சர்​வதேச சிவில் ஏவியேஷன் அமைப்​பின் 80-வது ஆண்டு சர்வதேச சிவில் விமான போக்கு​வரத்து தின விழா: சென்னை விமான நிலை​யத்​தில் நாளை நடக்​கிறது

சென்னை: இன்ஸ்டிடியூட் ஆப் ஏரோநாட்டிக்ஸ் ஆஸ்ட்ரோநாட்டிக்ஸ் மற்றும் ஏவியேஷன் நிறுவனம் (ஐஏஏஏ) சார்பில் சர்வதேச சிவில் ஏவியேஷன் அமைப்பின் 80-வது ஆண்டு விழா மற்றும் சர்வதேச சிவில் விமான போக்குவரத்து தின விழா கொண்டாட்டம் சென்னை விமான நிலையத்தில் நாளை (டிச.7) நடைபெறுகிறது.

சர்வதேச சிவில் ஏவியேஷன் அமைப்பின் (International Civil Aviation Organization- ICAO) 50 ஆண்டிலிருந்து அமைப்பின் தொடக்க நாளான டிசம்பர் 7-ம் தேதி சர்வதேச சிவில் விமானப் போக்குவரத்து தினமாக (International Civil Aviation Day) கொண்டாடப்பட்டு வருகிறது. இந்த தினத்தை இன்ஸ்டிடியூட் ஆப் ஏரோநாட்டிக்ஸ் ஆஸ்ட்ரோநாட்டிக்ஸ் மற்றும் ஏவியேஷன் நிறுவனம் (Institute of Aeronautics Astronautics and Aviation - IAAA) ஆண்டுதோறும் கொண்டாடுகிறது.

அதேநேரம், சர்வதேச சிவில் ஏவியேஷன் அமைப்பானது, 5 ஆண்டுகளுக்கு ஒருமுறை அமைப்பு தொடங்கியதன் முக்கியத்துவத்தை உணர்த்தும் வகையில் கருப்பொருளை வெளியிடுகிறது. அதன்படி, கடந்த 2019-ம் ஆண்டு இந்திய விமான நிலைய ஆணையத்துடன் இணைந்து, சர்வதேச சிவில் ஏவியேஷன் அமைப்பின் 75-வது ஆண்டு விழா மற்றும் சர்வதேச சிவில் விமானப் போக்குவரத்து தினத்தை சென்னையில் ஐஏஏஏ கொண்டாடியது. இந்த விழாவுக்கு மீடியா பார்ட்னராக `இந்து தமிழ் திசை' நாளிதழ் இருந்ததால் மிகப்பெரிய வரவேற்பு கிடைத்தது.

இந்நிலையில், சர்வதேச சிவில் ஏவியேஷன் அமைப்பின் 80-வது ஆண்டு விழா மற்றும் சர்வதேச சிவில் விமானப் போக்குவரத்து தினம் விழாவை இந்திய விமான நிலைய ஆணையத்துடன் இணைந்து வரும் டிசம்பர் 7-ம் தேதி சென்னை விமான நிலையத்தில் ஐஏஏஏ கொண்டாட இருக்கிறது. இந்த விழாவுக்கு பார்ட்னர்களாக `இந்து தமிழ் திசை' நாளிதழ் மற்றும் `தமிழக அரசின் ஸ்டார்ட் அப் டி.என் நிறுவனம்' உள்ளன.

விழாவில் சிறந்த ஏரோஸ்பேஸ் ஸ்டார்ட் அப் நிறுவனங்களுக்கு விருதுகள் வழங்கப்படவுள்ளன. அது தொடர்பாக ஒரு பிரிவும் தொடங்கப்படவுள்ளது. இந்த தகவலை ஐஏஏஏ கவுரவ செக்ரட்டரி ஜெனரல் பேராசிரியர் சி.எஸ்.கருணாகரன் தெரிவித்துள்ளார்.