ராமதாஸ் கருத்துக்கு தரக்குறைவாக பதில் அளிப்பதா? - முதல்வர் ஸ்டாலினுக்கு பாமக, பாஜக தலைவர்கள் கண்டனம்

சென்னை: அ​தானி ஊழலில் தமிழ்​நாடு மின்சார வாரி​யத்​தின் பெயரும் இடம் பெற்றிருப்பது குறித்து விசாரணை நடத்த வேண்​டும் என்று பாமக நிறு​வனர் ராமதாஸ் வலியுறுத்​தி​யிருந்​தார். இதுகுறித்து செய்தி​யாளர்கள் முதல்வர் ஸ்டா​லினிடம் கேள்வி எழுப்​பி​யிருந்​தனர்.

இதற்கு பதிலளித்த அவர், ராமதாஸுக்கு வேறு வேலை இல்லாத​தால் தினமும் அறிக்கை விட்டுக் கொண்​டிருக்​கிறார். அவருக்​கெல்​லாம் நான் பதில் சொல்லி கொண்​டிருக்க முடி​யாது என கூறி​யிருந்​தார். தற்போது இதற்கு பாமக, பாஜக கட்சிகளின் தலைவர்கள் கண்டனம் தெரி​வித்​துள்ளனர்.

பாமக தலைவர் அன்புமணி: மு.க.ஸ்​டா​லினுக்கு வேண்​டு​மானால் அதானிகளை ரகசி​யமாக சந்திப்பது போன்ற ஏராளமான வேலைகள் இருக்​கலாம். ஆனால், ராமதாஸுக்கு மக்கள் நலன் குறித்து சிந்​திப்​பதும், அரசின் குறைகளை சுட்​டிக் காட்டு​வதும்​தான் வேலை. ராம​தாஸ் செய்த பணிகளால் தான் தமிழகத்​தி​லும், தேசிய அளவிலும் 6 வகையான இட ஒதுக்​கீடுகள் வென்​றெடுக்​கப்​பட்டன. தமிழகத்​தில் 3,321 மதுக்​கடைகளும், தேசிய அளவில் 90 ஆயிரம் மதுக்​கடைகளும் மூடப்​பட்டன. அவர் கைகாட்​டிய​தால்​தான் கருணாநிதி உடலை மெரினா கடற்​கரை​யில் அடக்கம் செய்து நினை​விடம் கட்ட முடிந்​தது. தமிழகத்​துக்கு முதல்வர் மு.க.ஸ்​டா​லினால் விளைந்த ஒரு நன்மையை கூற முடி​யு​மா? பதவிக்​கேற்ற பக்கு​வத்​தை​யும், பணிவை​யும் முதல்வர் வளர்த்​துக் கொள்ள வேண்​டும். ராமதாஸ் குறித்து தெரி​வித்த கருத்​துக்காக பொது வெளி​யில் மன்னிப்பு கேட்க வேண்​டும். அதானி ஊழலில் மின்​வாரிய தொடர்பு குறித்து பணியில் உள்ள நீதிப​தியை கொண்டு விசா​ரிக்க முதல்வர் ஆணையிட வேண்​டும்.

பாஜக மாநில தலைவர் அண்ணாமலை: அதானி நிறு​வனத்​துடன் திமுக தொடர்பு குறித்து, தமிழகத்​தின் மூத்த அரசியல் தலைவரும் பாமக நிறு​வனருமான ராமதாஸ் கேள்வி எழுப்​பியதற்கு, தரக்​குறைவான முறை​யில் முதல்வர் ஸ்டா​லின் பதிலளித்​திருப்பது முற்றி​லும் கண்டிக்​கத்​தக்​கது. ராமதாஸ் கேட்​டிருக்​கும் கேள்​வி​யின் உண்மையை எதிர்​கொள்ள இயலாமல், இது போன்ற தரக்​குறைவான, முற்றி​லும் ஏற்கத் தகாத முறை​யில் பதிலளித்​திருப்​பது, முதல்​வரின் இயலாமை​யைத்​தான் காட்டு​கிறது. அவர் வகிக்​கும் முதல்வர் பதவிக்கு அது அழகல்ல.

தமிழக பாஜக முன்​னாள் தலைவர் தமிழிசை: நீங்கள் எதிர்க்​கட்​சித் தலைவராக இருக்​கும்​போது கூறிய கருத்​துகள் எல்லாம் மக்களுக்காக இல்லாமல் வேலை​யில்​லாமல் இருந்து கொண்டு சொன்ன கருத்​துகளா. ராமதாஸ் போன்ற அனுபவ​மிக்க தலைவர்​களின் கருத்தை வழி​காட்டு​தலாக எடுத்​துக் ​கொள்ள வேண்​டுமே தவிர, பழி சொல்​வதாக எடுத்​துக்​கொள்​ளக் கூடாது. இவ்​வாறு தெரி​வித்​துள்​ளனர்​.