திருவாரூர் தியாகராஜர் கோயில் தெப்பத் திருவிழாவின்போது தெப்பம் மோதியதால் இடிந்து விழுந்த மண்டப தூண்கள்

திருவாரூர்: திருவாரூர் தியாகராஜர் கோயிலில் நேற்று முன்தினம் இரவு நடைபெற்ற தெப்பத் திருவிழாவின்போது, கமலாலயக் குளத்தில் வலம் வந்த தெப்பம், கரையில் உள்ள மண்டபத்தின் அலங்காரத் தூண்கள் மீது மோதியதால்,2 தூண்கள் இடிந்து விழுந்தன.

திருவாரூர் தியாகராஜ சுவாமி கோயிலில் 3 நாட்கள் நடைபெறும் தெப்பத் திருவிழா கடந்த 20-ம் தேதி தொடங்கியது.இதில், 50 அடி அகலமும் 50 அடி நீளமும் கொண்ட 500 பக்தர்கள் பயணிக்கும் வகையில் அமைக்கப்பட்ட பிரம்மாண்ட தெப்பத்தில் பார்வதி சமேத கல்யாணசுந்தரர் சுவாமி எழுந்தருளி அருள்பாலித்தார்.

இந்நிலையில், நேற்று முன்தினம் இரவு நடைபெற்ற 2-ம் நாள் தெப்பத் திருவிழாவில், கமலாலயக் குளத்தில் தெப்பம் முதல் சுற்று முடிந்து, 2-வது சுற்று வலம் வந்துகொண்டிருந்தபோது, குளத்தின் மேல்கரையில் உள்ள மண்டபத்தின் 4 அலங்காரத் தூண்களில் தெப்பம் மோதியது. இதில், 2 அலங்காரத் தூண்கள் இடிந்து குளத்துக்குள் விழுந்தன.

அதிர்ஷ்டவசமாக, அந்த இடத்தைவிட்டு தெப்பம் நகர்ந்த பின்பு தூண்கள் இடிந்து விழுந்ததால் உயிர்ச்சேதம் தவிர்க்கப்பட்டது. இந்த விபத்தின்போது, தெப்பத்தில் 300-க்கும் மேற்பட்ட பக்தர்கள் இருந்தனர் என்பது குறிப்பிடத்தக்கது.

இதுகுறித்து அறநிலையத் துறை இணை ஆணையருக்கு கோயில் செயல் அலுவலர் கவிதா தகவல் தெரிவித்ததையடுத்து, இதுகுறித்து விசாரணை நடத்தப்பட்டு வருகிறது.