சென்னையில் கொளுத்தும் வெயில்

தென்மேற்கு பருவமழை தொடங்கி தமிழகத்தில் பரவலாக மழை பெய்து வந்தாலும், சென்னையில் சில நாட்களாக வெயில் கொளுத்தி வருகிறது.

சென்னையில் நேற்றும் நேற்று முன்தினமும் 39.6 டிகிரி வெயில் பதிவாகியுள்ளது. அதற்கு முன் செவ்வாய்க்கிழமை 36 டிகிரியும், திங்கள்கிழமை 39 டிகிரியும் வெயில் பதிவானது.

அதிக வெயில் காரணமாக முதியோர் மற்றும் குழந்தைகள் வீட்டுக்கு வெளியில் வருவதை தவிர்த்தனர். சாலைகளில் சென்ற பாதசாரிகள் குடைகளைக் கொண்டு தங்களை வெயிலிலிருந்து பாதுகாத்துக் கொண்டனர். மத்திய நேரத்தில் வீசிய அனல்காற்றால், பொதுமக்கள் மிகவும் அவதிப்பட்டனர். வாகன ஓட்டிகள் துணியால் முகத்தை மூடிக் கொண்டனர்.

சென்னையில் அதிகரித்து வரும் வெயில் மேலும் நான்கு நாட்களுக்கு நீடிக்கும் என்று சென்னை வானிலை ஆய்வு மையம் தெரிவித்துள்ளது. அதிகபட்ச வெப்ப நிலை 38 அல்லது 39 டிகிரியாக இருக்கும் என்றும் தெரிவிக்கப்பட்டுள்ளது.