பாஜக நிர்வாகியை சந்தித்ததால் காவலர் சஸ்பெண்ட்? - அண்ணாமலை கண்டனம்

நாகப்பட்டினம்: பாஜக நிர்​வாகியை சந்தித்த காவலர் பணியிடை நீக்கம் செய்​யப்​பட்​டுள்​ளதற்கு, அக்கட்​சி​யின் மாநிலத் தலைவர் அண்ணாமலை கண்டனம் தெரி​வித்​துள்ளார்.

நாகை மாவட்டம் பொய்​கை நல்​லூரைச் சேர்ந்த விஜயசேகரன், வேட்​டைக்​காரனிருப்பு காவல் நிலை​யத்​தில் காவலராகப் பணியாற்றி வந்தார். இவரது மகள் துவாரகா மதிவதனி, 2-ம் வகுப்பு படிக்​கிறார்.

கடந்த ஆண்டு ‘என் மண் என்மக்கள்’ யாத்​திரை மேற்​கொண்​டிருந்த பாஜக மாநிலத் தலைவர் அண்ணாமலை நாகை வந்த​போது, அவரை தந்தை​யுடன் சென்று சந்தித்த துவாரகா மதிவதனி, நாகை​யில் நவோதயா வித்​யாலயா பள்ளி கட்டித்தர பிரதமர் மோடி​யிடம் வலியுறுத்​து​மாறு கோரிக்கை விடுத்​தார். பின்னர் கடந்த ஜனவரி​யில் பிரதமர் மோடி திருச்சி வந்த​போது, அவரை வரவேற்க தந்தை​யுடன் சென்ற துவாரகா மதிவதனி, “எங்கள் ஊர் நாகப்​பட்​டினம். அரசுப் பள்ளி​களில் இந்தி படிக்க வசதி இல்லை. பள்ளிக்​கூடம் கட்ட என் அப்பா​விடம் சொல்லி, இடம் தர ஏற்பாடு செய்​கிறேன். நீங்கள் பள்ளிக்​கூடம் கட்டித்​தா​ருங்​கள். நாங்​களும் இந்தி பயில வேண்​டும்” என்ற வாசகம் எழுதிய அட்டையைக் காட்டி, பிரதமரை வரவேற்​றார்.

இந்நிலை​யில், கடந்த வாரம் நாகை வந்த பாஜக மாநில பொதுச் செயலாளர் கருப்பு முரு​கானந்​தத்​தை​யும் விஜயசேகரன் சந்தித்​துள்ளார். இதையடுத்து, துறை ரீதியான காரணங்கள் என்று கூறி விஜயசேகரன் பணியிடை நீக்கம் செய்​யப்​பட்​டுள்​ளார்.

இந்நிலை​யில் நேற்று முன்​தினம் நாகை வந்த பாஜக மாநிலத் தலைவர் அண்ணா​மலை​யிடம், விஜயசேகரனின் சஸ்பெண்ட் குறித்து கட்சி​யினர் தெரி​வித்​தனர். பின்னர் செய்தி​யாளர்​களிடம் பேசிய அண்ணா​மலை, “விஜயசேகரன் பணியின்​போது பாஜக​வினர் யாரை​யும் சந்திக்க​வில்லை. படிப்​ப​தற்காக நவோதயா பள்ளிக் கூடம் கட்டிக் கொடுங்கள் என்று கேட்டது தவறா? திமுக​வினர் அளித்த அழுத்தம் காரண​மாகவே அவர் பணியிடை நீக்கம் செய்​யப்​பட்​டுள்​ளார். திமுக எவ்வளவு மோசமாக அரசியல் செய்​கிறது என்ப​தற்கு இந்த சம்பவம் ஓர் உதாரணம். நாகை காவல் துறை​யின் இந்த செயல் கண்டிக்​கத்​தக்​கது” என்று தெரி​வித்​தார். காவலர் ​விஜயசேகரன் சஸ்​பெண்ட் செய்​யப்​பட்​டுள்ளது ​காவல் துறை வட்​டாரத்​தில் மட்டுமின்றி, அரசி​யல் வட்​டாரத்​தி​லும் பரபரப்பை ஏற்​படுத்​தி​யுள்​ளது.