தரிசு நிலங்களை பரிசு நிலங்களாக்கி சாகுபடி பரப்பு உயர்த்தப்படும்: அமைச்சர் எம்.ஆர்.கே.பன்னீர்செல்வம்

இளைஞர்கள் சொந்த ஊரிலேயே வேளாண்மையை அடுத்த கட்டத்துக்கு எடுத்துச் செல்ல புதிய திட்டம் செயல்படுத்தப்படும் என, வேளாண்மை மற்றும் உழவர் நலத்துறை அமைச்சர் எம்.ஆர்.கே.பன்னீர்செல்வம் தெரிவித்துள்ளார்.

தமிழக அரசின் வேளாண்துறைக்கான தனி நிதிநிலை அறிக்கையை காகிதமில்லா இ-பட்ஜெட்டாக, அமைச்சர் எம்.ஆர்.கே.பன்னீர்செல்வம் இன்று (ஆக. 14) காலை 10 மணி முதல் கலைவாணர் அரங்கில் நடைபெறும் சட்டப்பேரவைக் கூட்டத்தில் தாக்கல் செய்து பேசி வருகிறார். அதன் சிறப்பம்சங்கள்:

* தமிழகத்தில் 19.31 லட்சம் ஹெக்டேர் தரிசு நிலம் இருப்பது கண்டறியப்பட்டுள்ளது.

* தரிசு நிலங்களை பரிசு நிலங்களாக்கி சாகுபடி பரப்பு உயர்த்தப்படும்.

* இளைஞர்கள் சொந்த ஊரிலேயே வேளாண்மையை அடுத்த கட்டத்துக்கு எடுத்துச் செல்ல புதிய திட்டம் செயல்படுத்தப்படும். ஊரக இளைஞர் வேளாண் திறன் மேம்பாட்டு இயக்க திட்டத்தில் முதற்கட்டமாக 2,500 இளைஞருக்கு பயிற்சி பயிற்சி அளிக்கப்படும்.

* நடப்பாண்டில் 30 மாவட்டங்களில் 76 லட்சம் பனை விதைகளும் ஒரு லட்சம் பனங்கன்றுகளும் மானியத்தில் விநியோகம்

* உணவு தானிய உற்பத்தியில் நடப்பாண்டு 125 மெட்ரிக் டன் என்ற இலக்கை எய்திட திட்டம்

* உற்பத்தித் திறனை அதிகரிக்க ஒருங்கிணைந்த ஊட்டச்சத்து நிர்வாக சிறப்புத் தொகுப்புத் திட்டம்

* தென்னையில் வெள்ளை ஈயின் தாக்குதலை கட்டுப்படுத்த ஒருங்கிணைந்த பயிர் பாதுகாப்பு நடவடிக்கைகள்

* ஒருங்கிணைந்த பயிர் பாதுகாப்பு நடவடிக்கை ரூ. 10.20 கோடி செலவில் செயல்படுத்தப்படும்.

* தோட்டக்கலைத்துறையின் மூலம் தோட்டக்கலை நடவுப்பொருட்கள் உற்பத்தி செய்யப்படும். இது ரூ.21.80 கோடி செலவில் செயல்படுத்தப்படும்.

* பதியன்போடுதல், கவாத்து, நுண்ணுயிர் பாசனை அமைப்பு, பராமரித்தல் போன்ற பயிற்சிக்காக ரூ.5 கோடி ஒதுக்கீடு