ஜூலை 31 வரை ஊரடங்கு; திரையரங்குகள் திறக்க அனுமதி இல்லை: எவை எவைக்குத் தடை?- முழு விவரம்

ஜூலை 31 வரை 12 நாட்கள் ஊரடங்கு நீட்டிக்கப்பட்ட நிலையில், திரையரங்குகளைத் திறக்க இம்முறையும் அனுமதி அளிக்கப்படவில்லை. எவை எவைக்குத் தடை என்பது குறித்த முழு விவரம் வெளியாகியுள்ளது.

இதுகுறித்து முதல்வர் ஸ்டாலின் இன்று வெளியிட்ட அறிவிப்பு:

“கரோனா நோய்த் தொற்றுப் பரவலைக் குறைக்கத் தேவையான கட்டுப்பாடுகளை 31-7-2021 வரை தொடர்ந்து அமல்படுத்த மத்திய அரசின் உள்துறை அமைச்சகம் அறிவித்துள்ளது. தற்போது தமிழ்நாட்டில் நடைமுறையில் உள்ள தளர்வுகளுடன் கூடிய ஊரடங்கு 19-7-2021 அன்று காலை 6 மணியுடன் முடிவடைகிறது.

இந்நிலையில், மாநிலத்தின் கரோனா நோய்த் தொற்று நிலையைக் கண்காணித்து தொடர்ந்து கட்டுப்படுத்த வேண்டிய அவசியத்தைக் கருத்தில் கொண்டு அனைத்து மாவட்டங்களிலும் கீழ்க்கண்ட செயல்பாடுகளுக்கு 31-7-2021 காலை 6.00 மணி வரை தொடர்ந்து தடை விதிக்கப்படுகிறது.

எவை எவைக்குத் தடை?

* மாநிலங்களுக்கிடையே தனியார் மற்றும் அரசுப் பேருந்து போக்குவரத்து (புதுச்சேரி நீங்கலாக) செயல்படத் தடை

* மத்திய உள்துறை அமைச்சகத்தால் அனுமதிக்கப்பட்ட வழித்தடங்களைத் தவிர, சர்வதேச விமானப் போக்குவரத்துக்கு அனுமதி இல்லை.

* திரையரங்குகள் திறக்க அனுமதி இல்லை.

* அனைத்து மதுக்கூடங்கள் திறக்க அனுமதி இல்லை.

* நீச்சல் குளங்கள் திறக்க அனுமதி இல்லை.

* பொதுமக்கள் கலந்துகொள்ளும் சமுதாயம், அரசியல் சார்ந்த கூட்டங்களுக்கு அனுமதி இல்லை.

* பொழுதுபோக்கு, விளையாட்டு, கலாச்சார நிகழ்வுகளுக்குத் தடை.

* பள்ளிகள் மற்றும் கல்லூரிகள் செயல்படத் தடை.

* உயிரியல் பூங்காக்கள் திறக்க அனுமதி இல்லை.

* நோய்த் தொற்றைக் கட்டுப்படுத்தும் விதமாக திருமண நிகழ்வுகளில் 50 நபர்கள் மட்டுமே அனுமதிக்கப்படுவர்.

* இறுதிச் சடங்குகளில், 20 நபர்கள் மட்டுமே அனுமதிக்கப்படுவர்.

நோய்க் கட்டுப்பாட்டுப் பகுதிகள் தவிர, அனைத்துப் பகுதிகளிலும், ஏற்கெனவே அனுமதிக்கப்பட்டுள்ள செயல்பாடுகள் தொடர்ந்து அனுமதிக்கப்படும்”.

இவ்வாறு முதல்வர் ஸ்டாலின் தெரிவித்துள்ளார்.