பிளஸ் 2 மாணவர்களுக்கு இன்று முதல் தேர்வு - 10-ம் வகுப்பு பொதுத் தேர்வு நாளை தொடக்கம்

சென்னை: தமிழகத்தில் பிளஸ் 2 பொதுத்தேர்வு இன்று (மே 5) தொடங்குகிறது. 10-ம் வகுப்பு பொதுத்தேர்வு நாளை தொடங்க உள்ளது. தேர்வில் முறைகேடுகளைத் தடுக்க கடும் கட்டுப்பாடுகளை தேர்வுத்துறை விதித்துள்ளது.

தமிழக பள்ளிக் கல்வியில் பிளஸ் 2 வகுப்புக்கான பொதுத் தேர்வு இன்று தொடங்குகிறது. முதல்நாளில் மொழிப் பாடங்களுக்கான தேர்வுகள் நடக்க உள்ளன. இந்தத் தேர்வை தமிழகம், புதுச்சேரியில் அமைக்கப்பட்டுள்ள 3,262 மையங்களில் 8.69 லட்சம் பேர் எழுதுகின்றனர். இதில் 28,353 தனித்தேர்வர்கள், 3,638 மாற்றுத் திறனாளிகள், 6 மூன்றாம் பாலினத்தவர், மற்றும் 73 சிறைக் கைதிகளும் அடங்குவர்.

அதேபோல 10-ம் வகுப்பு பொதுத்தேர்வு நாளை (மே 6) தொடங்கி 30-ம் தேதி வரை நடக்க உள்ளது. முதல்நாளில் மொழிப்பாடத் தேர்வுகள் நடக்கின்றன. இந்தத் தேர்வை தமிழகம், புதுச்சேரியில் மொத்தம் 4,092 மையங்களில் 9.93 லட்சம் மாணவ, மாணவிகள் எழுதவுள்ளனர். பொதுத் தேர்வுக்கான அறை கண்காணிப்பாளர் பணியில் 50 ஆயிரத்துக்கும் மேற்பட்ட ஆசிரியர்கள் ஈடுபடுத்தப்பட உள்ளனர். முறைகேடுகளைத் தடுக்க 4,291 பறக்கும் படைகள் அமைக்கப்பட்டுள்ளன. முதன்மைக் கல்வி அதிகாரிகள், வருவாய்த் துறை அதிகாரிகள் தலைமையில் சிறப்பு பறக்கும் படைகளும் ஏற்படுத்தப்பட்டுள்ளன.

மாணவர்களுக்கும், ஆசிரியர்களுக்கும் கடும் கட்டுப்பாடுகள் விதிக்கப்பட்டுள்ளன. தேர்வறைக்குள் செல்போன் உள்ளிட்ட மின்சாதனங்கள் கொண்டுவர தடை விதிக்கப்பட்டுள்ளது. ஹால்டிக்கெட்டில் உள்ள விதிகளைப் பின்பற்றி மாணவர்கள் நடக்க வேண்டும். தேர்வு மையத்துக்கு மாணவர்கள் 9 மணிக்குள் வந்துவிட வேண்டும். தேர்வுகள் காலை 10 முதல் மதியம் 1.15 மணி வரை மொத்தம் 3.15 மணி நேரம் நடக்கும். மாற்றுத் திறனாளிகளுக்கு மட்டும் சிறப்புச் சலுகையாக ஒரு மணி நேரம் கூடுதலாக வழங்கப்படும்.

பொதுத்தேர்வில் ஆள்மாறாட்டம் செய்வது, துண்டுத்தாள் அல்லது பிற மாணவர்களை பார்த்து எழுதுதல், தேர்வு அதிகாரியிடம் முறைகேடாக நடந்து கொள்ளுதல், விடைத்தாள் மாற்றம் செய்தல் ஆகிய ஒழுங்கீன செயல்களில் ஈடுபட்டால் அந்த மாணவர் மீது நடவடிக்கை எடுக்கப்படும். அவர்கள், அதிகபட்சமாக 3 ஆண்டுகள் தேர்வெழுத தடை விதிக்கப்படும். ஒழுங்கீனச் செயல்களை ஊக்கப்படுத்த பள்ளி நிர்வாகம் முயன்றால் அதன் அங்கீகாரம் ரத்து செய்யப்படும்.

பொதுத்தேர்வு குறித்த சந்தேகங்கள் மற்றும் புகார்களைத் தெரிவிக்க தேர்வுக் கட்டுப்பாட்டு அறையை தேர்வு காலங்களில் காலை 8 முதல் இரவு 8 மணி வரை 9498383081, 9498383075 ஆகிய எண்களில் தொடர்பு கொள்ளலாம்.

பெற்றோருக்கு அறிவுரை

பொதுத்தேர்வு எழுதும் மாணவர்களில் பலர், தேர்வு மையங்களுக்கு முன்னரே செல்லும் வேகத்தில் காலை உணவைத் தவிர்த்து விடுகின்றனர். தற்போது வெயிலின் தாக்கம் அதிகமாக இருப்பதால், மாணவர்கள் எளிதில் சோர்வடைந்து விடுவர். எனவே, பிள்ளைகள் காலை உணவு உண்டு, தேர்வுக்கு செல்வதை பெற்றோர் உறுதி செய்ய வேண்டும்.