இபிஎஸ் போடும் கணக்கு எப்போதுமே தப்பாகாது! - உள் விவகாரங்களை உடைக்கும் ஆர்.பி.உதயகுமார் | சிறப்பு நேர்காணல்

கட்சித் தலைமையின் எண்ணமறிந்து, அதற்கேற்ப அதிரடியான கருத்துகளை பேசி அனைவரையும் திரும்பிப் பார்க்கவைப்பவர் முன்னாள் அமைச்சர் எதிர்க்கட்சி துணைத் தலைவர் ஆர்.பி.உதயகுமார். அண்மையில், உள்துறை அமைச்சர் அமித் ஷாவை ‘இரும்பு மனிதர்’ என்று சொன்னதன் மூலம் பாஜக-வினரையும் திகைக்க வைத்த உதயகுமாரிடம் ‘இந்து தமிழ் திசை’ நாளிதழுக்காக பேசியதிலிருந்து...

மக்களவைத் தேர்தலில், அதிமுக தோல்விக்கு என்ன காரணம் என நினைக்கிறீர்கள்?

தமிழ்​நாட்டின் உரிமைகளை பெறுவதற்கு தேசியக் கட்சி​களின் ஒத்துழைப்பு நமக்கு முழுமையாக கிடைக்​க​வில்லை. இந்த காரணத்தை முன்னிறுத்தி, அவர்களோடு கூட்டணி இல்லாமல் மக்களவைத் தேர்தலைச் சந்தித்​தோம். ஆனால், கால அவகாசம் குறைவாக இருந்​த​தால், இதனை முழுமையாக மக்களிடம் கொண்டு சேர்க்க முடிய​வில்லை. அதோடு, எங்களது கூட்ட​ணியின் பிரதமர் வேட்பாளர் யார் என்று அறிவிக்​காததும், பின்னடைவுக்குக் காரணமாக அமைந்து விட்டது.

பாஜக-வை விட்டு விலகினால், திமுக கூட்டணியில் இருக்கும் கட்சிகள் நம்மிடம் வரும் என்று பழனிசாமி போட்ட கணக்கு தப்பாகி விட்டதோ?

அவர் போடும் கணக்கு எப்போதுமே தப்பா​காது. உப்பு விற்க போகும்​போது, மழை பெய்தால் உப்பு கரைந்து விடும். அந்த சூழலில், மழை மீது தவறா, உப்பு வியாபாரி மீது தவறா என்று விவாதிக்க முடியாது. அதே போல், உமி விற்கும்போது காற்றடித்​தால், அதற்கு உமி மீதோ, காற்று மீதோ தவறு என்று கூற முடியாது. மழை பெய்யாமல், காற்றடிக்​காமல் இருந்​திருந்​தால், இந்த வியாபாரத்தில் வெற்றி பெற்று பெரிய சாதனை செய்திருக்​கலாம். இதனை காலச்​சூழ்நிலை தான் முடிவு செய்கிறது. இந்த வியூகத்தில் சில பாடங்​களைக் கற்றுக் கொள்கி​றோம். இது காலம் செய்த கோலமே தவிர வியூகத்தில் தவறு கிடையாது.

கட்சியில் இருந்து நீக்கப்பட்டவர்களை மீண்டும் சேர்க்க வேண்டும் என்ற குரல் நிர்வாகிகளிடம் இருந்து எழுவதாக செங்கோட்டையன் முன்பு சொல்லி இருந்தார். இப்போதும் அந்தக் குரல்கள் ஒலிக்கின்றனவா?

ஒரு குடும்​பத்தில் ஐந்து பேர் இருந்​தால், ஐந்து பார்வைகள் இருக்​கும். அதுபோல, கருத்​துகள் பலவாறு இருப்​பதும் உண்மை​தான். அதை மூடி மறைக்க வேண்டிய​தில்லை. அவரவர் கருத்​துகளை சொல்வதற்கு கட்சியில் சுதந்​திரம் கொடுக்​கப்​பட்​டுள்ளது. அதேசமயம், அதிமுக-வின் எதிர்​காலத்தை இபிஎஸ் இடம் தொண்டர்கள் ஒப்படைத்​திருக்​கி​றார்கள். அதனால், பொதுச்​செய​லாளர் எடுக்கும் முடிவுக்கு எல்லோரும் கட்டுப்​பட்​ட​வர்கள். எம்ஜிஆர், ஜெயலலி​தாவின் மறுவடிவமாக இருந்து இபிஎஸ் எங்களை வழி நடத்துகி​றார்​.

தனக்கு எதிராகச் செயல்பட்ட ஆர்.எம்.வீரப்பன், காளிமுத்து உள்ளிட்டவர்களை ஜெயலலிதாவே மீண்டும் கட்சியில் சேர்த்துக்கொண்டார். அவரின் மறுவடிவம் என்று நீங்கள் போற்றும் இபிஎஸ், அவரின் வழியில் செல்ல வேண்டும் என எதிர்பார்ப்பது நியாயம் தானே?

நீங்கள் சொன்ன பட்டியலில் உள்ள யாரும் தலைமை பதவிக்கு உரிமை கோரவில்லை. கடைக் கோடியில் இருக்கிற தொண்டரையும் நேரில் சந்தித்துப் பேசும் தன்மை கொண்டவராக இபிஎஸ் விளங்​கு​கி​றார். அப்படிப்​பட்டவர் ஒரு முடிவில் உறுதியாக இருக்​கிறார் என்றால், அதற்கு ஏதோ ஒரு காரணம் இருக்​கிறது. இதை எல்லோரும் புரிந்​திருக்​கி​றார்​கள்​.

எந்தத் தியாகத்துக்கும் தயார் என்று வெளிப்படையாக ஓபிஎஸ் சொன்ன பிறகும் அவரை ஏற்றுக்கொள்ள மறுப்பது சரிதானா?

தலைமைக் கழகத்தின் மீதான தாக்குதல் உள்ளிட்ட காரணங்​களுடன், இதற்கு இபிஎஸ் ஏற்கெனவே விளக்கம் அளித்து விட்டார். இருப்​பினும், இபிஎஸ் தலைமையில் அதிமுக-வுக்கு வெற்றி கிடைக்​க​வில்லை என்பதை மட்டும் அவர்கள் சொல்லி வருகின்​றனர். ஆனால், அதிமுக-வுக்கு தொடர்ந்து தோல்வி ஏற்படுத்த வேண்டும் என்று நினைத்​தவர்கள் யார்... செயல்​பட்​ட​வர்கள் யார்... அதற்கு உறுதுணையாக இருந்தது யார் என்பதெல்லாம் தொண்டர்​களுக்​கும், மக்களுக்கும் தெரியும். அதோடு, வெற்றி, தோல்வி மட்டுமே ஒரு இயக்கத்தின் வலிமையை வெளிப்​படுத்​தாது.

கடந்த காலங்களில் அதிமுக உட்கட்சி விவகாரங்களில் பாஜக தலையிட்டுள்ளதா?

பொதுவாக, பக்கத்து வீட்டுக்​காரர் நன்றாக இருக்க வேண்டும் என்று நினைப்பது ஒன்றும் தவறு இல்லையே. இது மனிதநே​யத்தின் அடிப்​படை​தானே. நம்மைச் சுற்றி இருக்கிற எல்லோரும், நன்றாக இருந்தால் தான், நாம் நன்றாக இருக்க முடியும் என்று நினைப்பது தவறில்​லையே. அந்த அர்த்​தத்தில் தான் இதனைப் பார்க்க வேண்டும்​.

ஓபிஎஸ், டிடிவி ஆகியோரின் பலத்தை உணர்ந்து தான் அவர்களுக்கு பாஜக முக்கியத்துவம் தருகிறதா?

​யாருக்கு யார் முக்கி​யத்​துவம் கொடுக்​கி​றார்கள் என்பது பற்றி பொருட்​படுத்த வேண்டிய​தில்லை. கூட்டணி விஷயத்தில் முடிவெடுக்க பொதுச்​செய​லா​ள​ருக்கு அதிகாரம் கொடுக்​கப்​பட்டு விட்டது. அதனால் அவர் எடுக்கும் முடிவு தான் இறுதி​யானது. இந்தச் சூழலில், ஆந்தி​ராவில் யாருடன் கூட்டணி வைக்கி​றார்கள், கர்நாட​காவில் யாருடன் கூட்டணி வைக்கி​றார்கள் என்று விவாதிக்க முடியாது.

இபிஸ் சந்தித்துவிட்டு வந்த பிறகு அமித் ஷாவை ‘இரும்பு மனிதர்’ என்று பாராட்டி இருக்கிறீர்களே..?

ஆளுங்​கட்​சியாக இருந்​தா​லும், எதிர்க்​கட்​சியாக இருந்​தா​லும், மக்கள் நலனுக்காக அதிமுக பாடுபடும் என்பதை இந்த சந்திப்பு நிரூபித்​துள்ளது. இந்த சந்திப்பு குறித்து பேசும்போது அமித் ஷாஜியை நான் இரும்பு மனிதர் என்று சொல்லி இருக்​கிறேன். பாஜக கூட்ட​ணியில் இருக்கும் போது, ராமநாத​புரத்தில் என் மண், என் மக்கள் யாத்திரை தொடக்க விழாவில், அமித் ஷாஜி முன்னிலை​யில், நான் அவரை இரும்பு மனிதர் என்று குறிப்​பிட்​டேன். அப்போது நீங்கள் அதை பிரசுரிக்​க​வில்லை. இன்றைக்கு அவரவர்கள் தேவைக்காக இதை பெரிது படுத்​துகி​றார்​கள்​.

2026-ல் தமிழகத்தில் தேசிய ஜனநாயக கூட்டணி ஆட்சி அமையும் என அமித் ஷா சொல்லியிருக்கிறாரே..?

இபிஎஸ் - அமித்ஷா சந்திப்பு மற்றும் கூட்டணி குறித்து இரு தலைவர்​களும் உரிய விளக்கம் அளித்​து​விட்​டனர். எனவே, அவர்கள் தெரிவித்த கருத்தை விவாத​மாக்கக் கூடாது. தமிழ்நாடு ஆபத்தில் இருக்​கிறது. அதனை மீட்க வேண்டும்​.

நீட், ஜிஎஸ்டி, மீனவர் பிரச்சினை உள்ளிட்ட பல்வேறு விஷயங்களில் பாஜக மீது தமிழக மக்களுக்கு கோபம் இருக்கிறதா?

உங்களுக்குத் தெரியாததா, எனக்குத் தெரியப்போகிறது.

சட்டப் பேரவையில் எதிர்க்கட்சி உறுப்பினர்கள் பேச உரிய வாய்ப்பு கொடுக்கப்படுகிறதா?

நான்காண்டு விவாதங்களை எடுத்துப் பார்த்தால் சட்டசபையில் ஆக்கபூர்வமான விவாதங்களுக்கு எவ்வளவு அனுமதி கொடுத்துள்ளார்கள் என்பது தெரியவரும். எதிர்கட்சித்தலைவர் உட்பட நாங்கள் எழுப்பும் கேள்விகள், கோரிக்கைகளை இருட்டடிப்பு செய்துவிட்டு, ஆளுங்கட்சியினர் அளிக்கும் பதில்கள் மட்டும் தொலைக்காட்சிகளில் வெளியாகிறது.

சட்டப்பேரவையில் முக்கியமான விவாதங்களில் எங்களுக்கு வாய்ப்பு மறுக்கப்படுகிறது. தமிழகத்தில் சட்டம் - ஒழுங்கு சிறப்பாக உள்ளது என்று முதல்வர் சட்டசபையில் பேசும்போது காவலர் கொலை செய்யப்படுகிறார். இதைப் பற்றி பேசினால், எங்களை வெளியேற்றி விடுகின்றனர்.

நான் பதிளிக்கும் போது, பேரவையில் எதிர்க்கட்சித் தலைவர் இருப்பதில்லை என்று உதயநிதி வருத்தப்பட்டுச் சொன்னாரே..?

பிள்ளையும் கிள்ளி விட்டு, தொட்டிலையும் ஆட்டும் செயல் இது. எங்களை திட்டமிட்டு வெளியேற்றிவிட்டு, எங்கள் மீது குறை சொல்வது சரியானதல்ல.

சபாநாயகர் மீதான நம்பிக்கையில்லா தீர்மானத்துக்கு பாஜக, பாமக கட்சிகளின் ஆதரவை பெற முடியாதது உங்களுக்குத் தோல்விதானே?

இதில் தோல்வி என்பது கிடையாது. சபாநாயகரின் அணுகுமுறையை மக்களிடம் எடுத்துச் சொல்வதற்காக நம்பிக்கையில்லா தீர்மானம் கொண்டு வந்தோம். இதில், எல்லா கட்சிகளையும் சேர்க்க வேண்டும் என்ற நோக்கம் எங்களுக்கு இல்லை.

கச்சத்தீவை மீட்க சட்டப் பேரவையில் மீண்டும் தீர்மானம் நிறைவேற்றப்பட்டுள்ளதே..?

தமிழக முதல்வராக இருந்த கருணாநிதியின் ஒப்புதலோடு, 1974-ல், கச்சத்தீவு இலங்கைக்கு தாரை வார்க்கப்பட்டது. அதன்பின் வி.பி.சிங் முதல் மன்மோகன்சிங் வரை பிரதமர்களை நாங்கள்தான் உருவாக்கினோம் என மார்தட்டிய திமுக, அவர்களது அமைச்சரவையில் தொடர்ந்து இடம்பிடித்தது. அப்போது கச்சத்தீவை மீட்க என்ன நடவடிக்கை எடுத்தார்கள்? இப்போதும் நான்கு ஆண்டுகளாக மறந்துபோன கச்சத்தீவு மீட்பு கோரிக்கை, தேர்தலுக்காக தீர்மானமாக மாறியுள்ளது.

இப்படி தீர்மானம் போடுவதால் எந்தப் பலனும் கிடைக்கவில்லை என்பதால் தான், கச்சத்தீவை மீட்க வேண்டும் என முன்னாள் முதல்வர் ஜெயலலிதா உச்ச நீதிமன்றத்தில் வழக்குத் தொடுத்தார். நிலுவையில் உள்ள இந்த வழக்கில் தமிழக வருவாய்துறையும் ஒரு மனுதாரராக உள்ள நிலையில், சிறந்த வழக்கறிஞர்களை நியமித்து வழக்கு நடத்தி தீர்வு காணச் செய்ய வேண்டும்.

வக்பு வாரிய சட்டத்திருத்த மசோதாவுக்கு எதிர்ப்பு தெரிவித்து பேரவையில் திமுக கொண்டுவந்த தீர்மானத்தை அதிமுக-வும் ஆதரித்திருக்கிறதே?

தமிழக மக்களின் உரிமைக்கான தீர்மானங்களை அதிமுக ஆதரிக்கும். ஆனால், ஆட்சி அதிகாரத்தை கையில் வைத்துக் கொண்டு, தீர்மானம் மட்டும் போடும் நாடகத்தை திமுக நடத்தக்கூடாது. பிரச்சினைகளை தீர்ப்பதற்கான வழிமுறைகளை பார்க்காமல், திசைதிருப்பவும், அதன் மூலம் தங்களை விளம்பரப்படுத்திக் கொள்வதிலும் திமுக-வினர் குறியாக உள்ளனர்.

ஓட்டு அரசியலுக்காகத்தான் அகில இந்திய ஃபார்வர்டு பிளாக் கட்சி தலைவர் மூக்கையா தேவருக்கு மணிமண்டபம் அமைப்பதாக அறிவித்திருக்கிறதா திமுக அரசு?

மூக்கையா தேவரின் தியாகத்தைப் போற்றும் வகையில் உசிலம்பட்டியில் மணிமண்டபம் அமைக்க வேண்டும் என கடந்த வாரம் சட்டசபையில் நான் கோரிக்கை வைத்தேன். எங்களது கோரிக்கையின் அடிப்படையில் மூக்கையா தேவருக்கு மணிமண்டபம் அமைப்பதாக அறிவித்திருப்பது மகிழ்ச்சிக்குரிய அறிவிப்பு தான்!