தமிழகத்தில் 10-ம் வகுப்பு பொதுத்தேர்வு, கடந்த மார்ச் 19-ம் தேதி தொடங்கி ஏப்ரல் 10-ம் தேதி நிறைவடைந்தது. 10 லட்சத்து 72 ஆயிரம் மாணவ, மாணவிகள் தேர்வு எழுதியுள்ளனர். விடைத் தாள் திருத்தும் பணி கடந்த 20-ம் தேதி தொடங்கி, தொடர்ந்து நடந்து வருகிறது. தமிழகம் முழுவதும் 93 மையங்களில் 45 ஆயிரத்துக்கும் மேற்பட்ட ஆசிரியர்கள் இப்பணியில் ஈடுபட்டுள்ளனர்.
இதற்கிடையே, பிளஸ் 2 தேர்வு முடிவுகள் மே 7-ம் தேதியும், 10-ம் வகுப்பு முடிவுகள் மே 21-ம் தேதியும் வெளியிடப்படும் என்று அரசு தேர்வுகள் இயக்ககம் அதிகாரப்பூர்வமாக அறிவித்துள்ளது. 10-ம் வகுப்பு விடைத்தாள் மதிப்பீட்டுப் பணிகள் நிறைவடை யாத நிலையில், முடிவு வெளியாகும் தேதி முன்கூட்டியே அறிவிக்கப்பட்டதால் தேர்வெழுதிய மாணவர்களும், ஆசிரியர்களும் குறிப்பாக, விடைத்தாள் திருத்தும் பணியில் ஈடுபட்டுள்ள ஆசிரியர்கள் ஆச்சர்யம் அடைந்தனர்.
கணிதம், அறிவியல் பாட விடைத்தாள்களை திருத்தி முடித்த ஆசிரியர்கள், தங்களை ஆங்கில தேர்வுக்கான விடைத்தாள்களை திருத்துமாறு நிர்ப்பந்திப்பதாக புகார் தெரிவித்தனர். இதுகுறித்து பாதிக்கப்பட்ட ஆசிரியர்கள் ‘தி இந்து’விடம் கூறியதாவது:
கணிதம், அறிவியல் பாட ஆசிரியர்களை ஆங்கில தேர்வு விடைத்தாள்களை மதிப்பீடு செய்யுமாறு நிர்ப்பந்தம் செய்கின்றனர். வினாக்களுக்கான விடைக் குறிப்புகள் கொடுக்கப் பட்டாலும், சம்பந்தப்பட்ட பாட ஆசிரியர்கள் திருத்துவதுதான் சரியாக இருக் கும். தமிழ், ஆங்கிலம் ஆகிய மொழித்தாள் பாடங்களில் தலா 2 தாள்கள் இருப்பதால் அவற்றை திருத்துவதற்கு கூடுதல் நாட்கள் ஆகும்.
விடைத்தாள் மதிப்பீட்டு பணியே முடிவடையாத நிலையில், தேர்வு முடிவு மே 21-ம் தேதி வெளியாகும் என்று முன்கூட்டியே அறிவித்துவிட்டனர். எனவே, விடைத்தாள் மதிப்பீட்டு பணியை விரைவாக முடிக்க வேண்டும் என்பதற்காக வேறு பாட ஆசிரியர்களைக் கொண்டு ஆங்கிலத் தேர்வு விடைத்தாள் களை திருத்தச் சொல்கின்றனர். இது எந்த வகையில் நியாயம்?
விடைத்தாள் பணியை முடித்த கணிதம், அறிவியல் ஆசிரியர்களை பணியிலிருந்து விடுவிக்கவும் மறுக்கிறார்கள். இவ்வாறு ஆசிரியர்கள் கூறினர். வேறு பாட ஆசிரியர்களைக் கொண்டு ஆங்கிலத் தேர்வு விடைத் தாள்களை திருத்தம் செய்தால் மதிப்பீடு சரியாக இருக்குமா என்ற அச்சம் மாணவர்களிடையே எழுந்துள்ளது.