விஜய்க்கு ‘ஷாக்’ கொடுத்த ரஜினி... புதுத் தெம்புடன் புறப்பட்ட சீமான்!

யாரும் எதிர்பாராத திருப்பமாக சீமான் - ரஜினி சந்திப்பு நிகழ்ந்திருப்பது தமிழக அரசியல் களத்தில் பேசுபொருளாகி இருக்கிறது. ரஜினி தனது அரசியல் பிரவேசத்தை அறிவித்த​போது, தீவிர எதிர்ப்​புக்​குரல் சீமானிட​மிருந்து வந்தது. ரஜினி அரசியல் பிரவேசத்​துக்கு முழுக்குப் போட்டதும், “ஆகச்​சிறந்த கலைஞர்” என்று பாராட்​டியதும் அதே சீமான் தான். ஆனால், நடிகர் ரஜினி அரசியலுக்கு வந்ததை எதிர்த்த சீமான், நடிகர் விஜய் அரசியல் பேசிய​போது, “என் தம்பி விஜய்” என வாஞ்சை​யா​னார்.

அதேசமயம், திராவிடமும் தமிழ் தேசியமும் ஒன்று தான் என சொன்னதால் தம்பி விஜய் மீது இப்போது ‘கொல வெறியில்’ இருக்​கிறார் சீமான். இப்படியான சூழலில் சூப்பர் ஸ்டார் ரஜினியை வீடு தேடிச் சென்று சந்தித்து பரபரப்பை கூட்டி​யிருக்​கிறார் சீமான். திரையுலகின் ‘சூப்பர் ஸ்டார்’ பட்டம் தொடங்கி, ஜெயிலர் பட விழாவில் ரஜினி சொன்ன, ‘காக்கா கழுகு’ கதை வரைக்கும் ரஜினி ரசிகர்​களுக்​கும், விஜய் ரசிகர்​களுக்கும் மோதல்கள் தொடர்​கின்றன. “விஜய் நான் பார்த்து வளர்ந்த பையன்.

அவரை எனக்கு போட்டி என நினைத்​தால், அது எனக்கு மரியாதையாக இருக்​காது” என்று ரஜினி சொன்ன பிறகும் மோதல் நிற்க​வில்லை. இந்த நிலையில், நம்பிக் கைவிட்ட தம்பி விஜய்க்கு, ரஜினி​யுடனான சந்திப்பு மூலம் ‘ஷாக்’ கொடுத்​துள்ளார் சீமான். இந்த சந்திப்பால் உற்சாகமடைந்​துள்ள ரஜினி ரசிகர்கள், ‘கழுகு - புலி’ படத்தைப் போட்டு சமுக வலைதளங்​களில் கொண்டாடித் தீர்த்து வருகின்​றனர். சீமானை சந்தித்​திருப்பதன் மூலம், விஜய்க்கு தனது ஆதரவு இல்லை என்று ரஜினி தங்களுக்கு சிக்னல் கொடுத்​திருப்​ப​தாகவே அவரது ரசிகர்கள் நம்பு​கின்​றனர்.

சொந்தக் கட்சி சலசலப்பு​களால் சற்றே துவண்​டிருந்த சீமானுக்கு, ரஜினி​யுடனான சந்திப்பு புதுத் தெம்பைக் கொடுத்​திருப்​ப​தாகச் சொல்கிறார்கள் நாதக தம்பிகள். இந்த சந்திப்பின் போது உடனிருந்த அரசியல் விமர்சகர் ரவீந்​திரன் துரைசாமி​யிடம் பேசினோம். “ரஜினி​காந்தை, நவம்பர் 8-ல் தனது பிறந்​த​நாளின் போது சந்தித்து ஆசி பெற சீமான் விரும்​பி​னார். இந்த தகவல் ரஜினிக்கு தெரிவிக்​கப்​பட்​ட​வுடன் அவர் உடனே சம்மதம் தெரிவித்​தார்.

ஆனால், அவர் படப்பிடிப்பில் இருந்​த​தா​லும், சீமான் தொடர் சுற்றுப்​பயணத்தில் இருந்​த​தாலும் அந்த சந்திப்பு 21-ம் தேதி மாலை ரஜினியின் இல்லத்தில் நடந்தது. சினிமா, அரசியல் உள்ளிட்ட பல்வேறு விஷயங்கள் தொடர்பாக இருவரும் இரண்டே கால் மணி நேரம் பேசினார். 6 மணிக்கு தொடங்கிய சந்திப்பு இரவு 8.30 மணியளவில் முடிவுக்கு வந்தது. ரஜினியும் சீமானுக்​குமான முதல் சந்திப்பு இது. மீண்டும் குடும்பத்​துடன் வந்து சந்திப்பதாக சீமான் தெரிவித்​துள்ளார்.

தனது கட்சியின் கொள்கைகள், திமுக, பாஜக செயல்​பாடுகள் குறித்து சீமான் ரஜினிக்கு விளக்கமாக விவரித்துச் சொன்னார். அதையெல்லாம் குறுக்கீடு செய்யாமல் கவனமாக கேட்டுக்​கொண்டார் ரஜினி. ‘அரசியல் ஆபத்தானது. நீங்கள் அரசியலுக்கு வராததால்தான் இப்போது நிம்ம​தியாக இருக்​கிறீர்கள்’ என்று சீமான் சொன்னதைக் கேட்டு ரஜினி புன்னகைத்​தார்.

இந்திய அளவில், 8 சதவீத வாக்குகளை தனித்து நின்று பெற்ற கட்சி நாதக மட்டுமே என்று சீமான் விவரித்​தார். அப்போது, ‘நான் ஒரு சாமானியனாக இருந்து, இந்த உயரத்தை அடைந்தது போல், நீங்களும் சமானியனாக இருந்து, எவ்வித பின்புலமும் இல்லாமல் இந்த உயரத்தை தொட்டுள்​ளீர்கள். நீங்கள் இன்னும் மேலே வருவீர்கள்’ என்று ரஜினி மனம் திறந்து பாராட்​டி​னார்” என்றார் ரவீந்​திரன் துரைசாமி.

ரஜினியை சந்தித்த பின் சீமான் புதுத்​தெம்​புடன் புறப்​பட்​டார். ஆ​னால் நேற்றைய கட்டுரை​யில் ​நாம் சொல்லி இருந்தது ​போலவே, சீ​மானின் நிம்​ம​தி​யைக் குலைக்​கும் ​விதமாக கோவை வடக்கு ​மாவட்ட ​நாதக-​வினர் அதன் செய​லா​ளர் ​ராமச்​சந்​திரன் தலைமையில் கூண்​டோடு ​நாதக-வுக்கு குட்பை சொல்​லி இருக்​கிறார்​கள்​!