துர்க்கை அம்மன் உற்சவத்துடன் கார்த்திகை தீபத் திருவிழா தி.மலையில் தொடங்கியது

திருவண்ணாமலை அண்ணாமலையார் கோயிலில் துர்க்கை அம்மன் உற்சவத்துடன் கார்த்திகை தீபத் திருவிழா நேற்று தொடங்கியது.

இதையொட்டி, துர்க்கை அம்மனுக்கு சிறப்பு அபிஷேகம் மற்றும் மகா தீபாராதனை நடைபெற்றது. இதேபோல், உற்சவருக்கும் நடைபெற்றது. தங்கக் கொடி மரத்தில் வரும் 20-ம் தேதி கொடியேற்றம் நடைபெற உள்ளது. அதன் பின்னர் 10 நாள் உற்சவம் நடைபெறுகிறது. வரும் 29-ம் தேதி பரணி தீபமும், மகா தீபமும் ஏற்றப்பட உள்ளது.

ஆன்லைனில் முன்பதிவு

கார்த்திகை தீபத் திருவிழா தொடங்கியுள்ளதால், சுவாமி தரிசனத்துக்கு ஆன்லைனில் முன்பதிவு செய்து அனுமதி பெறும் நடைமுறை அமலுக்கு வந்துள்ளது. நேற்று (17-ம் தேதி) முதல், விழா நடைபெறும் 17 நாட்களுக்கு 5 ஆயிரம் பக்தர்களுக்கு தரிசனம் செய்ய அனுமதி வழங்கப்படுகிறது. தீபத் திருவிழா நடைபெறும் 29-ம் தேதி பக்தர்களுக்கு அனுமதி இல்லை. www.arunachaleswarartemple.thhrce.in என்ற இணையதளத்தில் முன்பதிவு செய்துகொள்ள வேண்டும் என கோயில் நிர்வாகம் அறிவித்துள்ளது.