கோவையில் இழப்பீடு வழங்காததால் அரசு சொகுசுப் பேருந்து ஜப்தி

கோவை: கோவை மாவட்டம் பொள்ளாச்சியை அடுத்த ஜமீன் ஊத்துக்குளியை சேர்ந்தவர் சதீஸ் (27). இவர், கடந்த 2018-ம் ஆண்டு பிப்ரவரி 3-ம் தேதி தனது நண்பருடன் இருசக்கர வாகனத்தில் உக்கடம் அருகே சென்றுகொண்டிருந்தார்.

அப்போது அரசு நகரப் பேருந்து (3டி) மோதியதில் சதீஸ் உயிரிழந்தார். தனது மகன் உயிரிழந்ததற்கு அரசுப் போக்குவரத்துக் கழகம் இழப்பீடு வழங்கக்கோரி சதீஸின் தாயார் விஜயலட்சுமி, கோவை மூன்றாவது கூடுதல் மாவட்ட அமர்வு நீதிமன்றத்தில் மனு தாக்கல் செய்தார்.

இந்த வழக்கை விசாரித்த நீதிமன்றம், ‘சதீஸின் குடும்பத்துக்கு ரூ.12.39 லட்சத்தை 7.50 சதவீத வட்டியுடன் இழப்பீடாக அரசுப் போக்குவரத்துக் கழகம் வழங்க வேண்டும்’ என கடந்த 2019-ம் ஆண்டு அக்டோபர் 31-ம் தேதி உத்தரவிட்டது.

நீதிமன்றம் குறிப்பிட்ட காலத்தில் அரசுப் போக்குவரத்துக் கழகம் இழப்பீடு வழங்கவில்லை. இதையடுத்து, நீதிமன்ற உத்தரவை நிறைவேற்றக்கோரி விஜயலட்சுமி மனு தாக்கல் செய்தார். மனுவை விசாரித்த நீதிமன்றம் பேருந்தை ஜப்தி செய்ய உத்தரவிட்டது. பின்னர், கடந்த ஜனவரியில் ரூ.7.49 லட்சம் மட்டும் இழப்பீடாக வழங்கப்பட்டது.

மீதித் தொகையான ரூ.9.33 லட்சம் வழங்கப்படவில்லை. இதையடுத்து, நீதிமன்ற உத்தரவுப்படி கணபதி-கோவைப்புதூர் வழித்தடத்தில் இயங்கும் அரசு சொகுசுப் பேருந்து (3டி) நேற்று ஜப்தி செய்யப்பட்டது.