இனிமேல் இப்படித்தான்... - ஆக்டிவாகும் அதிமுக ஐடி விங்!

பொதுவாக, திமுக மற்றும் பாஜக ‘ஐடி விங்’கைத்தான் பவர்ஃபுல் என்பார்கள். ஆனால், ‘யார் அந்த சார்?’ விவகாரத்தை சட்டமன்றம் வரைக்கும் பேசுபொருளாக்கியதன் மூலம் அதிமுக ‘ஐடி விங்’ இப்போது திடீர் வேகமெடுத்திருக்கிறது. ​வி​வா​திக்கப்பட வேண்டிய ஒரு செய்தியை வேறு ரூட்டில் திருப்பி விட்டு நீர்த்துப் போகச் செய்வதை​யும், ஒன்றுமில்லாத செய்தியை ஊதிப் பெரிதாக்கி அரசியல் ஆதாயம் பார்ப்​ப​தையும் தான் முக்கியக் கட்சிகளின் ‘ஐடி விங்’கில் இருப்​பவர்கள் செய்து கொண்டிருக்கிறார்கள்.

இவர்கள் நினைத்​தால், ‘ஒற்றை செங்கலை’யும் ஒரே நைட்டில் ஒபாமா ரேஞ்சுக்கு பேசவைத்து​விட​முடிகிறது. அந்த விதத்தில் ஆகப்பெரும் ஓட்டு வங்கியை தன் வசம் வைத்திருக்கும் அதிமுக, ‘ஐடி விங்’கின் வீச்சை தாமதமாகத்தான் புரிந்து கொண்டது. 2014-ல் தான் அதிமுக ‘ஐடி விங்’கே உருவாக்​கப்​பட்டது. ஆனபோதும் மற்ற கட்சிகளுக்கு ஈடுகொடுக்க முடியாத வகையில் அதிமுக ‘ஐடி விங்’ ஸ்லீப் மோடிலேயே இருப்பதாக அதிமுக-​வினரே குறைபட்டுக் கொண்டார்கள்.

‘ஐடி விங்’ ஆக்டிவாக இருக்க வேண்டியதன் முக்கி​யத்து​வத்தை உணர்ந்த அதிமுக பொதுச்​செய​லாளர் பழனிசாமி, மாவட்டச் செயலா​ளர்கள் கூட்டத்​திலும் அண்மையில் நடைபெற்ற செயற்​குழு, பொதுக்​குழு​விலும், “தகவல் தொழில்​நுட்ப அணியை வலுப்​படுத்த வேண்டும். அதில், திறன் மிக்க இளைஞர்களை பொறுப்பில் நியமிக்க வேண்டும். திமுக உள்ளிட்ட எதிர்க்​கட்​சிகளின், அதிமுக தொடர்பான பதிவு​களுக்கு தக்க பதிலடி கொடுக்க வேண்டும்” என வலியுறுத்​தி​னார்.

இந்நிலையில் தான், அண்ணா பல்கலைக்கழக மாணவி பாலியல் வன்கொடுமை விவகாரத்தில் ‘யார் அந்த சார்?’ என அதிமுக ‘ஐடி விங்’ எடுத்துக் கொடுத்த ஒற்றை வரி பிரச்​சாரம் அதிமுக-வுக்கு நன்றாகவே கைகொடுத்​திருக்​கிறது. ஒட்டுமொத்த தமிழக மக்களையும் திரும்பிப் பார்க்க வைத்துள்ள இந்தப் பிரச்​சாரம் குறித்து பேசிய அதிமுக தகவல் தொழில்​நுட்ப அணி மாநிலச் செயலாளர் ராஜ் சத்யன், “கிராம அளவில் கட்சியின் ‘ஐடி விங்’ பொறுப்​பாளர்களை நியமிக்க பொதுச்​செய​லாளர் பழனிசாமி உத்தர​விட்​டிருந்​தார்.

அதன்படி கடந்த ஓராண்டாக பணிகளை மேற்கொண்டு வருகிறோம். தமிழகத்தின் பெரிய கட்சி அதிமுக தான் என்பதால் ‘ஐடி விங்’கில் தற்போது அதிகமான உறுப்​பினர்கள் உள்ளனர். கட்சியின் மற்ற அணியினரை விட ஒருபடி மேலாகவே ‘ஐடி விங்’கை உற்சாகப்​படுத்தி வருகிறார் எங்கள் பொதுச்​செய​லாளர்.

அவரது வழிகாட்​டலில் செயல்​படும் எங்களின் வலிமையை. ‘யார் அந்த சார்?’ விவகாரத்தில் மக்கள் பார்த்​துள்ளனர். இனி இதுபோன்ற பிரச்​சா​ரங்களை அதிமுக ‘ஐடி விங்’ அடிக்கடி முன்னெடுக்​கும்; பழனிசாமியை முதல்​வ​ராக்கும் வரை ஓயாது” என்றார். அணியின் தலைவர் கோவை சத்யனோ, “கிராம அளவில் வாக்குச்​சாவடிக்கு 2 பேரை ‘ஐடி விங்’கில் இணைக்கும் பணி இறுதிக்​கட்​டத்தை எட்டி​யுள்ளது.

ஏப்ரல் மாதத்​துக்குள் பணிகளை முடிக்க திட்ட​மிட்​டிருக்​கிறோம். மேலும், ஒன்றியம், மாவட்டம், நகரம் எனவும் ‘ஐடி விங்’ நிர்வாகிகளை நியமித்து வருகிறோம். இது போன்ற நடவடிக்கைகளால் தான் எங்களின் இணைய வலிமை இப்போது பேசுபொருளாகி​யுள்ளது. 2026 தேர்தலில் அதிமுக வெற்றிக்கு அதிமுக ‘ஐடி விங்’ முக்கிய பங்காற்றும்” என்கிறார். பழனிசாமியின் நேரடி கட்டுப்​பாட்டில் இருக்கும் ‘ஐடி விங்’ மீண்டும் ஸ்லீப் மோடுக்கு போய்விடக் கூடாது என்பதே அதிமுக-​வினரின் இப்​போதைய கவலையாக இருக்​கிறது!