விஸ்வாஸ் அறக்கட்டளை சார்பில் சென்னையில் மார்கழி மஹா சப்தாகம்: இன்று முதல் டிச. 23-ம் தேதி வரை நடைபெறுகிறது

சென்னை: விஸ்வாஸ் அறக்கட்டளை சார்பில் சென்னையில் மார்கழி மஹாசப்தாகம் இன்று முதல் டிச. 23-ம்தேதி வரை நடைபெறுகிறது

சென்னை அயனாவரம் பகுதியில் விஸ்வ விஷ்ணு சஹஸ்ரநாம சமஸ்தான் (விஸ்வாஸ்) என்ற தன்னார்வ தொண்டு நிறுவனம் இயங்கி வருகிறது. ஸ்ரீ விஷ்ணு சஹஸ்ரநாமம் உலகின் அனைத்துபகுதிகளுக்கும் சென்றடைய வேண்டும் என்பதே இந்நிறுவனத்தின் நோக்கமாகும்.

அந்தவகையில் உலகம் முழுவதும் 3 நிலைகளில் ஸ்ரீ விஷ்ணு சஹஸ்ர நாமத்தை இந்நிறுவனம் மாதம்தோறும் பல்வேறு குழுக்களுக்கு, கற்பிக்கிறது. சரியானஉச்சரிப்பு, அனைத்து நாமங்களின் அர்த்தம், அனைத்து நாமங்களின் ஆராய்ச்சி நோக்கு என 3 பிரிவுகளாக பயிலும் நிலை அமைந்துள்ளது.

’மழலையின் மொழியில் மாதவனின் நாமங்கள்’ என்ற குழந்தைகளுக்கான விஷ்ணு சஹஸ்ரநாம பாராயண நிகழ்ச்சி, ஒவ்வொரு ஆண்டும் ஆகஸ்ட் மாதம் நடைபெறுகிறது. கடந்த ஆகஸ்ட் மாதத்தில் நடைபெற்ற இந்நிகழ்ச்சியில் 350 பள்ளிகளைச் சேர்ந்த 5 லட்சத்துக்கும் மேற்பட்ட குழந்தைகள் பங்கேற்றனர்.

விஷ்ணு சஹஸ்ரநாமத்தை உலகம் முழுவதும் பரப்பும் நோக்கில் பல்வேறு நிகழ்ச்சிகளை நடத்திவரும் இந்நிறுவனம், சென்னை தி.நகர் தெற்கு போக் சாலையில் உள்ள ஸ்ரீ கிருஷ்ணசாமி கல்யாண மண்டபத்தில் டிச 17 (இன்று) முதல் 23-ம் தேதி வரை 7 நாட்கள் ‘சப்தாகம்’ கொண்டாட உள்ளது.

தினமும் காலை 4 முதல் 8 மணி வரை சுப்ரபாதம், திருப்பள்ளி எழுச்சி, திருப்பாவை நிகழ்ச்சிகளுடன் நிகழ்ச்சி தொடங்குகிறது. இதைத் தொடர்ந்து 27 ஆவர்த்தி விஷ்ணுசஹஸ்ரநாம பாராயணம் (கூட்டுபிரார்த்தனை), விளக்க உரைகள்.

நாம சங்கீர்த்தனங்கள் நடைபெறும். சப்தாகத்தின் நிறைவு நாளில் நிவாச கல்யாண உற்சவம் நடைபெறவுள்ளது. கூடுதல் விபரங்களுக்கு www.visvasvsn.org என்ற இணையதளத்திலும், 9790925804 என்ற அலைபேசி எண்ணிலும் தொடர்பு கொள்ளலாம்.