மாற்றுத் திறனாளிகள் சேவைக்கு ‘விழுதுகள்’ வாகனம், ஒப்புயர்வு மையம்: முதல்வர் ஸ்டாலின் தொடங்கி வைத்தார்

சென்னை: ​​மாற்றுத் திறனாளிகள் நலத்​துறை சார்​பில் ‘விழுதுகள்’ மறுவாழ்வு சேவை வாகனம், புற உலக சிந்​தனையற்ற நபர்​களுக்கான ஒப்புயர்வு மைய சேவைகள் ஆகிய​வற்றை முதல்வர் ஸ்டா​லின் தொடங்கி வைத்​தார். இதுகுறித்து தமிழக அரசு வெளி​யிட்ட செயதிக்​குறிப்பு:

மாற்றுத் திறனாளி​களுக்கு உதவி உபகரணங்கள் வழங்​கும் திட்​டத்​தின்​ பொன்​விழா ஆண்டை முன்னிட்டு, தமிழகம் முழு​வதும் உதவி உபகரணங்கள் வேண்டி சுமார் 26 ஆயிரம் பேர் விண்​ணப்பித்​துள்ளனர். அவர்​களுக்கு ரூ.130 கோடி​யில் பெட்​ரோல் ஸ்கூட்டர் உள்ளிட்ட உபகரணங்கள் வழங்​கப்​படு​கின்றன. இதன் அடையாள​மாக, 2 மாற்றுத் திறனாளி​களுக்கு இணைப்பு​ சக்​கரம் பொருத்​தப்​பட்ட பெட்​ரோல் ஸ்கூட்டர்களை சென்னை தலைமைச் செயல​கத்​தில் முதல்வர் ஸ்டா​லின் நேற்று வழங்​கினார். கடந்த 3 ஆண்டு​களில் 1 லட்சத்​துக்​கும் மேற்​பட்ட பயனாளி​களுக்கு ரூ.211 கோடி​யில் உதவி உபகரணங்கள் வழங்​கப்​பட்​டுள்ளன.

‘தமிழ்​நாடு உரிமை​கள்’ திட்​டத்​தின்​கீழ் மாற்றுத்திறனாளிகளுக்கு மறுவாழ்வு சேவைகள் வழங்க மாநிலம் முழு​வதும் ஒருங்​கிணைந்த சேவை மையங்கள் அமைக்​கப்பட உள்ளன. இந்த மையங்​களுக்கு வர இயலாத மாற்றுத் திறனாளி​களுக்காக ‘விழுதுகள்’ என்ற முதல் மறுவாழ்வு சேவை வாகனத்தை முதல்வர் தொடங்கி வைத்​தார். நிர்​ண​யிக்​கப்​பட்ட வழித்​தடங்​களில் இந்த வாகனங்கள் பயணிக்​கும். அங்கு உள்ள மாற்றுத் திறனாளி​களின் தேவைக்​கேற்ப, இயன்​முறை, கேட்​டல், பேச்சு பயிற்சி, சிறப்பு கல்வி ஆகிய மறுவாழ்வு சேவைகள் இந்த வாகனங்​களில் வழங்​கப்​படும். மாற்றுத் திறனாளி​களுக்கு சிறப்பாக சேவை புரிந்​தவர்கள் மற்றும் சிறந்த சாதனை படைத்த மாற்றுத் திறனாளிகள் என 16 பேருக்கு மாநில அளவிலான விருதுகளை முதல்வர் வழங்​கினார்.

புற உலக சிந்​தனையற்ற நபர்​களுக்கு (ஆட்​டிசம்) ஒரே குடை​யின்​கீழ் அனைத்து வகையான மறுவாழ்வு சிகிச்​சைகளும் வழங்​கும் வகையில் தமிழகத்​தில் புதிய முயற்​சியாக சென்னை கே.கே.நகரில் உள்ள அரசு மறுவாழ்வு மருத்​துவமனை வளாகத்​தில் ரூ.15 கோடி​யில் ஒப்பு​யர்வு மையம் அமைக்​கப்​பட்​டுள்​ளது.

இங்கு புற உலக சிந்​தனையற்​றோரை கண்டறிதல், மதிப்​பீடு செய்​தல், அவர்​களுக்கு சிறப்பு கல்வி வழங்​குதல், கேட்​டல், பேச்சு பயிற்சி, தொழில்​சார்ந்த பயிற்சி அளித்​தல், இயன்​முறை, செயல்​முறை, பகல்நேர பராமரிப்பு, உளவியல் போன்ற சேவைகள் அவர்​களுக்​கும், பெற்​றோருக்​கும் பல்துறை வல்லுநர்கள் மூலம் வழங்​கப்​படும். இந்த சேவை​களை​யும் முதல்வர் தொடங்கி வைத்​தார்.

சுகா​தாரத் துறை​யின்​கீழ் இயங்​கும் 35 ஆரம்​பநிலை இடையீட்டு மையங்களை மாற்றுத் திறனாளிகள் நலத் துறை​யின் தமிழ்​நாடு உரிமைகள் திட்டம் மூலம் வலுப்​படுத்தி, ‘விழுதுகள்’ ஒருங்​கிணைந்த சேவை மையங்​களாக முதல்வர் அறிவித்​தார்.

இந்த நிகழ்​வில் அமைச்​சர்கள் கீதாஜீவன், மா.சுப்​பிரமணி​யன், தலைமைச் செயலர் முரு​கானந்​தம், மாற்றுத்​ திறனாளி​கள் நலத்​துறை செயலர் சிஜி ​தாமஸ் ​வைத்​யன், ​மாநில ஆணை​யர் சுதன், ​மாற்றுத் ​திறனாளி​கள் நல இயக்​குநர் எம்​.லட்​சுமி உள்​ளிட்​டோர் பங்​கேற்​றனர். இவ்​வாறு அ​தில் கூறப்​பட்​டுள்​ளது.