உங்கள் தொகுதியில் ஸ்டாலின் - 2ஆம் கட்டச் சுற்றுப்பயணம்: திமுக அறிவிப்பு

"உங்கள் தொகுதியில் ஸ்டாலின்" என்ற பெயரில் திமுக தலைவர் மு.க.ஸ்டாலின் மேற்கொள்ளும் 2ஆம் கட்டச் சுற்றுப்பயண விவரங்கள் குறித்து அறிவிப்பு வெளியாகியுள்ளது.

திமுகவின் இன்றைய செய்தி வெளியீடு:

''பிப்.4-ம் தேதி 2-ம் கட்டச் சுற்றுப்பயணத்தை மு.க.ஸ்டாலின் தொடங்குகிறார். ராமநாதபுரம் மாவட்டம் தெளிச்சாத்தநல்லூர் ஊராட்சியில் மதியம் 1 மணிக்குப் பேசுகிறார்.

மறுநாள் 5-ம் தேதி காலை 8 மணிக்கு தூத்துக்குடி வடக்கு மாவட்டத்துக்கு உட்பட்ட கோவில்பட்டி, எட்டயபுரம் ரோடு கலைஞர் திடலில் பேசுகிறார். மதியம் 1 மணிக்கு தூத்துக்குடி தெற்கு மாவட்டத்துக்கு உட்பட்ட, ஸ்ரீவைகுண்டம் நட்டாச்சி ஊராட்சி, பட்டாண்டிவிளையில் நடைபெறும் கூட்டத்தில் ஸ்டாலின் பேசுகிறார்.

அதேபோல 6-ம் தேதி காலை 8 மணிக்கு, கன்னியாகுமரி கிழக்கு மற்றும் மேற்கு மாவட்டங்களுக்கு உட்பட்ட நாகர்கோவில் ஸ்காட் கிறிஸ்டியன் கல்லூரி மைதானத்தில் நடைபெறும் கூட்டத்திலும், மதியம் 1 மணிக்கு அம்பாசமுத்திரம் வீரவநல்லூர் பேரூராட்சிப் பகுதியிலும் ஸ்டாலின் பங்கேற்றுப் பேசுகிறார்.

மேலும் பிப்ரவரி 7-ம் தேதி காலை 8 மணிக்கு தென்காசி வடக்கு மற்றும் தெற்கு மாவட்டங்களுக்கு உட்பட்ட, சங்கரன்கோவில் அண்ணா திடலிலும், மதியம் 1 மணிக்கு விருதுநகர் பட்டம்புதூர் ஊராட்சியில் நடைபெறும் நிகழ்ச்சியிலும் ஸ்டாலின் பேசுகிறார்.

2-ம் கட்டச் சுற்றுப்பயணத்தின் இறுதியாக 8-ம் தேதி மதியம் 1 மணிக்கு, சிவகங்கை மாவட்டத்துக்கு உட்பட்ட திருப்பத்தூர், கே.வைரம்பட்டி ஊராட்சியில் நடைபெறும் நிகழ்சியில் கலந்துகொண்டு தனது பிரச்சாரத்தை ஸ்டாலின் நிறைவு செய்கிறார்''.

இவ்வாறு திமுக தெரிவித்துள்ளது.