சென்னை​யில் களைகட்டிய புத்​தாண்டு கொண்​டாட்டம்: கண்காணிப்பு பணியில் 19 ஆயிரம் போலீ​ஸார்

சென்னை: ஆங்கில புத்​தாண்டு பிறப்​பை ஒட்டி சென்னை கடற்​கரைகளில் இளைஞர்கள் ஆயிரக்​கணக்​கில் குவிந்தனர். ஒருவருக்​கொருவர் புத்​தாண்டு வாழ்த்து​களைப் பரிமாறிக் கொண்​டனர். தமிழகம் முழு​வதும் ஆங்கில புத்​தாண்டு உற்சாகமாக நேற்று கொண்​டாடப்​பட்​டது.

சென்னை உட்பட அனைத்து பகுதி​களி​லும் நேற்று இரவு முதலே புத்​தாண்டு கொண்​டாட்டம் களைகட்டத் தொடங்​கியது. மெரினா, பட்டினம்​பாக்​கம், பெசன்ட் நகர், திரு​வான்​மியூர், பாலவாக்​கம், நீலாங்கரை என சென்னை​யின் அனைத்து கடற்​கரைகளுக்​கும் இளைஞர்கள் மற்றும் இளம்​பெண்கள் ஆயிரக்​கணக்​கானோர் வருகை தந்தனர்.

கிழக்கு கடற்கரை சாலை மற்றும் பழைய மாமல்​லபுரம் சாலைகளில் இளைஞர்கள் இருசக்கர வாகனங்​களி​லும், கார்​களி​லும் உற்சாகமாக வலம் வந்தனர். அடுக்​கு​மாடி குடி​யிருப்பு மற்றும் குடி​யிருப்பு பகுதி​களில் மக்கள் ஆர்வத்​துடன் புத்​தாண்​டைக் கொண்​டாடினர்.

நட்சத்திர ஓட்டல்​கள், கிழக்கு கடற்​கரைச் சாலையை ஒட்டிய விடு​திகள் மற்றும் பண்ணை விடு​திகள் என அனைத்​தும் ஒரு நாளைக்கு முன்​பாகவே முன்​ப​திவு செய்​யப்​பட்டு, புத்​தாண்டு கொண்​டாட்​டத்​துக்காக சிறப்பு ஏற்பாடுகள் செய்​யப்​பட்​டிருந்தன. அந்த வகையில் ஆடல், பாடல் நிகழ்ச்சிகளுடன் இளைஞர்கள் மகிழ்ச்​சி​யுடன் புத்​தாண்டை கொண்​டாடினர்.

கடற்​கரைகளி​லும், சாலைகளி​லும் கூட்டம் கூட்​டமாக ஆங்காங்கே கூடி​யிருந்த மக்கள் நள்ளிரவு 12 மணியானதும் ‘ஹேப்பி நியூ இயர்’ கோஷமிட்டு ஒருவருக்கு ஒருவர் புத்​தாண்டு வாழ்த்து​களைப் பகிர்ந்து கொண்​டனர். பலரும் நண்பர்​களுடன் சேர்ந்து கேக் வெட்டி மகிழ்ச்​சி​யுடன் புதிய ஆண்டை வரவேற்​றனர்.

பாது​காப்பு ஏற்பாடுகள்: புத்​தாண்டு கொண்​டாட்​டத்​தின்​போது எவ்வித அசம்​பா​விதங்​களும் நடைபெறாமல் இருக்​கும் வகையில் சென்னை​யில் 19 ஆயிரம் போலீ​ஸார் பாது​காப்பு பணியில் ஈடுபட்​டிருந்​தனர். கூட்ட நெரிசலைக் கருத்​தில் கொண்டு, மெரினா காமராஜர் சாலை​யில் சாந்​தோம் தேவால​யத்​தில் இருந்து போர் நினை​வு சின்னம் வரை போக்கு​வரத்து தடை செய்​யப்​பட்​டிருந்​தது.

கடலில் குளிக்​க​வும், இறங்​க​வும் தடை விதிக்​கப்​பட்​டிருந்​த​தால் கடற்​கரைகளில் கண்காணிப்பும் பலப்​படுத்​தப்​பட்​டிருந்​தது. மேலும் வாகனங்களில் அதிவேகம், மதுபோதை​யில் வாகனம் ஓட்டி​னால் வழக்​குப்​ப​திவு செய்​யப்​படுவதுடன், சம்பந்​தப்​பட்​ட​வர்​களின் வாகனம் பறிமுதல் செய்​யப்​படும் என போலீஸார் ஏற்கெனவே எச்சரித்​திருந்​தனர்.

அதன்​படி, எல்லை மீறிய​வர்கள் மீது நடவடிக்கை எடுக்கப்பட்டது. இதுதவிர, சென்னை​யில் உள்ள 12 காவல் மாவட்​டங்​களில் மொத்தம் 425 இடங்​களில் வாகன தணிக்கை குழுக்கள் ஏற்படுத்​தப்​பட்டு கண்காணிக்​கப்​பட்​டது.

மேம்​பாலங்கள் மூடல்: கோயில்​கள், தேவால​யங்கள் மற்றும் வழிபாட்டு தலங்​களுக்கு போலீஸ் பாது​காப்பு போடப்​பட்​டிருந்​தது. இரவு 10 மணி முதல் காலை 6 மணிவரை அனைத்து மேம்​பாலங்​களும் மூடப்​பட்டு கண்காணிக்​கும் பணியில் போலீ​ஸார் ஈடுபட்​டிருந்​தனர். இதேபோல் தமிழகம் ​முழு​வதும் 1 லட்​சம் ​போலீ​ஸார் கண்​காணிப்பு பணி​யில் ஈடு​பட்​டிருந்​தனர். புத்​தாண்டு ​கொண்​டாட்​டத்​தையொட்டி ​முன்ன​தாகவே பல்​வேறு ​போக்கு​வரத்து ​மாற்​றங்​களும் செய்​யப்​பட்​டிருந்​தது குறிப்​பிடத்​தக்​கது.