புதுச்சேரியில் புதிதாக 177 பேருக்கு கரோனா தொற்று உறுதி

புதுச்சேரி: புதுச்சேரியில் புதிதாக 177 பேருக்கு கரோனா தொற்று உறுதி செய்யப்பட்டுள்ளது. தற்போது சிகிச்சை பேறுவோரின் எண்ணிக்கை 500-ஐத் தாண்டியுள்ளது.

இதுகுறித்துப் புதுச்சேரி சுகாதாரத்துறை இன்று (ஜன.7) வெளியிட்டுள்ள தகவலில், ''புதுச்சேரி மாநிலத்தில் 3,367 பேருக்குப் பரிசோதனை செய்யப்பட்டது. இவற்றில் புதுச்சேரியில் 129 பேர், காரைக்காலில் 41 பேர், மாஹேவில் 7 பேர் என மொத்தம் 177 பேருக்கு (5.26 சதவீதம்) கரோனா தொற்று உறுதி செய்யப்பட்டுள்ளது. ஏனாமில் யாருக்கும் தொற்று இல்லை.

இதனால் மாநிலத்தில் கரோனாவால் பாதிக்கப்பட்டோரின் மொத்த எண்ணிக்கை 1 லட்சத்து 29 ஆயிரத்து 998 ஆக அதிகரித்துள்ளது. இதில் தற்போது மருத்துவமனைகளில் 92 பேரும், வீடுகளில் தனிமைப்படுத்தப்பட்ட நிலையில் 470 பேரும் என மொத்தமாக 562 பேர் சிகிச்சையில் உள்ளனர். இதன்படி மீண்டும் சிகிச்சை பெறுவோரின் எண்ணிக்கை 500-ஐத் தாண்டியிருக்கிறது.

மேலும் உயிரிழப்பு ஏதுமில்லை. இதனால் இறந்தவர்களின் எண்ணிக்கை 1,881 ஆகவும், இறப்பு விகிதம் 1.45 சதவீதமாகவும் இருக்கிறது. புதிதாக 14 பேர் சிகிச்சை முடிந்து வீடு திரும்பியுள்ளதால், வீடு திரும்பியோரின் எண்ணிக்கை 1 லட்சத்து 27 ஆயிரத்து 555 (98.12 சதவீதம்) ஆக உள்ளது. இதுவரை 14 லட்சத்து 37 ஆயிரத்து 971 (2 தவணைகள் உட்பட) தடுப்பூசிகள் செலுத்தப்பட்டுள்ளன'' என்று தெரிவித்துள்ளது.