கருணாநிதி முதல்கட்ட பிரச்சாரம்: கோவையில் 5-ம் தேதி தொடங்குகிறார்

நாடாளுமன்றத் தேர்தலில் போட்டியிடும் ஜனநாயக முற்போக்கு கூட்டணி வேட்பாளர்களை ஆதரித்து திமுக தலைவர் கருணாநிதி வரும் 5-ம் தேதி கோவையில் தனது முதல்கட்ட பிரச்சாரத்தை தொடங்குகிறார்

இதுதொடர்பாக திமுக தலைமை அலுவலகம் புதன் கிழமை வெளியிட்ட செய்தியில் கூறியிருப்பதாவது:

திமுக தலைவர் கருணாநிதி, ஏப்ரல் 5-ம் தேதி காலை விமானம் மூலம் கோவை செல்கிறார். அன் றிரவு 7 மணிக்கு கோவை வ.உ.சி. மைதானத்தில் நடக்கும் பிரச்சார பொதுக்கூட்டத்தில் பங்கேற்கிறார்.

மறுநாள் (6-ம் தேதி) பிற்பகல் 3.15 மணிக்கு கோவை விமான நிலையம் அருகிலிருந்து புறப்பட்டு தெக்களூர், அவினாசி ஆகிய இடங்களில் வேனில் இருந்தபடியே பிரச்சாரம் செய்கிறார். மாலை 5 மணிக்கு திருப்பூர் பொதுக் கூட்டத்தில் பேசுகிறார். பின்னர் பெருமாநல்லூர், பெருந்துறை ஆகிய இடங்களில் பிரச்சாரம் மேற்கொண்டுவிட்டு, இரவு 7.45 மணிக்கு ஈரோட்டில் நடக்கும் பொதுக்கூட்டத்தில் கலந்து கொள்கிறார்.

7-ம் தேதி மாலை 5 மணியிலிருந்து பள்ளிப்பாளையம், சங்ககிரி ஆகிய இடங்களில் வேனில் இருந்தபடி பிரச்சாரம் செய்கிறார். அன்றிரவு 7.25 மணிக்கு சேலம் போஸ் மைதானத்தில் நடக்கும் பொதுக்கூட்டத்தில் பேசுகிறார். கூட்டம் முடிந்ததும் இரவு ரயில் மூலம் சென்னை திரும்புகிறார். இவ்வாறு அந்தச் செய்தியில் கூறப்பட்டுள்ளது.