அதிமுக கூட்டணி விவரம் 3 தினங்களில் அறிவிப்பு: செங்கோட்டையன் தகவல்

ஈரோடு: அதிமுக கூட்டணியில் யார் யார் இருக்கின்றனர் என்பதை இன்னும் 3 தினங்களில் பழனிசாமி அறிவிப்பார், என முன்னாள் அமைச்சர் கே.ஏ.செங்கோட்டையன் தெரிவித்தார்.

ஈரோடு பி.பெ.அக்ரஹாரத்தில் அதிமுக நிர்வாகிகள் ஆலோசனைக் கூட்டம் நடைபெற்றது. இதில் பங்கேற்ற முன்னாள் அமைச்சர் கே.ஏ.செங்கோட்டையன், செய்தியாளர்களிடம் கூறியதாவது: பழனிசாமி தலைமையில் சந்திக்கும் முதல் இடைத்தேர்தல் இது. எம்ஜிஆர் தலைமையில் திண்டுக்கல்லில் நடைபெற்ற இடைத்தேர்தலில் அதிமுக வெற்றி பெற்றது போல இத்தேர்தலிலும் பழனிசாமி தலைமையில் வெற்றி பெறுவோம்.

இந்த தேர்தல் தமிழகத்தில் ஒரு மாற்றத்தை உருவாக்கிக் காட்டும். அதிமுக கூட்டணியில் யார் யார் இருக்கின்றனர் என்பதை இன்னும் 3 தினங்களில் பழனிசாமி அறிவிப்பார். 98.5 சதவீதம் பேர் ஒரே அணியில் பழனிசாமி தலைமையில் செயல்படுகிறோம். இந்த தேர்தலில் சரித்திர வெற்றி பெறுவோம்.

எங்களது வேகம், விவேகம் மக்களை சந்திக்கும் விதம் போகப் போக உங்களுக்கே தெரியும். பழனிசாமி உத்தரவின் பேரில் ஈரோடு கிழக்கு தொகுதி முழுவதும் தேர்தல் பணிக் குழு பொறுப்பாளர்கள் வீடு வீடாகச் சென்று வாக்காளர்களை சந்தித்து வருகிறோம். அவர்களின் மனநிலை குறித்தும் தெரிந்து வருகிறோம்.

இஸ்லாமியர்களுக்கு அதிமுக பல்வேறு திட்டங்களை செய்துள்ளது, என்றார். முன்னதாக, ‘இடைத்தேர்தலில் பாஜக உங்களுக்கு ஆதரவு அளிக்குமா, இரட்டை இலை சின்னம் உங்களுக்கு கிடைக்குமா’ என செய்தியாளர்கள் கேள்வியெழுப்பினர். அதற்கு அவர், ‘பொறுத்திருந்து பாருங்கள்’ என்றார்.