அதிமுக இளைஞர் பாசறையில் மாணவ –மாணவிகள் சேர்க்க வேண்டும்: விருதுநகர் ஆலோசனைக் கூட்டத்தில் அறிவுறுத்தல்

தமிழக அரசு வழங்கிய லேப் டாப், சைக்கிள் உள்ளிட்ட சலுகைகளை பெற்ற மாணவ - மாணவிகளை இளைஞர் - இளம்பெண்கள் பாசறையில் சேர்க்க அதிமுக புதிய திட்டம் வகுத்து வருகிறது.

விருதுநகரில் இளைஞர் - இளம் பெண்கள் பாசறையில் புதிய உறுப்பினர்களைச் சேர்ப்பதற்கான ஆலோசனைக் கூட்டம் பாசறையின் மாநிலச் செயலரும் எம்.பி-யுமான ப.குமார் தலைமையில் சனிக்கிழமை நடைபெற்றது. இந்தக் கூட்டத்தில் பேசிய குமார், ’’அம்மா அரசு மாணவ- மாணவிகளுக்கு 14 வகையான சலுகைகளை வழங்கி வருகிறது. இதுவரை 95 லட்சம் மாணவ- மாணவியருக்கு விலையில்லா சைக்கிள்களும், 22 லட்சத்து 66 ஆயிரம் பேருக்கு விலையில்லா மடிக்கணினிகளும் வழங்கப் பட்டுள்ளன. தாலிக்குத் தங்கம் திட்டத்தின்மூலம் இதுவரை 3 லட்சத்து 21 ஆயிரம் இளம்பெண்கள் பயனடைந்துள்ளனர். நமது அரசின் நலத் திட்டங்களால் அதிகம் பயனடைந்தது மாணவ - மாணவிகளும் இளைஞர்களும் தான். இதையெல்லாம் எடுத்துச் சொல்லி அந்த இளைஞர்கள் மற்றும் இளம் பெண்களை எல்லாம் பாசறையில் உறுப்பினராக்க வேண்டும். இந்தமுறை முதல் முறையாக வாக்களிக்க இருக்கும் இளைஞர்கள் - இளம் பெண்கள் வாக்குகளை நாம் பெறவேண்டும்’’ என்றார். கூட்டத்தைத் தொடர்ந்து, ஒவ்வொரு பகுதியிலும் இதுவரை எத்தனை மாணவ- மாணவிகள், இளைஞர்கள் அரசின் நலத்திட்ட உதவிகளைப் பெற்றுள்ளனர் என்ற பட்டியலைச் சேகரித்து வீடுவீடாகச் சென்று அவர்களை பாசறையில் உறுப்பினர்களாக சேர்க்கும்படியும் அதன் விவரங்களை தலைமைக்கு அனுப்பிவைக்கும்படியும் தனிப்பட்ட முறையில் பாசறை நிர்வாகிகளுக்கு அறிவுறுத்தப் பட்டது.