மகனுக்கு மகுடம் சூட்டிய செல்வராஜ்... மாணவரணி அமைப்பாளரான திலகராஜ்!

திமுக இலக்கணப்படி, திருப்பூர் வடக்கு மாவட்ட திமுக செயலாளரும் எம்எல்ஏ-வுமான க.செல்வராஜும் மகன் திலகராஜை தனது அரசியல் வாரிசாக்கி மாணவரணி அமைப்பாளர் பதவியில் அமர்த்தியிருக்கிறார். இதுதான் திருப்பூர் திமுகவில் இப்போது ஹாட்டாபிக் ​திமுக பவர் சென்டருடன் எப்போதும் தொடர்பில் இருப்பவர் க.செல்​வ​ராஜ். மறைந்த பேராசிரியர் க.அன்​பழகன் துவங்கி, திக தலைவர் கி.வீரமணி, ஆர்.எஸ்​.​பாரதி, அன்பகம் கலை என பலருடனும் நெருக்கம் பாராட்டி வரும் செல்வ​ராஜ், அமைச்சர் நேருவிடம் செல்லப்​பிள்ளை கணக்காய் இருப்​பவர்.

அப்படிப்​பட்​டவர், தனது மகன் திலகராஜை இளைஞரணி பதவியில் நியமிக்க வைத்து அதன் மூலம் அவரை உதயநி​திக்கு நெருக்கமான வட்டத்​துக்குள் திணிக்க திட்ட​மிட்​டார். அது முடியாமல் போனதால் தொலைநோக்குத் திட்டத்​துடன் மாணவரணி பொறுப்பில் உட்கார​வைத்​திருக்​கிறார். இதுகுறித்து பேசும் திருப்பூர் திமுக​வினர், “திருப்பூர் வடக்கு மாவட்ட திமுக செயலாளர் பதவியில் இருப்​பதால் தனது மகன் திலகராஜை தனக்குக் கீழே இளைஞரணி பொறுப்பில் அமர்த்திவிட வேண்டும் என அறிவால​யத்தில் முட்டி மோதினார் செல்வராஜ்.

ஆனால், வடக்கு மாவட்ட திமுக இளைஞரணி அமைப்​பாளரான தங்கராஜ் உதயநிதி ஸ்டாலினுக்கு நெருக்கமாக இருப்​பதால் செல்வ​ராஜால் ஒன்றும் செய்ய முடிய​வில்லை. திருப்பூர் மேயர் ந.தினேஷ்கு​மாரும், உதயநி​திக்கு நெருக்கமாக இருப்​பதால் அவரும் எதிர்​காலத்தில் தனது அரசியல் வளர்ச்​சிக்கு யாரும் தடையாக வந்து​விடக்​கூடாது என்பதில் தெளிவாக இருக்​கிறார். இத்தனை சிக்கல்கள் இருப்​பதால் செல்வ​ராஜால், தான் நினைத்தபடி மகனை இளைஞரணி பொறுப்​புக்கு கொண்டுவர முடிய​வில்லை.

இருந்த போதும் திலகராஜுக்கு திருப்பூர் வடக்கு மாவட்ட திமுக மாணவரணி அமைப்​பாளர் பதவியை போராடி பெற்று​விட்​டார். தான் நினைத்த பதவி தனது மகனுக்கு கிடைக்க​வில்லை என்றபோதும் அதை வெளிக்​காட்டிக் கொள்ளாத செல்வ​ராஜ், மாணவரணி பொறுப்​பேற்று திருப்​பூருக்கு திரும்பிய மகனுக்கு மேள தாளம் முழங்க தனது ஆதரவாளர்களை வைத்து வரவேற்பு கொடுக்க வைத்தார்” என்கிறார்கள்.

திமுகவில் வருங்​காலம் உதயநி​தியின் காலமாகத்தான் இருக்கும் என்பதால் 2026 சட்டப் பேரவைத் தேர்தலில் திருப்பூர் தெற்கு தொகுதியை மீண்டும் தனக்காக கேட்பார் செல்வ​ராஜ். கடந்த முறையே மார்க்​சிஸ்ட் கட்சிக்கு போகவேண்டிய இந்தத் தொகுதியை அமைச்சர் நேருவின் தயவில் தான் செல்வராஜ் தனக்காக பெற்று வந்ததாகச் சொல்வார்கள்.

இம்முறை தொகுதி தனக்குக் கிடைக்​கா​விட்டால் அந்த இடத்தில் தனது மகனை நிறுத்த கணக்குப் போடுகிறாராம் செல்வ​ராஜ். அந்தக் கணக்கை வென்றெடுக்க அதற்கு முன்னதாக மகனை சின்னவரின் அருட்​பார்​வைக்குள் கொண்டு செல்ல துடிக்கிறாராம்.

அதற்காகவே இத்தனை அலப்பறைகள் ஆர்ப்​பாட்​டங்கள் என்கிறார்கள். முன்னதாக, ஜோதிடர்கள் குறித்துக் கொடுத்த எண் கணித ஜோதிடப்படி திலக்ராஜ் என்ற தனது பெயரை திலகராஜ் என மாற்றிக் கொண்டிருக்கும் செல்வ​ராஜின் மகனும், அப்பா தன்னை அரசியலில் உண்மை​யிலேயே ‘திலக​ராஜ்’ ஆக்குவார் என்ற நம்பிக்கையில் திருப்பூரை வலம் வருகிறார்!