கடல்சார் பல்கலை.யில் 5 புதிய பட்டப்படிப்புகள்

சென்னை: இந்திய கடல்சார் பல்கலைக்கழகத்தின் தேர்வு கட்டுப்பாட்டு அதிகாரி கே.டி.ஜோஷி, நிதி அதிகாரி எம்.சரவணன் ஆகியோர் சென்னையில் செய்தியாளர்களிடம் நேற்று கூறியதாவது:

கடல்சார் தொழில்துறையின் தேவையை கருத்தில்கொண்டு இந்திய கடல்சார் பல்கலைக்கழகம் எம்டெக் (மரைன் டெக்னாலஜி, எம்பிஏ (சர்வதேச போக்குவரத்து மற்றும் தளவாட மேலாண்மை) ஆகிய முதுநிலை படிப்புகளையும், பிஎஸ்சி (கடல்சார் அறிவியல்), பிபிஏ (தளவாடங்கள் சில்லறை வணிகம் மற்றும் மின்-வணிகம்), பிபிஏ (கடல்சார் தொழில்பயிற்சி) ஆகிய 3 இளநிலை படிப்புகளையும் இந்த ஆண்டு அறிமுகப்படுத்தியுள்ளது.

இப்பல்கலைக்கழகத்தில் வழங்கப்படும் முதுநிலை மற்றும் ஆராய்ச்சி படிப்புகள் கடல்சார்துறையில் ஆராய்ச்சியை ஊக்குவிக்கும் வகையில் அமைந்துள்ளன. இப்பல்கலைக்கழகத்தில் மாணவிகளின் எண்ணிக்கை 2014-ல் 13 ஆக இருந்தது. தற்போது அது 123 ஆக உயர்ந்துள்ளது. ஆண்டுதோறும் 50 மாணவிகளுக்கு கல்வி உதவித்தொகை வழங்கும் வகையில் அண்மையில் பிடபிள்யு குளோபல் யுனைடெட் எல்பிஜி என்ற நிறுவனத்துடன் புரிந்துணர்வு ஒப்பந்தம் செய்யப்பட்டது.

பல்கலைக்கழகத்தின் உள்கட்டமைப்பை மேம்படுத்த மத்திய அரசு 2022- 2026 காலகட்டத்துக்கு ரூ.200 கோடி வழங்கியுள்ளது. இதில் புதுமை ஆய்வகம், சிமுலேட்டர் மற்றும் நவீன ஆய்வகங்கள் அமைக்கப்படும். இவ்வாறு அவர்கள் கூறினர்.