செ.ம.வேலுசாமிக்கு வலை விரிக்கிறாரா செந்தில் பாலாஜி? - கும்பாபிஷேக ‘கவனிப்பால்’ வட்டமடிக்கும் சர்ச்சை

கோவையின் முன்னாள் மேயரும் முன்னாள் அதிமுக அமைச்சருமான செ.ம.வேலுசாமி திமுக-வில் இணையப் போவதாக அவ்வப்போது செய்திகள் கிளம்பி அடங்கும். இப்போதும் அப்படியொரு செய்தி கிளம்பி இருக்கிறது. பொள்​ளாச்சியை அடுத்த ஆனைமலை மாசாணி​யம்மன் கோயில் கும்பாபிஷேகம் டிசம்பர் 12-ம் தேதி நடைபெற்றது.

இந்த விழாவில் அமைச்சர் செந்தில்​பாலாஜி பிரதானமாக இருந்​தார். செ.ம.வேலு​சாமியும் இந்த விழாவில் விஐபி அந்தஸ்தில் கலந்து கொண்டார். அப்போது இவரும் செந்தில்​பாலாஜியும் பரஸ்பரம் சந்தித்து உரையாடியது அதிமுக, திமுக இரண்டு கட்சி மட்டத்​திலுமே பேசுபொருளாகி இருக்​கிறது.

2001 அதிமுக ஆட்சியில் வணிகவரித்துறை அமைச்சராக இருந்த செ.ம.வேலு​சாமி, அப்போது கரூர் மாவட்​டத்​துக்கு பொறுப்பு அமைச்​ச​ராகவும் இருந்​தார். அதனால் அப்போது, அதிமுக-வில் இருந்த செந்தில்​பாலாஜியின் அரசியல் வளர்ச்​சிக்கு செ.ம.வேலுசாமி முக்கிய காரணமாக இருந்​தார்.

அதேபோல் இப்போது அமைச்சராக இருக்கும் செந்தில்​பாலாஜி கோவைக்கு பொறுப்பு அமைச்சராக இருக்​கிறார் அதிமுக-வில் கோவை மாநகர் மாவட்டச் செயலாளர், அமைச்சர், மேயர் என முக்கிய பதவிகளை வகித்தவர் செ.ம.வேலு​சாமி. ஆனால், எஸ்.பி.வேலுமணி வகையறாக்கள் வந்த பிறகு செ.ம.வேலுசாமி உள்ளிட்ட சீனியர்​களுக்கு முக்கி​யத்துவம் குறைந்து போனது. இருந்த போதும் பலபேர் கரைவேட்டியை மாற்றிக் கட்ட மனமில்​லாமல் அதிமுக-​விலேயே தொடர்​கிறார்கள்.

இப்படியான சூழலில் தான் கோயில் கும்பாபிஷேக விழாவில் செந்தில்​பாலாஜியை செ.ம.வேலுசாமி சந்தித்துப் பேசியது கவனிக்கத் தக்க விஷயமாகி இருக்​கிறது.

இதுகுறித்து செ.ம.வேலு​சாமி​யிடமே கேட்டோம். பலமாக சிரித்​தவர், “மாசாணி​யம்மன் கோயில் கும்பாபிஷேக விழாவில் நான், பொள்ளாச்சி ஜெயராமன், அமுல் கந்தசாமி உள்ளிட்ட அதிமுக-​வினர் பலரும் கலந்து கொண்டோம். அமைச்சர் செந்தில்​பாலாஜியும் கலந்து கொண்டார். அவர் எங்களுக்கும் சகல மரியாதை அளிக்​குமாறு கோயில் நிர்வாகி​களிடம் கேட்டுக் கொண்டார்.

நான் கரூர் மாவட்ட பொறுப்பு அமைச்சராக இருந்த போதிருந்தே எனக்கும் செந்தில்​பாலாஜிக்கும் அறிமுகம் உள்ளது. அவரது அரசியல் வளர்ச்​சிக்கு நானும் உதவியுள்​ளேன். தற்போது அமைச்சராக உள்ள அவருக்கு என் மீது தனிப்பட்ட பாசமும், விசுவாசமும் உண்டு. எங்களுக்குள் அரசியலை தாண்டிய நட்பும் உண்டு. ஆகவே, நான் அவரிடம் பேசியதை அரசியல் கண்ணோட்​டத்தில் பார்க்க வேண்டிய​தில்லை. அப்படியே நான் அந்தப் பக்கம் போவதாக இருந்​தாலும் எல்லோர் முன்பாகவா செந்தில்​பாலாஜியை சந்திப்​பேன்?” என்றார்.

“நானும் அவரும் நல்ல நண்பர்கள் என்று செ.ம.வேலுசாமி வெள்ளந்தியாக சொல்லலாம். ஆனால், அந்த நண்பருக்கு கொஞ்சம் இடம் கொடுத்தால் போதுமே... விவகார​மானவ​ராச்சே” என்று கண்ணடிக்​கிறார்கள் கோவை ரத்தத்தின் ரத்தங்கள்!