ஐபிஎல் கோப்பையை வென்ற சிஎஸ்கே அணிக்கு தமிழிசை, ஸ்டாலின் வாழ்த்து

சென்னை: ஐபிஎல் கோப்பையை வென்ற சிஎஸ்கே அணிக்கு தெலங்கானா ஆளுநர் தமிழிசை சவுந்தரராஜன், தமிழக முதல்வர் மு.க.ஸ்டாலின், முன்னாள் முதல்வர் ஓ.பன்னீர்செல்வம் வாழ்த்து தெரிவித்துள்ளனர்.

இதுதொடர்பாக அவர்கள் வெளியிட்ட வாழ்த்துச் செய்தியில் கூறியிருப்பதாவது

தெலங்கானா ஆளுநர் தமிழிசை சவுந்தரராஜன்: 2023 ஐபிஎல் தொடரில் 5-வது முறையாக சாம்பியன் பட்டத்தை வென்ற சென்னை சூப்பர் கிங்ஸ் அணிக்கு வாழ்த்துகள். மகேந்திர சிங் தோனி தலைமையில் மிகச் சிறப்பாக விளையாடிய, குறிப்பாக கடைசி 2 பந்துகளில் 10 ரன்கள் தேவைப்பட்ட நிலையில் சிக்ஸர், ஃபோர் அடித்து அணி வெற்றி பெற காரணமாக இருந்த ரவீந்திர ஜடேஜாவுக்கும், சென்னை சூப்பர் கிங்ஸ் வீரர்களுக்கும் மனமார்ந்த பாராட்டுகளையும், வாழ்த்துகளையும் தெரிவித்துக் கொள்கிறேன்.

முதல்வர் மு.க.ஸ்டாலின்: தோனி என்ற மனிதனின்கீழ் 5-வது ஐபிஎல் கோப்பையை வென்ற மஞ்சள் படைக்கு வாழ்த்துகள். இது மிகச் சிறந்த கிரிக்கெட் போட்டி. நெருக்கடியான சூழலை எதிர்கொண்ட ஜடேஜா, சென்னை சூப்பர் கிங்ஸ் அணிக்கு ஒரு வரலாற்று வெற்றியை உறுதிப்படுத்தியுள்ளார்.

முன்னாள் முதல்வர் ஓ.பன்னீர்செல்வம்: 2023 ஐபிஎல் கிரிக்கெட் இறுதிப் போட்டியில் குஜராத் டைட்டன்ஸ் அணியை வீழ்த்தி 5-வது முறையாக கோப்பையை வென்ற சிஎஸ்கே அணிக்கும், அணிக்கு தலைமையேற்ற மகேந்திர சிங் தோனிக்கும் மனமார்ந்த பாராட்டுகள். வெற்றிகள் தொடர எனது நல்வாழ்த்துகள். இவ்வாறு அவர்கள் கூறியுள்ளனர்.

நெருக்கடியான சூழலை எதிர்கொண்ட ஜடேஜா, வரலாற்று வெற்றியை உறுதிப்படுத்தி உள்ளார்.