சட்டப்பேரவை நிகழ்வுகள் முதல் கோல்டன் குளோப் விருது வரை | செய்தித் தெறிப்புகள் 10 @ ஜன.11, 2023

‘முதல்வரின் துணிவான நடவடிக்கை’ - பேரவைத் தலைவர்: தமிழக சட்டப்பேரவையில் ஜனவரி 9-ம் தேதி ஆளுநர் ஆர்.என்.ரவி உரையுடன் இந்தாண்டுக்கான முதல் கூட்டத்தொடர் தொடங்கியது. இதில் அரசு தயாரித்த உரையை ஆளுநர் முறையாக முழுமையாக படிக்கவில்லை என்று முதல்வர் மு.க.ஸ்டாலின் பேரவையில் தெரிவித்தார். அது தொடர்பான தீர்மானம் சட்டப்பேரவையில் நிறைவேற்றப்பட்டது. இது தொடர்பாக புதன்கிழமை கூட்டத்தொடரில் பேசிய பேரவைத் தலைவர் அப்பாவு, "ஆளுநர் உரையின்போது காங்கிரஸ், விசிக, கம்யூனிஸ்ட் உறுப்பினர்கள் கோஷமிட்டதை தவிர்த்திருக்க வேண்டும். ஆளுநர் உரையின்போது அசாதாரண சூழலை உருவாக்கியது அவையோ, அரசோ இல்லை. முதல்வரின் மதிநுட்பத்தால் தான் சட்டமன்றத்தின் மாண்பு காக்கப்பட்டது. இந்த நிகழ்வு இந்தியா முழுவதும் உள்ள சட்டமன்றங்களின் நடவடிக்கைகளுக்கு முன்னுதாரணம். இந்தியாவில் உள்ள அனைத்து சட்டமன்றங்களின் மாண்பையும் முதல்வர் காத்துள்ளார். தமிழ்நாடே முதல்வரின் துணிவான நடவடிக்கையை பாராட்டி வருகிறது” என்று பேசினார்.