தேர்தல் நேர அரசியல் பேரத்திற்காக வன்னியர் இட ஒதுக்கீடு போராட்டமா?- ராமதாஸ் விளக்கம்

தேர்தல் நேரம் என்பதால் அரசியல் பேர வலிமையை அதிகரித்துக் கொள்வதற்காக ராமதாஸ் இட ஒதுக்கீட்டுப் போராட்டத்தைக் கையில் எடுத்திருக்கிறார், மற்ற சமூகத்தினருக்கு இது பாதிக்காதா என்பது போன்ற அர்த்தமற்ற அனத்தல்கள் புறக்கணிக்கப்பட வேண்டியவை என பாமக நிறுவனர் ராமதாஸ் தெரிவித்துள்ளார்.

22-ம் தேதி கூடும் பாமக பொதுக்குழு குறித்து பாமக நிறுவனர் ராமதாஸ் தொண்டர்களுக்கு எழுதியுள்ள கடித விவரம் வருமாறு:

“என் உயிரினும் மேலான பாட்டாளி சொந்தங்களே!

நாம் ஒரு புதிய வேள்வியைத் தொடங்கியிருக்கிறோம். தமிழ்நாட்டில் கல்வி மற்றும் வேலைவாய்ப்பில் தமிழகத்தின் பெரும்பான்மை சமுதாயமான வன்னியர்களுக்கு 20 விழுக்காடு தனி இட ஒதுக்கீட்டை வென்றெடுக்க வேண்டும் என்பது தான் நாம் நடத்தவிருக்கும் அந்த வேள்வியாகும்.

20% தனி இட ஒதுக்கீடு போராட்டத்திற்கு பாட்டாளிகள், தாய்மார்கள், இளைஞர்கள், மாணவர்கள் என அனைத்துத் தரப்பினரும் தயாராக வேண்டும் என்று சில நாட்களுக்கு முன் நான் விடுத்த அழைப்புக்கு பாட்டாளிகளிடம் கிடைத்துள்ள வரலாறு காணாத வரவேற்பே நமது கோரிக்கையில் நியாயமிருப்பதை நிரூபித்திருக்கிறது.

20% இட ஒதுக்கீட்டுப் போராட்டத்தை அறவழியில் எவ்வாறு நடத்துவது? எந்த தேதியில் நடத்துவது? என்பது குறித்து விவாதித்து முடிவெடுப்பதற்காக பாட்டாளி மக்கள் கட்சி, வன்னியர் சங்கம் ஆகிய அமைப்புகளில் கூட்டுப் பொதுக்குழு வரும் நவம்பர் மாதம் 22-ம் தேதி ஞாயிற்றுக்கிழமை காலை 11.00 மணிக்கு இணைய வழியில் நடைபெறும் என்று அறிவிக்கப்பட்டிருக்கிறது.

பொதுக்குழுவுக்கு இன்னும் 20 நாட்கள் இருக்கின்றன. இடைப்பட்ட காலத்தில் 20% இட ஒதுக்கீட்டுக் கோரிக்கைக்கான போராட்டத்தை எவ்வாறு நடத்தலாம் என்பது குறித்து சிந்தியுங்கள். உங்களின் நல் யோசனைகளை பொதுக்குழுக் கூட்டத்தில் தெரிவியுங்கள். நாம் அனைவரும் ஒரு மனதாக முடிவு செய்யும் போராட்ட வடிவத்தை அறிவித்து, அறவழியில் செயல்படுத்துவோம். உங்களின் விருப்பத்தை, உங்களின் முடிவை நிறைவேற்றுவது தானே எனது கடமை. அதற்காகத் தானே இந்த 82 வயதிலும் உழைத்து வருகிறேன்.

வன்னியர்களுக்கு 20% தனி இட ஒதுக்கீடு கோரும் போராட்டம் குறித்த முன்னோட்ட அறிவிப்பை நான் வெளியிட்டவுடன், அதற்கு எதிராக பொதுத்தளத்தில் எழுந்த சில முணுமுணுப்புகளும் எனது காதுகளில் விழாமல் இல்லை.

* சமூகநீதித் தலைவராக போற்றப்படும் ராமதாஸ் அவரது சொந்த சாதிக்கு மட்டும் இட ஒதுக்கீடு கோரி போராடலாமா?

* ஒரு சாதிக்கு மட்டும் 20% இட ஒதுக்கீடு கோருவது ஓவர் இல்லையா?

* தேர்தல் நேரம் என்பதால் அரசியல் பேர வலிமையை அதிகரித்துக் கொள்வதற்காக ராமதாஸ் இட ஒதுக்கீட்டுப் போராட்டத்தைக் கையில் எடுத்திருக்கிறார்.

* வன்னியர்களுக்கு மட்டும் இட ஒதுக்கீடு வழங்கினால் மற்ற சமுதாயங்கள் பாதிக்கப்படாதா?

அர்த்தமற்ற அனத்தல்கள், வெளிப்படையாக பேசத் தகுதியில்லாமல் காதுகளுக்குள் ஓதப்படும் கிசுகிசுக்கள் ஆகியவற்றுக்கு என்ன மரியாதை கொடுப்போமோ, அதை விட குறைவான மரியாதை கொடுத்து புறக்கணிக்கப்பட வேண்டியவை தான் இந்த அவதூறுகள்.

பாட்டாளிகளின் போராட்டம் எப்போதும் யாருக்கும் எதிராக அமைந்தவை அல்ல. மாறாக, அனைவரின் நலனுக்காக நடத்தப்படுபவை தான் என்பது சமூகநீதி வரலாறு அறிந்தவர்கள் அனைவருக்கும் தெரியும்.

வழக்கமாக தமிழ்நாட்டில் சாதி சங்கங்கள் குறிப்பிட்ட சாதியின் நலனுக்காக போராடுவதற்கு மட்டும் தான் தொடங்கப்படும். ஆனால், வன்னியர் சங்கம் அப்படிப்பட்டதல்ல. 40 ஆண்டுகளுக்கு முன் 20.07.1980 -ல் வன்னியர் சங்கம் தொடங்கப்பட்ட போது நிறைவேற்றப்பட்ட முதல் தீர்மானம் வன்னியர்களுக்கு தனி இட ஒதுக்கீடு கோருவதல்ல. மாறாக, தமிழ்நாட்டில் சாதிவாரி மக்கள்தொகை கணக்கெடுப்பு நடத்தப்பட்டு, அதனடிப்படையில் அனைத்து சமுதாயங்களுக்கும் இட ஒதுக்கீடு வழங்கப் பட வேண்டும் என்பது தான்.

இரண்டாவதாகத் தான் வன்னியர்களுக்கு தமிழக அளவில் 20%, தேசிய அளவில் 2% இட ஒதுக்கீடு கோரும் தீர்மானம் நிறைவேற்றப்பட்டது. மூன்றாவதாக நிறைவேற்றப்பட்ட தீர்மானம் தாழ்த்தப்பட்டவர்களுக்கான இட ஒதுக்கீட்டை 18 விழுக்காட்டிலிருந்து மக்கள்தொகைக்கு இணையாக 22 விழுக்காடாக உயர்த்த வேண்டும் என்பதாகும். சமூகநீதி அனைவருக்கும் சம அளவில் வழங்கப்பட வேண்டும் என்பது தான் நமது கொள்கை என்பதற்கு இதை விட சிறந்த உதாரணம் தேவையில்லை.

இன்னும் கேட்டால் தமிழகத்தில் சமூக, கல்வி, பொருளாதார நிலையில் மிக, மிக பின்தங்கிய நிலையில் இருந்த இஸ்லாமியர்களுக்கும், அருந்ததியர்களுக்கும் போராடி உள் ஒதுக்கீடு பெற்றுக் கொடுத்தது பாட்டாளி மக்கள் கட்சி தான் என்பதை அந்த சமுதாயத் தலைவர்கள் நன்கு அறிவார்கள்.

அதெல்லாம் சரி, வன்னியர்களுக்கு 20% தனி இட ஒதுக்கீடு கோருவதும், அதற்காக அறவழியில் போராட்டம் நடத்துவதும் அவ்வளவு பாவமா?

* தமிழ்நாட்டின் முன்னேற்றத்திற்கான உழைப்பைப் பெருமளவில் வழங்குபவர்கள் வன்னியர்கள்.

* தமிழக மக்களுக்கான உணவை அதிக அளவில் உற்பத்திச் செய்பவர்கள் வன்னியர்கள்.

* தேர்தல்களில் அதிக அளவில் வாக்களித்து ஆட்சியாளர்களை தேர்ந்தெடுப்பவர்கள் வன்னியர்கள்.

ஆனால், சமூக, கல்வி நிலையில் அவர்கள் எத்தகைய மோசமான நிலையில் இருக்கிறார்கள் தெரியுமா?

* அரசு மற்றும் பொதுத்துறை நிறுவன வேலைவாய்ப்புகளில் வன்னியர்களின் பிரதிநிதித்துவம் வெறும் 7 முதல் 8 விழுக்காடு தான். அதிகபட்சமாக நான்காம் தொகுதி பணிகளில் 9% வரை உள்ளனர்.
* இரண்டாம் தொகுதி பணியாளர்களில் வன்னியர்களின் பிரதிநிதித்துவம் 6 விழுக்காடு தான்.

* முதல் தொகுதி பணியாளர்களில் வன்னியர்களின் பிரதிநிதித்துவம் 2 & 3 விழுக்காடு தான்

* மருத்துவக் கல்லூரி மாணவர் சேர்க்கையில் வன்னியர் இன மாணவர்களுக்கு கிடைக்கும் இடங்கள் சராசரியாக 5 விழுக்காடு தான்.

தமிழகத்தின் ஒட்டுமொத்த மக்கள்தொகையில் வன்னியர்கள் 25 விழுக்காட்டுக்கும் கூடுதலாக உள்ளனர். ஆனால், கல்வியிலும், வேலைவாய்ப்பிலும் அவர்களுக்கான பிரதிநிதித்துவம் 8 விழுக்காட்டைத் தாண்டவில்லை. மிகவும் பிற்படுத்தப்பட்ட வகுப்பினருக்கான இட ஒதுக்கீடு நடைமுறைப்படுத்தப்பட்டு 31 ஆண்டுகள் நிறைவடைந்த பிறகும் கல்வி & வேலைவாய்ப்பில் வன்னியர்களுக்கான பிரதிநிதித்துவம் சொல்லிக்கொள்ளும்படி அதிகரிக்கவில்லை என்றால், அந்த இட ஒதுக்கீட்டு முறை சரியாக வகுக்கப் படவில்லை.

தோல்வியடைந்து விட்டது என்று தானே பொருள். அதை சரி செய்யும்படி கேட்கிறோம். அதில் என்ன தவறு? தமிழ்நாட்டின் முன்னேற்றத்திற்காக உழைக்கும் வன்னியர் சமுதாயம் அதன் வளர்ச்சிக்காக, அதன் உரிமைகளைக் கேட்டு குரல் கொடுப்பது எப்படித் தவறாகும்?

தமிழ்நாட்டில் சில சமுதாயங்கள் அவர்களின் மக்கள்தொகை அளவை விட 4 மடங்குக்கும் கூடுதலான பிரதிநிதித்துவத்தை கல்வியிலும், வேலைவாய்ப்பிலும் பெற்றுள்ளன. வேறு சில சமுதாயங்களில் கல்வி மற்றும் வேலைவாய்ப்பில் நியாயமாக கிடைக்க வேண்டிய பிரதிநிதித்துவத்தில் நான்கில் ஒரு பங்கு கூட கிடைக்காமல் பரிதாபமான நிலையில் உள்ளன. இந்த சமூக அநீதி களையப்பட வேண்டும்; அனைவருக்கும் சமூகநீதி கிடைக்க வேண்டும் என்பது தான் பாட்டாளி மக்கள் கட்சியின் நோக்கம்.

தமிழக அரசின் அரசியல் சட்ட அமைப்புகளிலும், சட்டப்பூர்வ அமைப்புகளிலும், பல்கலைக்கழகங்களிலும் வன்னியர்களுக்கு எந்த அளவுக்கு துரோகம் இழைக்கப்பட்டிருக்கிறது என்பதற்கு சில புள்ளி விவரங்களை இங்கு குறிப்பிட்டாக வேண்டும்.

* தமிழ்நாட்டில் ஆளுனரை வேந்தராகக் கொண்டு மொத்தம் 21 பல்கலைக்கழகங்கள், முதலமைச்சரை வேந்தராகக் கொண்டு ஒரு பல்கலைக்கழகம் என மொத்தம் 22 பல்கலைக்கழகங்கள் உள்ளன. ஆனால், அந்த 22 பல்கலைக்கழகங்களின் துணைவேந்தர்களில் ஒருவர் கூட வன்னியர் இல்லை.

* தமிழ்நாடு அரசுப் பணியாளர் தேர்வாணையத்தில் 15 உறுப்பினர் பதவிகள் உள்ளன. ஆனால், கடந்த 5 ஆண்டுகளாக அவற்றில் ஓர் உறுப்பினர் கூட வன்னியர் இல்லை.

* தமிழ்நாட்டில் மகளிர் ஆணையம், குழந்தைகள் பாதுகாப்பு ஆணையம் என ஏராளமான சட்டப்பூர்வ அமைப்புகள் உள்ளன. அவற்றின் தலைவர் பதவியிலோ, உறுப்பினர் பதவிகளிலோ வன்னியர்கள் ஒருவர் கூட நியமிக்கப்படவில்லை.

* வன்னியர் சமுதாயத்தைச் சேர்ந்த ஒரு வழக்கறிஞர் கூட சென்னை உயர்நீதிமன்றம் உள்ளிட்ட உயர்நீதிமன்றங்களின் தலைமை நீதிபதியாகவோ, உச்சநீதிமன்ற நீதிபதியாகவோ நியமிக்கப் பட்டதில்லை.

பல்கலைக்கழக துணைவேந்தர், உயர்நீதிமன்ற தலைமை நீதிபதி உள்ளிட்ட பணிகளுக்கு தகுதியான பலர் வன்னியர் சமுதாயத்தில் இருந்தும் கூட, அவர்கள் திட்டமிட்டு புறக்கணிக்கப்படுகிறார்கள். இது தான் மிக மோசமான சமூகஅநீதி ஆகும். இந்த சமூக அநீதிக்கு எதிராகத் தான் போராடியாக வேண்டும்.

வன்னியர் சமுதாயத்திற்கு எதிராக இவ்வாறு துரோகம் இழைக்கப்பட்டது ஒருபுறமிருக்க, மற்றொரு பக்கம் இந்திய ஆட்சிப் பணி (ஐ.ஏ.எஸ்), இந்தியக் காவல் பணி ( ஐ.பி.எஸ்) ஆகிய பணிகளுக்கு குறிப்பிடத்தக்க அளவில் தேர்ச்சி பெற முடியாத அளவுக்கு வன்னியர் சமுதாயம் மிகவும் பின்தங்கி இருக்கிறது.

* தமிழ்நாட்டில் செயலாளர் நிலையில் நூற்றுக்கும் மேற்பட்ட இந்திய ஆட்சிப் பணி அதிகாரிகள் உள்ளனர். ஆனால், இன்றைய நிலையில் செயலாளர் நிலையிலான அதிகாரிகளில் ஒருவர் கூட வன்னியர் கிடையாது.

* இந்தியா விடுதலையடைந்து 74 ஆண்டுகள் ஆகி விட்ட நிலையில், தமிழ்நாட்டில் இருந்து தமிழ்நாடு பிரிவுக்கு நேரடி ஐ.ஏ.எஸ். அதிகாரியாக ஒரே ஒரு வன்னியர் கூட தேர்ச்சியாகவில்லை. சுதந்திர இந்தியாவில் முதன்முறையாக நடப்பாண்டில் தான் வன்னியர் சமுதாயத்தைச் சேர்ந்த ஒருவர் தமிழ்நாடு பிரிவு ஐ.ஏ.எஸ். அதிகாரியாக முதன்முறையாக தேர்ந்தெடுக்கப்பட்டிருக்கிறார்.

* தமிழ்நாட்டில் ஐபிஎஸ் பணியிடங்களில் ஐ.ஜி. நிலைக்கு மேல் உள்ள பதவிகளில் ஒருவர் கூட வன்னியர்கள் இல்லை என்பது தான் கசப்பான உண்மையாகும்.

* தமிழக காவல்துறையின் சட்டம் & ஒழுங்குப் பிரிவு டிஜிபியாக இதுவரை வன்னியர் சமுதாயத்தைச் சேர்ந்த ஒருவர் மட்டும் தான் பணியாற்றியுள்ளார். தமிழக காவல்துறையில் இதுவரை ஐ.ஜி நிலைக்கும் கூடுதலாக உயர்ந்த வன்னிய சமுதாய அதிகாரிகளின் எண்ணிக்கை 5 பேர் மட்டும் தான்.

அந்த வகையில் வன்னியர்களுக்கு காலம் காலமாக இழைக்கப்பட்டு சமூக அநீதியைப் போக்கி, சமூகநீதியை நிலை நிறுத்த வேண்டும் என்பதற்காகத் தான் நாம் அறப்போராட்டத்திற்கு அழைப்பு விடுத்திருக்கிறோம். இது நமது உரிமை. இதை வென்றெடுக்க வேண்டியது நமது கடமை. எனவே. எதைப் பற்றியும் கவலைப்படாமல் நமக்கு தனி இடஒதுக்கீடு என்ற இலக்கை நோக்கி பயணிப்போம்.

வன்னியர்களுக்கு தனி இட ஒதுக்கீடு கோரும் போராட்டம் குறித்து விவாதிப்பதற்காக நவம்பர் 22-ம் தேதி தான் பாட்டாளி மக்கள் கட்சி மற்றும் வன்னியர் சங்கத்தின் கூட்டுப் பொதுக்குழு கூட்டம் நடைபெறவிருக்க்கிறது. எனவே, போராட்டம் குறித்த விவகாரங்களில் நவம்பர் 22-ம் தேதிக்கு பிறகு கவனம் செலுத்துவோம் என்ற எண்ணம் வேண்டாம்.

போராட்டத்தை எந்த வடிவத்தில், எந்த தேதியில் எவ்வாறு நடத்துவது என்பது குறித்து விவாதிப்பதற்காகத் தான் பொதுக்குழுக் கூட்டம் 22&ஆம் தேதி கூட்டப்பட்டிருக்கிறது. மற்றபடி வன்னியர்களுக்கு 20% தனி இடஒதுக்கீடு வழங்க வலியுறுத்தி அறப்போராட்டம் என்பது ஏற்கனவே முடிவு செய்யப்பட்டு விட்ட ஒன்று தான்.

எனவே, பாட்டாளி மக்கள் கட்சியினரும், வன்னியர் சங்கத்தினரும் கிராமங்களுக்குச் சென்று பாட்டாளி மக்களை சந்தியுங்கள். அவர்களுக்கு இழைக்கப்பட்டு வரும் சமூக அநீதிகள் குறித்தும், அவற்றை முடிவுக்குக் கொண்டு வருவதற்கான தேவை குறித்தும், அதற்காக நடத்தப்படவுள்ள அறப்போராட்டம் குறித்தும் விளக்கிக் கூறி விழிப்புணர்வை ஏற்படுத்துங்கள்.

ஏற்கனவே, நான் கூறியவாறு வன்னியர்கள் தனி இட ஒதுக்கீட்டுக்காக இப்போது நாம் நடத்தவிருக்கும் போராட்டம் வரலாறு காணாத வகையில் அமையும். போராட்டத்தின் போதே, ‘’ போராட்டத்தைக் கைவிட்டு வாருங்கள், வன்னியர்கள் தனி இடஒதுக்கீட்டுக்கான உடன்பாட்டில் கையெழுத்திடுங்கள்” என்று அரசு நமக்கு அழைப்பு விடுக்கும் வகையில் இந்தப் போராட்டம் மிகத்தீவிரமாக, அதேநேரத்தில் அறவழியில் அமைய வேண்டும் என்பதை நினைவில் நிறுத்தி, போராட்டத்திற்கான ஆயத்தப்பணிகளை செய்யும்படி கேட்டுக்கொள்கிறேன்.

போராட்டத்திற்காக நீங்கள் செய்துள்ள ஆயத்தப்பணிகள் குறித்து அறிந்து கொள்ளவும், 20% இட ஒதுக்கீட்டுப் போராட்டத்தை எவ்வாறு, எப்போது நடத்துவது என்பது குறித்தும் உங்கள் அனைவருடனும் விவாதித்து முடிவு எடுப்பதற்காக நவம்பர் 22-ம் தேதி கூட்டுப் பொதுக்குழு கூட்டம் நடைபெறும் தருணத்தை எதிர்நோக்கி நான் காத்திருக்கிறேன்”.

இவ்வாறு ராமதாஸ் தெரிவித்துள்ளார்.