சென்னை: தமிழகத்தில் இன்று (ஆக. 23) முதல் 6 நாட்களுக்கு ஓரிரு இடங்களில் மிதமான மழை பெய்ய வாய்ப்புள்ளதாக வானிலை ஆய்வுமையம் தெரிவித்துள்ளது. இது தொடர்பாக சென்னை வானிலை ஆய்வு மையம் வெளியிட்ட செய்திக்குறிப்பு:
தமிழகம் நோக்கி வீசும் மேற்குதிசைக் காற்றில் நிலவும் வேக மாறுபாடு காரணமாக இன்று முதல் 6 நாட்களுக்கு ஓரிரு இடங்களில் இடி, மின்னலுடன் கூடிய, லேசானது முதல் மிதமான மழை பெய்யக்கூடும்.
தமிழகத்தில் ஆக. 22-ம் தேதி (நேற்று) காலை 8.30 மணியுடன் நிறைவடைந்த 24 மணி நேரத்தில் பதிவான மழை அளவுகளின்படி அதிகபட்சமாக சேலம் மாவட்டம் ஏற்காட்டில் 7 செ.மீ., நீலகிரி மாவட்டம் விண்ட்வொர்த் எஸ்டேட்டில் 6 செ.மீ., பந்தலூரில் 5 செ.மீ.,மயிலாடுதுறை மாவட்டம் தரங்கம்பாடியில் 4 செ.மீ., திருநெல்வேலி மாவட்டம் நாலுமுக்கு, நீலகிரி மாவட்டம் கின்னக்கோரை, தேவாலா, கோவை மாவட்டம் சோலையாறில் தலா 3 செ.மீ., அரியலூர் மாவட்டம் செந்துறை, நீலகிரி மாவட்டம் மேல்பவானி, பில்லிமலை எஸ்டேட், திருநெல்வேலி மாவட்டம் ஊத்து, காக்காச்சி,கடலூர் மாவட்டம் காட்டுமன்னார்கோவில் ஆகிய இடங்களில் 2 செ.மீ. மழை பதிவாகியுள்ளது.
மன்னார் வளைகுடா, தென் தமிழக கடலோரப் பகுதிகளில் இன்று முதல் வரும் 26-ம் தேதி வரை மணிக்கு 35 முதல் 45 கி.மீ. வேகத்திலும், இடையிடையே 55 கி.மீ. வேகத்திலும் சூறாவளிக் காற்று வீசக்கூடும். எனவே, இப்பகுதிகளுக்கு மீனவர்கள் செல்ல வேண்டாம் என அறிவுறுத்தப்படுகிறார்கள். இவ்வாறு செய்திக்குறிப்பில் தெரிவிக்கப்பட்டுள்ளது.