‘ஐ.நா-வின் பாராட்டு மட்டுமே எங்களின் பசியாற்றுமா?’ - மனப்புழுக்கத்தில் மக்களைத் தேடி மருத்துவம் திட்ட பணியாளர்கள்!

‘மக்களைத் தேடி மருத்துவம் திட்டத்துக்கு’ ஐ.நா. விருது வழங்கியதை தமிழ்நாடு அரசு பெருமையோடு சொல்லிக் கொள்கிறது. அண்மையில், ஈரோடு மாவட்டம் நஞ்சனாபுரத்தில் இந்தத் திட்டத்தின் 2 கோடியாவது பயனாளியான சுந்தராம்பாளின் வீட்டுக்கே சென்று மருந்துப் பெட்டகத்தை வழங்கி, நலம் விசாரித்தார் முதல்வர். அரசு இத்தனை முக்கி​யத்துவம் கொடுத்து செயல்​படுத்தும் இந்தத் திட்டத்தில் பணியாற்றும் பெண் ஊழியர்​களுக்கு எண்ணிச் சொல்ல முடியாத அளவுக்கு பிரச்​சினைகள்.

2021 ஆகஸ்ட் 5-ம் தேதி மக்களைத் தேடி மருத்​துவம் திட்டத்தைத் தொடங்​கியது தமிழக அரசு. நீரிழிவு, உயர் ரத்த அழுத்தம், இயன்முறை சிகிச்சை, டயாலிசிஸ் என தொற்றா நோய்களால் பாதிக்​கப்​பட்​டோரின் வீடுகளுக்கே சென்று மருத்துவ சேவை அளிப்பது தான் இத்திட்​டத்தின் சிறப்பு. இதற்காக சுமார் 13 ஆயிரம் பெண் ஊழியர்கள் பணி அமர்த்​தப்​பட்​டனர். தினமும் 2 மணி நேரம் மட்டுமே வேலை என்று சொல்லி இவர்களை பணிக்கு எடுத்​தவர்கள், இப்போது சுமார் 8 மணி நேரத்​துக்கும் மேலாக வேலை வாங்கிக் கொண்டிருக்​கிறார்கள்.

மருத்​துவக் காப்பீட்டுத் திட்டம், கிராம சுகாதார செவிலியர் பணி, ஆரம்ப சுகாதார நிலையத்தில் புறநோ​யாளி​களைக் கவனிக்கும் பணி, கர்ப்​பிணிகள் விவரம் சேகரிப்பு, தனி மனிதரின் மருத்துவ சிகிச்சை முறை சேகரிப்பு, அலைபேசியில் பதிவேற்றம் என பணிகள் சுமத்​தப்​படும் இவர்களுக்கு தினக்கூலி ரூ.183 மட்டுமே.

“இதை வைத்துக் கொண்டு எங்களால் எப்படி குடும்பம் நடத்த முடியும்?” என்று கேள்வி எழுப்பும் இந்தப் பணியாளர்கள், “இஎஸ்ஐ, பிஎஃப் திட்டம், திறன் வளர்ப்பு பயிற்சி சான்றிதழ், பணி நிரந்தரம் உள்ளிட்ட கோரிக்கைகளை தொடர்ச்​சியாக அரசுக்கு வைத்து வருகிறோம். மாதந்​தோறும் ஊழியர்​களின் உழைப்பை மதிப்​பிடும் ஸ்கோர் கார்டு முறையை கைவிடுவது, அனைவருக்கும் பேறுகால ஊதியத்​துடன் விடுப்பு, ஆண்டுக்கு 2 சீருடை, பணியாற்றும் இடங்களில் விசாகா குழுக்களை அமைப்பது, போக்கு​வரத்​துபடி மற்றும் மானிய விலையில் இருசக்கர வாகனம் வழங்குவது உள்ளிட்ட இன்னும் சில கோரிக்கைகளும் எங்களுக்கு உண்டு.

முதலில், தொற்றா நோய்களால் பாதிக்​கப்​பட்​ட​வர்களை கவனிக்கும் வேலை என்று சொல்லி​விட்டு, தற்போது தொற்றுநோய் சம்பந்​தப்பட்ட வேலைகளையும் செய்ய வைக்கிறார்கள். எவ்வித பயிற்​சியும் தராமல், காசநோய் அறிகுறிகள் இருக்கும் நபர்களின் வீட்டுக்கே சென்று சளி மாதிரி எடுத்து, தினமும் ஆரம்ப சுகாதார நிலையத்​துக்கு சென்று கொடுக்கச் சொல்கிறார்கள். ஸ்ரீபெரும்​புதூரைச் சேர்ந்த சரண்யா என்ற ஊழியர் கடந்த ஆண்டு தனது குழந்​தை​யுடன் பணிக்குச் சென்றபோது விபத்தில் சிக்கி உயிரிழந்​தார்.

இதுவரை அரசு, அந்தக் குடும்பத்​துக்கு நிவாரணம் வழங்க​வில்லை. மதுரை மேலூர் சேக்கிப்​பட்​டியில் தனலட்சுமி என்ற பட்டியலினத்து பணியாளர் மீது சாதிரீ​தியிலான தாக்குதல் நடந்தது. அதற்கும் நியாயம் கிடைக்க​வில்லை. இப்படியான பணிப் பாதுகாப்பற்ற சூழலும் எங்களுக்கு உள்ளது.

இத்தனையும் தாங்கிக் கொண்டு சொற்ப வருமானத்தில் வேலை செய்யும் எங்களுக்கு ஐ.நா-வின் பாராட்டு மட்டுமே சோறு போடாது. எனவே, எங்களின் குறைந்​தபட்ச ஊதியத்தை ரூ.10 ஆயிரமாக அரசு உயர்த்தி வழங்க வேண்டும்” என்றனர். மக்களைத் தேடிப் போய் மருத்துவ சேவை செய்யும் இந்தப் பணியாளர்​களின் நியாயமான கோரிக்கைகளுக்கும் அரசு செ​வி​சாய்​க்​கலாமே!