ஆரணி சட்டப்பேரவை தொகுதியில் அன்புமணி ராமதாஸின் தேர்தல் பிரச்சாரம்; சேவூர் எஸ்.ராமச்சந்திரனுக்கு கைக்கொடுக்குமா? - வன்னியர்களின் வாக்குகளை பெற தீவிரம்

ஆரணி சட்டப்பேரவைத் தொகுதி அதிமுக வேட்பாளரான அமைச்சர் சேவூர் எஸ்.ராமச்சந்திரனுக்கு பாமக இளைஞர் அணி தலைவர் அன்புமணி ராமதாஸின் பிரச்சாரம் கைக்கொடுக்குமா? என்ற எதிர்பார்ப்பு எழுந்துள்ளது.

தி.மலை மாவட்டம் ஆரணி சட்டப்பேரவைத் தொகுதியில், அதிமுக வேட்பாளராக மீண்டும் போட்டியிடுகிறார் அமைச்சர் சேவூர் எஸ். ராமச்சந்திரன். இவரை எதிர்த்து, திமுக சார்பில் அன்பழகன் என்பவர் போட்டியிடுகிறார். இவர்கள் இருவருக்கும் இடையே கடுமையான போட்டி நிலவுகிறது.

ஆரணியை தலைமையிடமாக கொண்டு புதிய மாவட்டம் உருவாக்க வேண்டும், பட்டு ஜவுளி பூங்கா தொடங்க வேண்டும், புதிய பேருந்து நிலையம் அமைத்துக் கொடுக்க வேண்டும், திண்டிவனம் – நகரி இடையேயான புதிய ரயில் பாதை திட்டத்தை விரைவுப்படுத்தி நிறைவேற்றிக் கொடுக்க வேண்டும், கைத்தறி நெசவாளர்கள் மற்றும் விவசாயிகளின் வாழ்வாதாரத்தை மேம்படுத்த புதிய தொழில் கொள் கைகளை உருவாக்க வேண்டும் போன்ற பல கோரிக்கைகள் நிறைவேற்றப்படாமல் உள்ளன. இதுவே, அதிமுக ஆட்சி மற்றும் சேவூர் எஸ்.ராமச்சந்திரன் மீதான மக்களின் அதிருப்தி என காரணம் கூறப்படுகிறது.

அண்டை மாவட்டமான வேலூர் மாவட்டத்தை மூன்றாக பிரித்து திருப்பத்தூர் மற்றும் ராணிப்பேட்டை மாவட்டங்களை உருவாக்கியது போல், திருவண்ணாமலை மாவட் டத்தை பிரித்து ஆரணியை தலைமை யிடமாக கொண்டு புதிய மாவட்டம் உருவாக்காதது ஏன்? என்ற கேள்வியை மக்கள் எழுப்பினர். மக்களின் தொடர் கேள்விக்கு முற்றுப்புள்ளி வைப்பதுபோல், ஆரணியில் பிரச்சாரம் செய்த முதல்வர் பழனி சாமி, ஆரணியை தலைமையிடமாக கொண்டு புதிய மாவட்டம் உருவாக்கப்படும் என அறிவித்தார். இந்த அறிவிப்பு என்பது, சேவூர் எஸ்.ராமச்சந்திரனுக்கு கூடுதல் பலத்தை கொடுத்திருந்தாலும், ஆட்சியில் இருந்தபோது ஏன்? செய்து கொடுக்கவில்லை என்ற விமர்சனமும் எழுந்துள்ளது.

அமைச்சர் சேவூர் எஸ்.ராமச் சந்திரனின் பிரச்சாரத்துக்கு இணையாக திமுக வேட்பாளர் அன்பழகனும் சுழன்று வருகிறார். முதல் முறையாக களம் காண்பதால், அவர் மீது தனிப்பட்ட விமர்சனம் எழவில்லை. ஆரணியில் முதல்வர் பழனிசாமி பிரச்சாரம் செய்துள்ளதால், திமுக தலைவர் மு.க. ஸ்டாலினும் தனது தொகுதியில் பிரச்சாரம் செய்வார் என எதிர்பார்த்த அன்பழகனுக்கு ஏமாற்றமே மிஞ்சியது.

முதலியார், வன்னியர்கள் மற்றும் பட்டியலினத்தவர்கள் அதிகம் உள்ள ஆரணி தொகுதியில், அவர்களது வாக்குகளே முடிவை தீர் மானிக்கிறது. திமுக கூட்டணியில் விடுதலை சிறுத்தைகள் மற்றும் இடதுசாரிகள் இடம்பெற்றுள்ளதால், பட்டியலினத்தவர்களின் வாக்குகள், திமுகவுக்கு கணிசமாக கிடைக்க லாம். பாஜகவுக்கு எதிரான கருத்தை கொண்டவர்கள் என்பதால், சிறுபான்மையின மக்களின் வாக்குகளும் திமுகவுக்கு கிடைக்க வாய்ப்பு உள்ளது. அதேநேரத்தில் வன்னியர் சமூகத்தைச் சேர்ந்தவரான அன்பழகனுக்கு, அந்த சமூகத்தினரின் வாக்குகளும் பரவலாக கிடைக்கலாம்.

இப்படியாக, பல வகையில் நெருக்கடியை சந்தித்துள்ள சேவூர் எஸ்.ராமச்சந்திரனுக்கு, தனது செங்குந்த முதலியார் சமூக வாக்குகள் முழுமையாக கிடைக்குமா? என தெரியவில்லை. இதனால், வன்னியர்கள் வாக்குகளை பெற, பாமக நிறுவனர் ராமதாஸின் பிரச்சாரத்துக்கு சேவூர் எஸ்.ராமச்சந்திரன் பலமுறை முயற்சி செய்துள்ளார். ஆனால், தனது உடல் நிலையை காரணமாக கூறி ராமதாஸ் தவிர்த்ததாக தெரிகிறது. இதனால் ராமதாஸூக்கு மாற்றாக, பாமக இளைஞர் அணி தலைவர் அன்புமணி ராமதாஸை வரவழைத்து நேற்று முன்தினம் பிரச்சாரம் செய்துள்ளார். அவரது பிரச்சாரத்தில், வன்னியர்களுக்கான 10.5 சதவீத இடஒதுக்கீடு வழங்கிய முதல்வர் பழனிசாமி, முதல்வராக மீண்டும் வர வேண்டும், அதற்கு ஆரணியில் சேவூர் எஸ். ராமச்சந்திரன் வெற்றி பெற வேண்டும் என வலியுறுத்தினார்.

மேலும், அதிமுக வேட்பாளர் சாதாரண குடும்பத்தில் பிறந்து படிப்படியாக உயர்ந்துள்ளார் என புகழாரம் சூட்டினார். அன்புமணியின் பிரச்சாரம், வன்னியர்களிடையே எந்தளவுக்கு தாக்கத்தை ஏற்படுத்தி இருக்கும் என மே 2-ம் தேதி வரை காத்திருக்கலாம்.