பிரதமர் நரேந்திர மோடியின் 74-வது பிறந்தநாள்: ஆளுநர், முதல்வர், அரசியல் தலைவர்கள் வாழ்த்து

சென்னை: பிரதமர் மோடியின் 74-வது பிறந்தநாளையொட்டி, ஆளுநர், முதல்வர் உட்பட பல்வேறு அரசியல் கட்சி தலைவர்கள் வாழ்த்து தெரிவித்துள்ளனர். இதுதொடர்பாக அவர்கள் வெளியிட்ட வாழ்த்து செய்தி:

ஆளுநர் ஆர்.என்.ரவி: பிரதமர் மோடியின் பிறந்தநாளில், அவர் நீண்ட ஆயுளுடனும், ஆரோக்கியத்துடனும் வாழ வாழ்த்துகிறேன். அவரது புரட்சிகரமான தலைமையின் கீழ், தேசம் 2047-ம் ஆண்டுக்குள் வளர்ச்சியடைந்த பாரதம் என்ற இலக்கை நோக்கி தன்னம்பிக்கையுடன் முன்னேறி வருகிறது. தமிழ் மொழி மற்றும் தமிழ் கலாச்சாரம் மீது அவர் வைத்திருக்கும் அன்பு மற்றும் தேசத்துக்கான அவரது தொலைநோக்கு தலைமை என்றும் தொடர பிரார்த்திக்கிறேன்.

முதல்வர் மு.க.ஸ்டாலின்: பிரதமர் நரேந்திர மோடிக்கு இனிய பிறந்தநாள் வாழ்த்துகள். அவர் நீண்டகாலம் நிலைத்த உடல் நலத்துடன் திகழ்ந்திட விழைகிறேன்.

அதிமுக பொதுச்செயலாளர் பழனிசாமி: பிரதமர் நரேந்திர மோடிக்கு மனமார்ந்த பிறந்தநாள் வாழ்த்துகள். அவர் தொடர்ந்து பொது சேவையில் நீண்ட ஆரோக்கியத்துடன் வாழ வாழ்த்துகளை தெரிவித்துக் கொள்கிறேன்.

மத்திய இணையமைச்சர் எல்.முருகன்: கல்வியறிவு, தொழில்நுட்பம், விவசாயம், தொழில்வளம் என ஒவ்வொரு துறையிலும் தனி கவனம் செலுத்தி, உலகின் சக்திவாய்ந்த தேசமாக இந்தியாவை கட்டமைக்க முழு பங்களிப்பை நல்கி வரும் பிரதமர் மோடிக்கு பிறந்தநாள் நல்வாழ்த்து.

முன்னாள் ஆளுநர் தமிழிசை சவுந்தரராஜன்: மூன்றாவது முறையாக வலிமையான பிரதமராக நம் நாட்டுக்கு வலிமை கூட்டி, உலகுக்கு வழிகாட்டி, வலம் வந்து கொண்டிருக்கும் பிரதமர் மோடிக்கு இனிய பிறந்தநாள் நல்வாழ்த்து.

தமிழக பாஜக தலைவர் அண்ணாமலை: பிரதமர் நரேந்திர மோடிக்கு, தமிழக பாஜக சார்பில் மனமார்ந்த பிறந்தநாள் வாழ்த்துகளை தெரிவித்துக் கொள்கிறேன்.

பாமக நிறுவனர் ராமதாஸ்: பிரதமர் மோடியின் 74-வது பிறந்தநாளில் அவருக்கு உளமார்ந்த வாழ்த்துகளை தெரிவித்துக் கொள்கிறேன். அவர் அனைத்து நலன்களுடன் நீண்ட காலம் மகிழ்ச்சியுடன் வாழ்ந்து, நாட்டை வழிநடத்த வேண்டும்.

நடிகர் ரஜினிகாந்த்: பிரதமர் மோடிக்கு பிறந்தநாள் நல்வாழ்த்துகள். அவர் எப்போதும் நல்ல ஆரோக்கியத்துடனும், மகிழ்ச்சியுடனும் இருக்க இறைவனைப் பிரார்த்திக்கிறேன்.

மநீம தலைவர் கமல்ஹாசன்: பிரதமர் மோடிக்கு மனமார்ந்த பிறந்தநாள் வாழ்த்துகள். அவர் நீண்ட ஆயுளுடனும், ஆரோக்கியத்துடனும் இருக்க வாழ்த்துகிறேன்.

தவெக தலைவர் விஜய்: பிரதமர் மோடிக்கு என்னுடைய இதயப்பூர்வமான பிறந்தநாள் நல்வாழ்த்துகளை தெரிவித்துக் கொள்கிறேன். நீண்ட ஆயுள், மகிழ்ச்சி, நல்ல ஆரோக்கியம் எப்போதும் அவருக்கு கிடைக்க பிரார்த்திக்கிறேன்.

பாமக தலைவர் அன்புமணி: பிரதமர் மோடிக்கு உளமார்ந்த பிறந்தநாள் வாழ்த்துகள். 3-வது முறையாக இந்திய பிரதமராக பொறுப்பேற்றுள்ள அவர் இன்னும் பல ஆண்டுகளுக்கு நல்ல உடல் நலத்துடன் பொதுவாழ்க்கையில் வெற்றி பெறவும், நாட்டுக்கு சேவையாற்றவும் வாழ்த்துகிறேன்.

அமமுக பொதுச்செயலாளர் டிடிவி தினகரன்: பிரதமர் மோடி சிறந்த ஆரோக்கியம், நல்வாழ்வு மற்றும் நீண்ட ஆயுளுடன் நமது தேசத்துக்கு தொடர்ந்து சேவை செய்ய இறைவன் அருள்புரிய பிரார்த்திக்கிறேன். இந்நாள் அவரது புகழ்பெற்ற பயணத்தில் மற்றொரு குறிப்பிடத்தக்க ஆண்டின் தொடக்கத்தை குறிக்கட்டும்.