திமுக பொது செயலாளர் துரைமுருகனுக்கு ரூ.29.62 கோடி சொத்து: 8 கிரிமினல் வழக்குகள் நிலுவையில் உள்ளன

திமுக பொதுச் செயலாளர் துரை முருகன் மற்றும் அவரது மனைவி பெயரில் உள்ள அசையும் மற்றும் அசையா சொத்துக்களின் மதிப்பு ரூ.29.62 கோடி என தெரியவந்துள்ளது.

திமுக பொதுச் செயலாளர் துரைமுருகன் காட்பாடி தொகுதி யில் போட்டியிட நேற்று பத்தாவது முறையாக மனுத்தாக்கல் செய்தார். அவர் தாக்கல் செய்துள்ள சொத்து விவரங்களின் படி துரைமுருகன் கையிருப்பில் ரூ.20 லட்சத்து 36 ஆயிரத்து 65 தொகையும், அவரது மனைவி சாந்தகுமாரி கையிருப்பில் ரூ.13 லட்சத்து 67 ஆயிரத்து 702 உள்ளது.

சட்டப்பேரவைத் தேர்தலில் போட்டியிடும் வேட்பாளர்கள் தனி வங்கிக் கணக்கு தொடங்கி அந்த கணக்கில் இருந்துதான் தேர்தல் தொடர்பான செலவுகளை செய்ய வேண்டும் என தேர்தல் ஆணையம் உத்தரவிட்டுள்ளது. அதன்படி, காட்பாடி இந்தியன் வங்கி கிளையில் துரைமுருகன் கணக்கு தொடங்கியுள்ள நிலையில் அதில் தேர்தல் செலவு தொகையாக ரூ.30 லட்சத்து 74 ஆயிரத்து 622 தொகையை இருப்பு வைத்துள்ளார்.

தங்கம், வைரம்

துரைமுருகன் வசம் 500 கிராம் தங்கம், ஒரு காரட் வைரமும் சாந்தகுமாரி வசம் 2,224 கிராம் தங்கம், 5.5 காரட் வைரமும் உள்ளது. துரைமுருகன் வசம் ஒரு பார்ச்சூன் கார் மட்டும் உள்ளது. இருவருக்கும் கடன் நிலுவை எதுவும் இல்லாத நிலையில், துரைமுருகன் ரூ.86 லட்சத்து 12 ஆயிரத்து 782 தொகையையும் சாந்தகுமாரி ரூ.1 கோடியே 22 லட்சத்து 10 ஆயிரம் தொகையையும் மற்ற நபர்களுக்கு கடன் கொடுத்துள்ளனர்.

துரைமுருகன் வசம் அசையும் சொத்துக்களின் மதிப்பு ரூ.2 கோடியே 30 லட்சத்து 72 ஆயிரத்து 415-ம், அசையா சொத்துக்களின் மதிப்பாக ரூ.7 கோடியே 28 லட்சத்து 68 ஆயிரத்து 755 என மொத்தம் 9 கோடியே 59 லட்சத்து 41 ஆயிரத்து 170 உள்ளது. இவரது மனைவி சாந்தகுமாரி வசம் அசையும் மற்றும் அசையா சொத்தின் மதிப்பு ரூ.20 கோடியே 2 லட்சத்து 50 ஆயிரத்து 712 உள்ளது. இருவர் வசமும் மொத்தம் ரூ.29 கோடியே 61 லட்சத்து 91 ஆயிரத்து 882 உள்ளது.

துரைமுருகன் மீது 8 கிரிமினல் வழக்குகள் நிலுவையில் உள்ளன. இதில், 6 வழக்குகள் ஆர்ப்பாட்டம் மற்றும் சாலை மறியல் தொடர் பானதாகவும், 2 வழக்குகள் லஞ்ச ஒழிப்பு காவல் துறையால் வரு மானத்துக்கு அதிகமாக சொத்து சேர்த்த இரண்டு வழக்குகள் நிலுவையில் உள்ளன. கடந்த 2016-ம் ஆண்டு காட்பாடி தொகுதியில் போட்டியிட்டபோது துரைமுருகன் தாக்கல் செய்துள்ள உறுதிமொழி பத்திரத்தின்படி அவர் மற்றும் அவரது மனைவி சாந்தகுமாரி வசம் அசையும் மற்றும் அசையா சொத்துக்களின் மதிப்பு மொத்தம் ரூ.29 கோடியே 78 லட்சத்து 80 ஆயிரத்து 701 இருந்தது குறிப்பிடத்தக்கது.

கடந்த 2016-ம் ஆண்டில் துரைமுருகன் வசம் அசையும் சொத்துக்களின் மதிப்பு ரூ.57 லட்சத்து 8 ஆயிரத்து 425 ஆக இருந்தது. தற்போது, அது ரூ.2 கோடியே 30 லட்சத்து 72 ஆயிரத்து 415 ஆக அதிகரித்துள்ளது.

திமுக பொதுச் செயலாளர் துரை முருகனுக்கு முகநூல், அவரது பெயரில் தனி இணையதளம், டிவிட்டர் தளம், இன்ஸ்டாகிராம், யூடியூப் பக்கங்களில் தனி முகவரி உள்ளதாக குறிப்பிட்டுள்ளார்.