“மோடியின் கபட நாடகத்தை தமிழக மக்கள் ஏற்க மாட்டார்கள்” - செல்வப்பெருந்தகை

சென்னை: “தமிழக மக்கள் எப்பொழுதுமே பிரதமர் மோடியையோ, பாஜகவையோ ஏற்றுக் கொண்டதில்லை. ஆர்எஸ்எஸ் சித்தாந்தத்தின்படி, இந்தியையும், சம்ஸ்கிருதத்தையும் பரப்புகிற நரேந்திர மோடியை தமிழக மக்கள் நன்றாக புரிந்து வைத்திருக்கிறார்கள்.” என தமிழ்நாடு காங்கிரஸ் கமிட்டி தலைவர் செல்வப்பெருந்தகை தெரிவித்துள்ளார்.

இது குறித்து அவர் வெளியிட்டிருக்கும் அறிக்கையில், “பிரதமர் மோடி மாதந்தோறும் கடைசி ஞாயிற்றுக்கிழமை வானொலி மூலம் மன்-கி-பாத் மனதில் குரல் நிகழ்ச்சியில் நேற்று பேசும் போது, ‘உலகின் மிகத் தொன்மையான மொழி தமிழ் மொழி என்பதில் ஒவ்வொரு இந்தியருக்கு பெருமை என்று குறிப்பிட்டு பேசியிருக்கிறார்”. இதைப்போல கடந்த காலங்களில் திருவள்ளுவர், மகாகவி பாரதியார் ஆகியோரை மேற்கோள் காட்டி பேசியிருக்கிறார்.

இதன்மூலம் அனைத்து மொழிகளையும் சமமாக கருதுவதாக ஒரு நாடகத்தை நீண்டகாலமாக அரங்கேற்றி வருகிறார். அதன் தொடர்ச்சியாகத் தான் நேற்றைய பேச்சும் அமைந்திருக்கிறது. உண்மையிலேயே பிரதமர் நரேந்திர மோடிக்கு தமிழ் மொழி வளர்ச்சியில் அக்கறை இருக்கிறதா என்பதை ஆய்வு செய்து பார்த்தால் பேச்சுக்கும், செயலுக்கும் கடுகளவும் தொடர்பில்லை என்பதை நிச்சயமாக உணர முடியும்.

தமிழகத்தைச் சேர்ந்த ஒருவர் ஒன்றிய பாஜக ஆட்சியில் இந்திய மொழிகளுக்கு எவ்வளவு நிதி ஒதுக்கப்பட்டது என்கிற விவரத்தை தகவல் அறியும் உரிமைச் சட்டத்தின் மூலம் ஆங்கிலத்தில் கேள்வி கேட்டிருக்கிறார். அவருக்கு இந்தி மொழியில் வந்த பதிலின்படி 2017 முதல் 2022 வரை சம்ஸ்கிருத மொழி வளர்ச்சிக்காக ஆண்டுதோறும் ஒதுக்கப்பட்ட நிதியின் மொத்த தொகை ரூபாய் 1074 கோடி. இந்த நிதி தலைநகர் டெல்லியில் உள்ள சம்ஸ்கிருத பல்கலைக் கழகத்திற்கு ஒதுக்கப்பட்டிருக்கிறது. இத்தகைய நிதி சமஸ்கிருதம் ஒரு செம்மொழியாக ஏற்கப்பட்டதால் ஒதுக்கப்பட்டதாக கூறப்பட்டுள்ளது.

ஆனால், அதே நேரத்தில் செம்மொழியாக ஏற்கப்பட்ட தமிழ், தெலுங்கு, கன்னடம், மலையாளம், ஒடியா ஆகிய மொழிகளுக்கு எவ்வளவு நிதி ஒதுக்கப்பட்டது என்பதை பார்க்கிற போது கடும் அதிர்ச்சி தான் ஏற்படுகிறது. அதன்படி மக்களவையில் கேட்கப்பட்ட கேள்விக்கு ஒன்றிய கலாச்சாரத்துறை அமைச்சர் அறிவிப்பின்படி 2017 முதல் 2020 வரை தமிழ் மொழிக்கு ஒதுக்கப்பட்ட தொகை ரூபாய் 22.94 கோடி. தெலுங்கு, கன்னடம் ஆகிய மொழிகளுக்கு ஒதுக்கப்பட்ட தொகை தலா ரூபாய் 3 கோடி. மேலும், தகவல் அறியும் உரிமைச் சட்டத்தின்படி ஆங்கிலத்தில் கேட்கப்பட்ட கேள்விக்கு இந்தியில் தான் பதில் அனுப்பப்படுகிறது.

இதற்கு காரணம் உள்துறை அமைச்சர் அமித்ஷாவின் கட்டளையின்படி தகவல் அறியும் உரிமைச் சட்டத்தின்படி கேட்கப்படுகிற அனைத்து கேள்விகளுக்கும் இந்தியில் தான் பதில் அளிக்க வேண்டுமே தவிர, ஆங்கிலத்தில் அல்ல. ஆங்கிலத்தை இணைப்பு மொழியாக ஏற்றுக் கொள்ள முடியாது என்று அவர் கூறியதனாலேயே இந்தி பேசாத மக்கள் மீது இந்தி திணிக்கப்பட்டு வருகிறது. இது பண்டித நேரு கொடுத்த உறுதிமொழிக்கும், அதன்படி திருத்தப்பட்ட ஆட்சி மொழிகள் சட்டத்திற்கும் எதிரானதாகும்.

அதேபோல, ஒன்றிய கல்வியமைச்சர் சுபாஷ் சர்க்கார் மக்களவையில் கேட்கப்பட்ட கேள்விக்கு அளித்த பதிலின்படி, 2021-22-ல் தமிழ் மொழிக்கு ஒதுக்கப்பட்ட தொகை ரூபாய் 11.86 கோடி. ஆனால், சம்ஸ்கிருத மொழிக்கு ஒதுக்கப்பட்ட தொகை ரூபாய் 198.83 கோடி. ஆக, ஒவ்வொரு ஆண்டும் ஒன்றிய அரசு சம்ஸ்கிருதத்திற்கு அதிக நிதியையும், மற்ற இந்திய மொழிகளுக்கு மிகமிக குறைவான நிதியையும் ஒதுக்கி பாரபட்சமான முறையில் செயல்பட்டு வருகிறது.

2011 மக்கள் தொகை கணக்கெடுப்பின்படி, 138 கோடி மக்கள் தொகை கொண்டிருந்த இந்திய நாட்டில் சமஸ்கிருதம் பேசுகிற மக்களின் எண்ணிக்கை 24,821 மட்டுமே. அது மொத்த மக்கள் தொகையில் 0.002 சதவிகிதமாகும். 25,000 மக்கள் தொகை கூட இல்லாத சம்ஸ்கிருத மொழிக்கு 2017 முதல் 2022 வரை ரூபாய் 1074 கோடியும், அதே காலத்தில் 8 கோடி மக்கள் பேசுகிற தமிழ் மொழிக்கு ரூபாய் 22.94 கோடி ஒதுக்கப்பட்டிருப்பதன் மூலம் ஒன்றிய பாஜக அரசின் அப்பட்டமான பாரபட்ச போக்கை தெளிவாக புரிந்து கொள்ள முடியும்.

ஒன்றிய பாஜக அரசின் ஒரே நோக்கம், ‘ஒரே நாடு, ஒரே மொழி” என்பது தான். அதன்மூலம் இந்தியாவில் நிலவுகிற பன்முக கலாச்சாரத்தையும், பல்வேறு மொழி பேசுகிற மக்கள் வாழ்கிற தனித் தன்மையையும் சிதைத்து சீர்குலைத்து ஆட்சி மொழியாக இந்தியையும், கலாச்சார ரீதியாக சம்ஸ்கிருதத்தையும் மக்கள் மீது திணிப்பதற்கு தீவிரமான முயற்சிகளை ஒன்றிய பாஜக அரசு மேற்கொண்டு வருகிறது.

இந்நிலையில் தமிழ் மொழியைப் பற்றி பிரதமர் மோடி மன்-கி-பாத் நிகழ்ச்சியில் பேசியது தமிழர்களை ஏமாற்றுகிற அரசியல் மோசடியாகும். பிரதமர் மோடி, எத்தனை முறை இத்தகைய பாசாங்கு நாடகங்களை நடத்தினாலும் அவர் விரிக்கிற மாய வலையில் தமிழக மக்கள் சிக்க மாட்டார்கள்.

தமிழக மக்கள் எப்பொழுதுமே பிரதமர் மோடியையோ, பாஜகவையோ ஏற்றுக் கொண்டதில்லை. ஆர்எஸ்எஸ் சித்தாந்தத்தின்படி, இந்தியையும், சமஸ்கிருதத்தையும் பரப்புகிற நரேந்திர மோடியை தமிழக மக்கள் நன்றாக புரிந்து வைத்திருக்கிறார்கள். அதனால் தான் இந்தியாவிலேயே பிரதமர் மோடியையும், பாஜகவையும் தமிழக மக்கள் ஒவ்வொரு தேர்தலிலும் நிராகரித்து மதச்சார்பற்ற முற்போக்கு கூட்டணியை ஆதரித்து வருகிறார்கள். எனவே, பிரதமர் மோடியின் கபட நாடகத்தை தமிழக மக்கள் மக்கள் என்றைக்குமே ஏற்றுக் கொள்ள மாட்டார்கள்.” எனத் தெரிவித்தார்கள்.