மாசிலா - விஜயா அறக்கட்டளை சார்பில் 5 ஆளுமைகளுக்கு ஜனநாயக பாதுகாவலர்கள் விருது

சென்னை: மாசிலா- விஜயா அறக்​கட்டளை சார்​பில் முன்​னாள் நீதிபதி கே.சந்​துரு, முன்​னாள் ஐஏஎஸ் அதிகாரி உ.சகாயம் உள்ளிட்ட 5 ஆளுமை​களுக்கு ஜனநாயக பாது​காவலர்கள் விருதை விஞ்​ஞானி மயில்​சாமி அண்ணாதுரை சென்னை​யில் நேற்று வழங்​கினார். மாசிலா- விஜயா அறக்​கட்டளை சார்​பில் ஜனநாயக பாது​காவலர்கள் விருது-2024 வழங்​கும் விழா சென்னை எழும்​பூரில் உள்ள அரசு அருங்​காட்சிய அரங்​கில் நேற்று நடைபெற்​றது.

இதில் விஞ்​ஞானி மயில்​சாமி அண்ணாதுரை பங்கேற்று முன்​னாள் நீ​தி​மன்ற நீதிபதி சந்துரு, முன்​னாள் ஐஏஎஸ் அதிகாரி சகா​யம், முன்னாள் எம்எல்ஏ பாலபாரதி, இந்து என்.ராம், கலை, இலக்கிய விமர்​சகர் இந்திரன் ஆகியோ​ருக்கு விருது வழங்கி கவுர​வித்​தார்.

நிகழ்ச்​சி​யில் அவர் பேசி​ய​து: இந்த ஆண்டு ஜனநாயகத்​தின் 4 தூண்​களான, சட்டப்​பேரவை, அரசு நிர்​வாகம், நீதித்​துறை, பத்திரிகை துறை ஆகிய​வற்றை சேர்ந்த ஆளுமை​களுக்கு விருது வழங்​கப்​பட்​டுள்​ளது. மேலும் ஜனநாயகத்​தின் 5-வது தூணாக இலக்கிய துறையை சேர்ந்​தவருக்​கும் விருது வழங்​கப்​பட்​டுள்​ளது.

இன்று அறிவியல் தமிழ் வளர்ந்து வருகிறது. இதை பண்டைய இலக்​கி​யங்​களில் படிக்க முடி​யாது. இப்போது எழுதப்பட்டுள்ளவற்றில் தான் படிக்க முடி​யும். இதை உணர்ந்து இலக்​கியம் சார்ந்த நபருக்​கும் விருது வழங்​கப்​பட்​டிருப்பது பாராட்டுக்​குரியது. இவ்வாறு அவர் கூறினார்.

நீதிபதி சந்துரு பேசும்​போது, “ஜனநாயகத்தை மையப்​படுத்தி விருது வழங்​கு​வதும், எனக்கு விருது வழங்கி​யிருப்பதும் பெரு​மைக்​குரியதாக உள்ளது” என்றார். பாலபாரதி பேசும்​போது, ``குடும்பத்​தில் ஜனநாயகம் இருக்க வேண்​டும். அதை உணர்ந்து தான் ஒரு குடும்பம் ஜனநாயக பாது​காவலர் விருதை வழங்கி​யிருக்​கிறது” என்றார்.

சகாயம் பேசும்​போது, “நமக்கு பல வாய்ப்புகளை தந்த, இந்த ஜனநாயகத்​துக்கு ஏதாவது செய்ய வேண்​டும் என்று இந்த குடும்பம் விருது வழங்கி வருவது பாராட்டுக்​குரியது. எனக்கு கொடுக்​கப்​பட்ட விருது தொகையை, நான் நடத்தி வரும் ஆதரவற்​றோர் இல்லத்​துக்கு வழங்​கு​கிறேன்” என்றார்.

என்.ராம் பேசும்​போது, “ஜனநாயகத்​தின் பெயரில் இக்குடும்பத்​தின் விருது வழங்​கும் பணி தொடர வேண்​டும்” என்றார். இந்திரன் பேசும்​போது, ஆய்வகத்​துக்​குள் முடங்கி கிடக்​கும் விஞ்​ஞானி ஜனநாயகம் குறித்து கவலைப்பட தொடங்கி​விட்​டார்.

தமிழுக்கு நல்ல​காலம் தொடங்கி​விட்​டது” என்றார். இந்நிகழ்ச்​சி​யில் சென்னை அறிவியல் கழக தலைவர் ஜெ.கு​மார், மாசிலா- விஜயா அறக்​கட்டளை தலைவரும், லேசர் இயற்​பியல் விஞ்​ஞானி​யுமான ​மாசிலாமணி, அவரது மனைவி ​விஜயா, மகன்​கள் ​திருஞானசம்​மந்​தன் (அறக்​கட்டளை அறங்​காவலர்), இளங்கோ, பாரதி உள்​ளிட்​டோர் பங்கேற்றனர்​.