மயூராவுக்கு எதிராக மல்யுத்தம்! - கலகலக்கும் கோவை மாநகர் மாவட்ட காங்கிரஸ்

கதரையும் கைகலப்பையும் என்றைக்குமே பிரிக்கமுடியாது என்பதை நீண்ட இடைவெளிக்குப் பிறகு கோவை காங்கிரஸார் பொதுவெளியில் மீண்டும் நிரூபித்திருக்கிறார்கள். கோவை காங்கிரஸானது கோவை மாநகர், கோவை வடக்கு, கோவை தெற்கு என மூன்று மாவட்​டங்களாக உள்ளது.

இதில், முக்கிய​மானது கோவை மாநகர் மாவட்டம். இதன் தலைவராக மயூரா எஸ்.ஜெயக்​குமார் இருந்​தார். ஆனால், மாநிலப் பொறுப்​பிலும் இருந்து கொண்டு மாவட்ட தலைவராகவும் இருக்​கலாமா என எதிர்க்​கோஷ்டி போர்க்கொடி தூக்கியது. இதனால் 2 ஆண்டு​களுக்கு முன்பு மாவட்ட தலைவர் பதவியை துறந்த மயூரா, தனது இடத்தில் தனக்கு அடக்கமான கருப்பு​சாமியை உட்கார​வைத்​தார். அத்துடன் மயூரா அகில இந்திய செயலா​ள​ராகவும் ஆனார்.

மாவட்ட தலைவர் பதவியைத் துறந்​தாலும் இன்றளவும் மாநகர் மாவட்ட காங்கிரஸின் லகான் மயூரா வசமே உள்ளதாகச் சொல்கிறார்கள். இதனால் இவருக்கும் ஐஎன்டி​யுசியைச் சேர்ந்த கோவை செல்வன் கோஷ்டிக்கும் எப்போதுமே ஏழாம் பொருத்தம். கோவை விமான நிலையத்தில் அதுதான் மோதலாக வெடித்​திருக்​கிறது.

இதுகுறித்து நம்மிடம் பேசிய மாநகர் காங்கிரஸ் நிர்வாகிகள், “கட்சியின் அகில இந்திய பொதுச்​செய​லாளர் வேணுகோபால் வயநாடு பிரச்​சா​ரத்தை முடித்து​விட்டு டெல்லி செல்வதற்காக கடந்த 17-ம் தேதி இரவு கோவை விமான நிலையத்​துக்கு வந்தார். அவரை வழியனுப்ப மயூரா ஜெயக்​குமார் தரப்பினரும், கோவை செல்வன் தரப்பினரும் விமான நிலையத்​துக்கு வந்தனர்.

அப்போது மயூராவின் செயல்​பாடுகள் குறித்து கே.சி.வேணுகோ​பாலிடம் எதிர் தரப்பினர் புகாரளித்​தனர். இதன் தொடர்ச்​சியாக விமான நிலைய வளாகத்​திலேயே மயூரா தரப்பினருக்​கும், கோவை செல்வன் தரப்பினருக்கும் இடையே மோதல் ஏற்பட்டது. அப்போது ஆபாசமான வார்த்​தைகளால் திட்டிக் கொண்டனர்.

மூன்றரை ஆண்டுகள் மாவட்ட தலைவர் பொறுப்பில் இருந்த மயூரா கட்சி வளர்ச்​சிக்காக எதுவும் செய்ய​வில்லை. தொடர்ச்சியாக மூன்று சட்டமன்றத் தேர்தல்​களில் போட்டியிட தலைமை இவருக்கு வாய்ப்​பளித்தும் இவரால் ஜெயிக்க முடிய​வில்லை. இருந்த போதும் மேலிடத்தில் லாபி செய்து பதவிகளைப் பெற்று​விடும் இவர், இங்குள்ள யாரையும் மதிப்​ப​தில்லை.

கோவையில் மாநில நிர்வாகிகள் 10 பேர் இருக்​கிறார்கள். அதில் 9 பேர் இவருக்கு எதிராக இருக்​கிறார்கள். மாநகர் காங்கிரஸை இவரது பிடியி​லிருந்து மீட்க இவரை கட்சிப் பொறுப்​பிலிருந்து நீக்க வலியுறுத்தி தீர்மானமே நிறைவேற்றி இருக்​கிறார்கள்” என்றனர்.

இதுகுறித்து நம்மிடம் பேசிய கோவை செல்வன், “விமான நிலையத்தில் மயூரா ஜெயக்​குமார் எங்களிடம் தகராறில் ஈடுபட்டு கொலை மிரட்டல் விடுத்​தார். இதுகுறித்து கட்சி தலைமைக்கு தகவல் தெரிவித்து​விட்டு போலீஸிலும் புகார் அளித்​துள்ளோம்” என்றார். மயூரா ஜெயக்​கு​மாரோ, “என் மீதுள்ள காழ்ப்பு​ணர்ச்​சி​யாலும், தலைமைக்கு என் மீது உள்ள நம்பிக்கையை கெடுக்கும் வகையிலும் எதிர் தரப்பினர் வேண்டு​மென்றே தொடர்ந்து என்னை வம்புக்கு இழுக்​கின்​றனர்.

எனது பதவிக்​காலத்தில் கட்சியை வளர்க்க நான் அரும்​பாடு​பட்​டுள்​ளேன். கட்சி அறிவித்த அனைத்து போராட்​டங்​களையும் முன்னின்று நடத்தி​யுள்​ளேன். மாவட்ட தலைவராக நியமிக்​கப்​பட்​டுள்ள கருப்பு​சாமியும் கட்சியில் சீனியர் தான். அவரும் இந்தக் கட்சிக்காக பாடுபட்​டுள்​ளார். எதிர் தரப்பினரின் செயல்பாடு குறித்து கட்சி தலைமை​யிடம் நாங்களும் புகாரளித்​துள்ளோம்” என்றார். இவர்களை எல்லாம் வைத்துக்​கொண்டு தான் காங்கிரஸ் தலைவர்கள் காம​ராஜர் ஆட்சியை அமைப்போம் என்கிறார்கள்!