங்கப்பட்டுள்ளன.

இது குறித்து கோவை மண்டல கல்லூரி இணை இயக்குநர் கலைச்செல்வி, அரசு மகளிர் கலை அறிவியல் கல்லூரி பொறுப்பாளர் மாரிமுத்து ஆகியோர் கூறும்போது, “பி.காம் படிப்பில் 60, கணினி அறிவியல் படிப்பில் 27, தமிழ் படிப்பில் 24, ஆங்கிலப் படிப்பில் 12, கணிதப் படிப்பில் 6 பேர் என 129 பேர் முதலாமாண்டில் சேர்ந்துள்ளனர். முதலாமாண்டு மாணவிகளுக்கு இணையவழி வகுப்புகள் தொடங்கப்பட்டுள்ளன. பாரதியார் பல்கலைக்கழகத்தின் பாடத்திட்டம் பின்பற்றப்படுகிறது. திருப்பூரில் உள்ள எல்ஆர்ஜி அரசு கலைக் கல்லூரி ஆசிரியர்கள், கூகுள் மீட் வழியாக மாணவிகளுக்குப் பாடம் நடத்துகின்றனர். இக் கல்லூரிக்கென ஆசிரியர்கள் நியமிக்கப்பட்டதும், அவர்கள் மூலமாக மாணவிகளுக்கு வகுப்புகள் நடத்த திட்டமிடப்பட்டுள்ளது” என்றனர்.