பெரியார் பிறந்த நாள்: மானுட சமுதாயத்திற்கு பகுத்தறிவும் சுயமரியாதையும் கற்பித்த அறிவாசான்; ஸ்டாலின் புகழஞ்சலி

பெரியாரின் 142-வது பிறந்த நாளை முன்னிட்டு, சென்னை, அண்ணா சாலையில் அமைந்துள்ள அவரது திருவுருவச் சிலைக்கு திமுக தலைவர் மு.க.ஸ்டாலின் மாலை அணிவித்து மரியாதை செலுத்தினார். பெரியார் ஊட்டிய சமூகநீதி - சமத்துவம் - சாதியொழிப்பு - பெண்ணுரிமை போன்ற தத்துவங்களுக்காக நம்மை ஒப்படைத்துக் கொள்வோம் என, ஸ்டாலின் தெரிவித்துள்ளார்.

திமுக தலைவரும் சட்டப்பேரவை எதிர்க்கட்சி தலைவருமான மு.க.ஸ்டாலின் இன்று (செப், 17), பெரியாரின் 142-வது பிறந்த நாளை முன்னிட்டு, சென்னை, அண்ணா சாலையில் அமைந்துள்ள அவரது திருவுருவச் சிலைக்கு மாலை அணிவித்து மரியாதைச் செலுத்தினார்.

அதன்பின்னர், திமுக தலைவர் மு.க.ஸ்டாலின் தன் முகநூல் பக்கத்தில் பதிவிட்டதாவது:

"மானுட சமுதாயத்திற்கு பகுத்தறிவும் சுயமரியாதையும் கற்பித்த அறிவாசான் தந்தை பெரியாரின் பிறந்தநாள் செப்டம்பர்–17!

பெரியார் ஊட்டிய சமூகநீதி - சமத்துவம் - சாதியொழிப்பு - பெண்ணுரிமை போன்ற தத்துவங்களுக்காக நம்மை ஒப்படைத்துக் கொள்வோம்!

மானமும் அறிவும் உள்ள சமுதாயம் அமைப்போம்!

தந்தை பெரியார் வாழ்க! சுயமரியாதைச் சுடர் வெல்க!”

இவ்வாறு மு.க.ஸ்டாலின் தெரிவித்துள்ளார்.