மண்ணின் மைந்தருக்கே மணப்பாறை! - இப்போதே கொடிபிடிக்கும் உடன்பிறப்புகள்

மணப்பாறை தொகுதியை திமுக-வைச் சேர்ந்த மண்ணின் மைந்தருக்கே ஒதுக்க வேண்டும் என உடன்பிறப்புகள் இப்போதே திமுக தலைமைக்கு அழுத்தம் கொடுக்க ஆரம்பித்திருக்கிறார்கள். 2011-க்கு முன்பு வரை மணப்பாறை நகராட்சி, குளித்தலை சட்டமன்றத் தொகுதி​யுடன் இருந்தது. தொகுதி மறுசீரமைப்பின் போது, மருங்​காபுரி தொகுதி கலைக்​கப்​பட்டு மணப்பாறை புதிய தொகுதியாக உருவாக்​கப்​பட்டது.

சிறுபான்​மை​யினர் ஓட்டுகள் கணிசமாக இருந்தும் 2011-ல் முதல் தேர்தலில் மணப்பாறை தொகுதியை அதிமுக-வே கைப்பற்றியது. அடுத்து வந்த தேர்தலிலும் அதிமுக எம்எல்​ஏ-வான சந்திரசேகரே மீண்டும் போட்டி​யிட்டு வாகை சூடினார். 2021-லும் அவரே மீண்டும் போட்டி​யிட்​டார். ஆனால், பெயர் கெட்டுக் கிடந்​ததால் ஹாட்ரிக் வெற்றியை அவரால் பெறமுடிய​வில்லை.

இந்த மூன்று தேர்தல்​களிலும் மணப்பாறை தொகுதியை கூட்டணிக் கட்சிக்கே ஒதுக்​கி​விட்டது திமுக. கூட்டணிக் கட்சிகளோ 3 முறையுமே தொகுதிக்கு தொடர்பே இல்லாத வெளியூர் வேட்பாளர்களை கொண்டு வந்து இங்கு நிறுத்தின. 2011-ல் காங்கிரஸ் சார்பில் சுப.சோ​முவும் 2016-ல் இந்திய யூனியன் முஸ்லிம் லீக் சார்பில் முகமது நிஜாமும் போட்டி​யிட்டு தோல்வியடைந்​தனர். 2021-ல் மனிதநேய மக்கள் கட்சியின் பொதுச்​செய​லாளர் செங்கல்​பட்டு மாவட்​டத்தைச் சேர்ந்த அப்துல்சமது உதயசூரியன் சின்னத்தில் போட்டி​யிட்டு வெற்றி பெற்றார்.

இப்படி மணப்பாறை தொகுதியை தொடர்ச்​சியாக கூட்டணிக் கட்சிகளுக்கே ஒதுக்கி வருவதால் மாவட்ட அமைச்சரான கே.என்​.நேரு மீது உள்ளூர் திமுக-​வினர் ஒருவிதமான அதிருப்​தியில் உள்ளனர். அதனால், இம்முறை திமுக-வைச் சேர்ந்த உள்ளூர் முகமே மணப்பாறையில் போட்டியிட வேண்டும் என கட்சித் தலைமைக்கு அவர்கள் அழுத்தம் கொடுக்க ஆரம்பித்​திருக்​கி​றார்கள்.

இதனிடையே, சிட்டிங் எம்எஎல்​ஏ-வான அப்துல்​சமது​வுக்கு எதிராக திமுக-வுக்​குள்ளேயே சிலர் உள்ளடி வேலைகளையும் பார்க்க ஆரம்பித்​திருக்​கி​றார்கள். இவர்கள், ‘எம்எல்ஏ அப்துல்​சமது, திமுக-​வினருக்கு எந்தக் காண்ட்​ராக்​டையும் கிடைக்​க​விடு​வ​தில்லை. இவரால் மற்ற கட்சி​யினர் தான் பலனடைகி​றார்கள்’ என திமுக தலைமைக்கு புகார்களை தட்டி​விட்டு வருகின்​றனர்.

ரேஷன் கடை பணியாளர் வேலை வாங்கித் தருவதாக கூறி அப்துல்சமது பேரைச் சொல்லி ஒரு நபர் கட்டுக்​கட்டாக பணம் வாங்கிய வீடியோ ஒன்று அண்மையில் வெளியாகி வைரலானது. அந்த நபர் மீது நடவடிக்கை எடுக்கக் கோரி அப்துல்சமது தரப்பில் வளநாடு போலீஸில் புகார் அளிக்​கப்​பட்டது. ‘எனது பெயரைச் சொல்லி ஏமாற்​று​பவர்களை யாரும் நம்ப வேண்டாம்’ என்று அப்துல் சமது அறிக்​கையும் வெளியிட்​டார். இதனிடையே, இந்த வீடியோ-வை லீக் பண்ணியதே திமுக-​வினர் தான் என்றும் பேச்சுக் கிளம்பி அடங்கியது.

இதுகுறித்து பேசிய அப்துல்சமது தரப்பினர், “பணம் வாங்கிய விவகாரத்தில் எம்எல்​ஏ-வுக்கு எந்தத் தொடர்பும் இல்லை. அவர் நேரடியாக திமுக-​வினருக்குத் தான் ஒப்பந்தப் பணிகளை வழங்கு​கி​றார். அவர்கள் தான் அதை மாற்றுக் கட்சி​யினருக்கு கைமாற்​றி​விட்டு காசு பார்க்​கின்​றனர். இதுதொடர்பாக ஆதராபூர்வமாக திருச்சி தெற்கு மாவட்டச் செயலா​ளரும் அமைச்​சருமான அன்பில் மகேஸிடம், எம்எல்ஏ விளக்கம் கொடுத்​துள்​ளார்” என்றனர்.

திமுக​வினரோ, “மணப்பாறை தொகுதியை திமுக-வுக்கு ஒதுக்​கி​னால், கனிமொழியின் நெருங்கிய தோழியான கவிஞர் சல்மா தொகுதியை கேட்டுப் பெற்று​விடு​வார். இதனால் தங்களுக்கான முக்கி​யத்​துவம் குறைந்து போகும் என நினைத்து சிலர் அதற்கு குறுக்கே நிற்கி​றார்கள். இதனாலேயே தொடர்ச்​சியாக இந்தத் தொகுதியை கூட்டணிக் கட்சிகளுக்கு தள்ளி​விட்டு வருகி​றார்கள்.

இந்த முறை மணப்பாறை தொகுதியில் திமுக போட்டியிட வேண்டும். அதுவும் மண்ணின் மைந்தருக்கு வாய்ப்​பளிக்க வேண்டும் என ஒன்றியச் செயலாளர் ராமசாமி, அவைத்​தலைவர் பன்னப்​பட்டி கோவிந்​த​ராஜ், பொருளாளர் குணசேகரன் உள்ளிட்டோர் அமைச்சர் அன்பில் மகேஸிடம் தொடர்ச்​சியாக வலியுறுத்தி வருகி​றார்கள். மணப்பாறையில் திமுக போட்டி​யிட்டால் தான் கட்சி​யினர் உற்சாக​மாகமடை​வார்கள்; கட்சியும் வளரும்” என்கி​றார்கள்.

இதுகுறித்து திமுக ஊடகப் பிரிவு இணைச்​செலாளர் கவிஞர் சல்மா​விடம் கேட்டதற்கு, “மணப்​பாறையை இந்த முறை கூட்ட​ணிக்கு ஒதுக்​காமல், திமுக-வே நேரடியாக களமிறங்க வேண்டும். அத்துடன் உள்ளூர் முகம் ஒருவரையே வேட்பாளராக நிறுத்த வேண்டும் என கட்சியின் முக்கிய நிர்வாகிகள் அமைச்சர் அன்பில் மகேஸிடம் வலியுறுத்தி உள்ளனர். அவரும் கட்சித் தலைமைக்கு தெரியப்​படுத்தி உரிய நடவடிக்கை எடுப்பதாக உறுதி அளித்​துள்​ளார்” என்றார். மணப்பாறையில் இம்முறை திமுக-வே போட்டியிடு​மா?