அனுமதியின்றி கழிவுநீர் அகற்றும் பணியை மேற்கொண்டால் நடவடிக்கை: சென்னை குடிநீர் வாரியம் எச்சரிக்கை

சென்னை: அனுமதியின்றி கழிவுநீர் அகற்றும் பணிகளை மேற்கொண்டால் நடவடிக்கை எடுக்கப்படும் என்று சென்னை குடிநீர் வாரியம் சார்பில் எச்சரிக்கை விடுக்கப்பட்டுள்ளது.

இது குறித்து சென்னை குடிநீர் வாரியம் வெளியிட்டுள்ள அறிக்கையில், "திறந்தவெளி மற்றும் நீர்நிலைகளில் மலக்கசடு, கழிவுநீர் மற்றும் பிற கழிவுகளை வாகனங்கள் மூலமாக முறையற்ற முறையில் வெளியேற்றுவதை தடுக்கவும் மற்றும் முறையான சுத்திகரிப்பை உறுதிசெய்ய தமிழ்நாடு நகராட்சி சட்டங்கள் மற்றும் சென்னைப் பெருநகர குடிநீர் வழங்கல் மற்றும் கழிவுநீர் அகற்றல் (திருத்தச்) சட்டம் (தமிழ்நாடு சட்டம் 34/2022) 02.01.2023 முதல் செயல்பாட்டுக்கு கொண்டு வந்துள்ளது.

இதனடிப்படையில், சென்னை குடிநீர் வாரிய உரிமம் பெற்ற வாகனங்கள் மூலம் மட்டுமே சென்னை குடிநீர் வாரியத்தின் கழிவுநீர் சுத்திகரிப்பு நிலையங்கள் மற்றும் கழிவுநீர் உந்து நிலையங்களில் கழிவுநீர் வெளியேற்றப்பட வேண்டும்.

சென்னை குடிநீர் வாரியத்தின் கீழ்க்கண்ட கழிவுநீர் சுத்திகரிப்பு நிலையங்கள் மற்றும் கழிவுநீர் உந்து நிலையங்களில் மட்டுமே உரிமம் பெற்ற கழிவுநீர் வாகனங்கள் மூலமாக கழிவுநீரை வெளியேற்ற வேண்டும்.

• கொடுங்கையூர் கழிவுநீர் சுத்திகரிப்பு நிலையம் - தண்டையார்பேட்டை
• கோயம்பேடு கழிவுநீர் சுத்திகரிப்பு நிலையம் - கோடம்பாக்கம்
• தாழங்குப்பம் கழிவுநீர் உந்துநிலையம் - திருவொற்றியூர்
• ஜெய்ஹிந்த் நகர் கழிவுநீர் உந்துநிலையம் - திருவொற்றியூர்
• கிளிஜோசியம் நகர் கழிவுநீர் உந்து நிலையம் - திருவொற்றியூர்
• மணலி நியு டவுன் கழிவுநீர் உந்து நிலையம் - மணலி
• மாத்தூர் எம்.எம்.டி.ஏ கழிவுநீர் உந்து நிலையம் - மணலி
• தாங்கல்கரை கழிவுநீர் உந்துநிலையம் - மாதவரம்
• கடப்பா சாலை கழிவுநீர் உந்துநிலையம் - மாதவரம்
• ராமச்சந்திரா நகர் கழிவுநீர் உந்துநிலையம் - மாதவரம்
• தண்டையார்பேட்டை “F” நியு கழிவுநீர் உந்துநிலையம் - தண்டையார்பேட்டை
• ஜவஹர் நகர் கழிவுநீர் உந்துநிலையம் - திரு.வி.க.நகர்
• முகப்பேர் மேற்கு கழிவுநீர் உந்துநிலையம் - அம்பத்தூர்
• கீழ்பாக்கம் கழிவுநீர் உந்து நிலையம் - அண்ணா நகர்
• கிரீம்ஸ் சாலை கழிவுநீர் உந்து நிலையம் - தேனாம்பேட்டை
• கங்கா நகர் கழிவுநீர் உந்துநிலையம் - வளசரவாக்கம்
• இந்திரா நகர் கழிவுநீர் சுத்திகரிப்பு நிலையம் - அடையாறு
• எல்.ஐ.சி காலனி கழிவுநீர் உந்துநிலையம் - அடையாறு
• ஏ.ஜி.எஸ்.காலனி கழிவுநீர் உந்துநிலையம் - பெருங்குடி
• நெசப்பாக்கம் கழிவுநீர் சுத்திகரிப்பு நிலையம் - கோடம்பாக்கம்
• பெருங்குடி கழிவுநீர் சுத்திகரிப்பு நிலையம் - பெருங்குடி
• சோழிங்கநல்லூர் கழிவுநீர் சுத்திகரிப்பு நிலையம் - சோழிங்கநல்லூர்

எனவே, கழிவுநீர் லாரி உரிமையாளர்கள் கழிவுநீர் சுத்திகரிப்பு நிலையங்கள் மற்றும் கழிவுநீர் உந்து நிலையங்களில் கழிவுநீர் வெளியேற்றுவதற்கான உரிமம் பெறுவதற்கான விண்ணப்பங்களை அனைத்து மண்டல அலுவலகங்களிலும் பெற்று நிர்ணயிக்கப்பட்ட கால அளவிற்குள் விண்ணப்பிக்க வேண்டும். மேலும், சென்னை குடிநீர் வாரியத்தின் அனுமதியின்றி கழிவுநீர் அகற்றும் பணிகளை மேற்கொண்டால் உரிய சட்ட விதிகளின்படி கழிவுநீர் லாரி உரிமையாளர்கள் மீது நடவடிக்கை எடுக்கப்படும்." இவ்வாறு அந்த அறிக்கையில் கூறப்பட்டுள்ளது.