கோவை வழியாக இயக்கப்படும் 5 ரயில்களின் சேவையில் நாளை மாற்றம்

கோவை: கோவை வழியாக இயக்கப்படும் 5 ரயில்களின் சேவையில் நாளை மாற்றம் செய்யப்பட்டுள்ளது.

இது தொடர்பாக, சேலம் கோட்ட ரயில்வே அலுவலகம் வெளியிட்ட செய்திக் குறிப்பில் கூறியிருப்பதாவது: சேலத்தை அடுத்துள்ள மேக்னசைட் ரயில்நிலையத்தில் பராமரிப்பு பணிகள் நடைபெற உள்ளதால், கோவை - லோக்மான்ய திலக் இடையிலான எக்ஸ்பிரஸ் ரயில் (எண்: 11014) நாளை (பிப்.28), சேலம் - கேஎஸ்ஆர் பெங்களூரு இடையே மாற்று வழியில் திருப்பத்தூர், பங்காரபேட், கிருஷ்ணராஜபுரம் வழியே இயக்கப்படும்.

இந்த ரயில், தருமபுரி, ஓசூர் ரயில் நிலையங்களில் நிற்காது. கேஎஸ்ஆர் பெங்களூரு - எர்ணாகுளம் இடையிலான எக்ஸ்பிரஸ் ரயில் (எண்: 12677), நாளை மாற்று வழியில் கிருஷ்ண ராஜபுரம், பங்கார பேட், திருப்பத்தூர் வழியாக இயக்கப்படும். இந்த ரயில் கார்மல்ராம், ஓசூர், தருமபுரி ரயில் நிலையங்களில் நிற்காது.

ஆலப்புழா - தன்பாத் தினசரி எக்ஸ்பிரஸ் ரயில் (எண்: 13352) ஆலப்புழாவில் இருந்து நாளை காலை 6 மணிக்கு புறப்படுவதற்கு பதில், ஒன்றரை மணி நேரம் தாமதமாக காலை 7.30 மணிக்கு புறப்பட்டு செல்லும்.

எர்ணாகுளம் - கேஎஸ்ஆர் பெங்களூரு இடையிலான தினசரி எக்ஸ்பிரஸ் ரயில் (எண்: 12678), எர்ணாகுளத்தில் இருந்து நாளை காலை 9.10 மணிக்கு புறப்படுவதற்கு பதில் ஒரு மணி நேரம் தாமதமாக காலை 10.10 மணிக்கு புறப்பட்டுச் செல்லும். நாகர்கோவில் - மும்பை சிஎஸ்எம்டி எக்ஸ்பிரஸ் ரயில் (எண்:16340) நாளை தேவையான இடத்தில் 50 நிமிடங்கள் நிறுத்திவைத்து இயக்கப்படும். இவ்வாறு அதில் தெரிவிக்கப்பட்டுள்ளது.