வடமாநில தொழிலாளர் பிரச்சினையில் பாஜகவின் விஷம பிரச்சாரத்துக்கு சிராக் பாஸ்வான் துணைபோக கூடாது: ஆ.ராசா கண்டனம்

சென்னை: வடமாநில தொழிலாளர்கள் விவகாரத்தில் பாஜகவின் விஷம பிரச்சாரத்துக்கு சிராக் பாஸ்வான் துணைபோக வேண்டாம் என்று திமுக துணை பொதுச் செயலாளர் ஆ.ராசா தெரிவித்துள்ளார்

இதுகுறித்து அவர் நேற்று வெளியிட்ட அறிக்கை: போதிய கல்வி, வேலைவாய்ப்பு கிடைக்காமல் தவிக்கும் வடமாநிலத்தினர் வேலை, புதுவாழ்வை தேடி தமிழகம் வருகின்றனர். அவர்களது நிம்மதியை கெடுக்கும் வகையில் சுயநல அவதூறு அரசியலை பாஜக செய்வதும், லோக் ஜனசக்தி (ராம்விலாஸ்) கட்சித் தலைவர் சிராக் பாஸ்வான் அதற்குதுணைபோவதும் கண்டிக்கத்தக்கது.

வடமாநில தொழிலாளர்களுக்கு எதிராக எங்கெங்கோ நடந்த குற்றங்களை தமிழகத்தில் நடந்ததாக போலி செய்திகளை பரப்பி, அதன்மூலம் பதற்றமான சூழலை உருவாக்கி குளிர்காய நினைத்த பாஜகவின் எண்ணத்தில் மண் விழுந்துள்ளது. இங்கு உள்ள வெளி மாநில தொழிலாளர்களுக்கு எந்த சிக்கலும் இல்லை என்பதை, பிஹாரில் இருந்து வந்த அரசு குழுவும் உறுதி செய்துள்ளது.

திட்டமிட்டு போலி செய்தி பரப்பியவர்கள் மீது தமிழக, பிஹார் மாநில காவல் துறைகள் வழக்கு பதிவு செய்து நடவடிக்கை எடுத்து வருகின்றன. இதனால், சிராக் பாஸ்வானை துணைக்கு அழைத்து பாஜக ஆறுதல் தேடியுள்ளது.

வரும் நாடாளுமன்ற தேர்தலில் பாஜகவுக்கு எதிரான வலிமையான கூட்டணியை கட்டமைக்க முதல்வர் ஸ்டாலின் தனது 70-வது பிறந்தநாள் விழா மேடையையே களமாக மாற்றினார். அதனால் இந்த பொய் பிரச்சாரம் நடத்தப்படுகிறது என்பதை மக்கள் அறிவார்கள். சிராக் பாஸ்வானை வைத்து பாஜக நடத்தும் நாடகங்களையும் மக்கள் உணர்ந்துள்ளனர்.

தமிழகத்தில் வடமாநில தொழிலாளர்கள் பாதுகாப்பாக உள்ள நிலையில், பாஜகவின் விஷம பிரச்சாரத்துக்கு துணைபோக வேண்டாம் என சிராக் பாஸ்வானுக்கு எச்சரிக்கையுடன் சொல்லிக் கொள்கிறேன்.

சமூக நீதி கருத்தியலை நெஞ்சில் தாங்கி செயல்பட்ட ராம்விலாஸ் பாஸ்வானை, அவரது கடைசிக் காலத்தில் பாஜக தனதுசுயநல அரசியலுக்கு பயன்படுத்திக் கொண்டதை அவரது மகன்உணர்ந்து தன்னை தற்காத்துக் கொள்ள வேண்டும். பாஜகவுக்கான ‘பி டீம்’ அரசியலை அவர் பிஹாரிலேயே செய்யட்டும். அத்தகைய நயவஞ்சக எண்ணத்துடன் தமிழகத்துக்கு வரவேண்டாம். இவ்வாறு அவர் தெரிவித்துள்ளார்.