திருப்பூர் டாப், 397 அரசுப் பள்ளிகள் 100% தேர்ச்சி - பிளஸ் 2 முடிவுகள் ஹைலைட்ஸ்

சென்னை: தமிழகத்தில் பிளஸ் 2 பொதுத் தேர்வு முடிவுகள் இன்று (மே 6) காலை வெளியிடப்பட்டது. அதன்படி, மொத்தம் 94.56% பேர் தேர்ச்சி பெற்றுள்ளனர். கடந்த 2023-ஆம் ஆண்டு 94.03% விகிதம் தேர்ச்சி பதிவாகியிருந்த நிலையில், இந்த ஆண்டு மொத்த தேர்ச்சி விகிதம் சற்றே உயர்ந்துள்ளது. பிளஸ் 2 முடிவுகளின் முக்கிய அம்சங்கள்:

> பிளஸ் 2 பொதுத் தேர்வில் மாணவிகள் 96.44%, மாணவர்கள் 92.37% தேர்ச்சி பெற்றுள்ளனர். வழக்கம்போல் மாணவர்களைவிட மாணவிகள் தேர்ச்சி விகிதம் அதிகம். பிளஸ் 2 பொதுத் தேர்வை எழுதிய மூன்றாம் பாலினத்தவர் ஒருவர் வெற்றி பெற்றுள்ளார்.

* தேர்வெழுதிய மாற்றுத் திறனாளி மாணவர்களின் எண்ணிக்கை 5603. தேர்ச்சி அடைந்தோர் எண்ணிக்கை 5161. (92.11%)
* தேர்வெழுதிய சிறைவாசிகளின் மொத்த எண்ணிக்கை 125. தேர்ச்சி அடைந்தோர் எண்ணிக்கை 115 (92%)
* இந்தத் தேர்வில் 397 அரசுப் பள்ளிகள் முழு தேர்ச்சி விகிதம் பெற்றுள்ளன என்பது குறிப்பிடத்தக்கது.

திருப்பூர் முதலிடம் பிடித்து சாதனை: பிளஸ் 2 தேர்வு முடிவுகள் வெளியாகியுள்ள நிலையில், 97.45 தேர்ச்சி சதவீதத்துடன் மாநிலத்திலேயே முதலிடம் பிடித்து திருப்பூர் சாதனை படைத்துள்ளது. மேலும், அரசுப் பள்ளி அளவிலும் திருப்பூர் மாவட்டமே தேர்ச்சியில் முதலிடம் பெற்றுள்ளது. இதன் சதவீதம் 97.45 ஆகும். கடந்த ஆண்டு 2-து இடம் பிடித்திருந்தாலும், அதற்கு முன்னதாக 2019, 2020-ம் ஆண்டுகளில் முதலிடம் பிடித்து சாதனை படைத்தது. நடப்பு ஆண்டும் முதல் இடம் பிடித்ததால் 3 முறை முதலிடம் பிடித்த மாவட்டம் என்ற பெருமையை திருப்பூர் மாவட்டம் பெற்றுள்ளது.

சாதனை படைத்த மாணவர்களை திருப்பூர் மாவட்ட கலெக்டர் கிறிஸ்துராஜ் மற்றும் கல்வி அதிகாரி கீதா மற்றும் ஆசிரியர்கள் பலரும் பாராட்டினர். இதுபோல் அரசுப் பள்ளி அளவிலும் 95.75 சதவீதம் பெற்று திருப்பூர் மாவட்டம் முதலிடத்தை பிடித்துள்ளது. திருப்பூர் மாவட்டத்தில் 77 அரசு பள்ளிகள் உள்ள நிலையில், 4,548 மாணவர்கள், மாணவிகள் 5,935 மாணவிகள் என மொத்தம் 10 ஆயிரத்து 383 பேர் தேர்வு எழுதினர். இதில் மாணவர்கள் 4,274 பேர், மாணவிகள் 5, 763 பேர் என மொத்தம் 10,037 பேர் தேர்ச்சி அடைந்துள்ளனர்.

மதுரை மத்திய சிறை: மதுரை மத்திய சிறையில் 1400-க்கும் மேற்பட்ட விசாரணை மற்றும் தண்டனை சிறைவாசிகள் இருக்கின்றனர். இந்நிலையில் இந்த ஆண்டிற்கான 12ம் வகுப்பு பொதுத் தேர்வினை மதுரை மத்திய சிறையில் உள்ள 15 தண்டனை சிறைவாசிகள் எழுதினர். இதில் 15 பேரும் தேர்ச்சி அடைந்த நிலையில், 12ம் வகுப்பு பொதுத்தேர்வில் மதுரை மத்திய சிறையில் 100% தேர்ச்சி அடைந்துள்ளனர். நூறு சதவீதம் தேர்ச்சி அடைந்ததை முன்னிட்டு தேர்ச்சி பெற்றவர்களுக்கு சிறைத் துறை அதிகாரிகள் வாழ்த்து தெரிவித்தனர். இதில் சிறைவாசி ஆரோக்கிய ஜெய பிரபாகரன் என்பவர் 536 மதிப்பெண்கள் எடுத்து முதலிடத்தையும், சிறைவாசியான அலெக்ஸ் பாண்டியன் என்பவர் 532 மதிப்பெண்கள் எடுத்து இரண்டாம் இடத்தையும், அருண்குமார் என்பவர் 506 மதிப்பெண்கள் எடுத்து மூன்றாம் இடத்தையும் பிடித்துள்ளார்.

பள்ளிகள் வாரியாக தேர்ச்சி விகிதம்:

• அரசுப் பள்ளிகள் - 91.02%
• அரசு உதவி பெறும் பள்ளிகள் - 95.49%
• தனியார் சுயநிதிப் பள்ளிகள் - 98.70%
• மகளிர் பள்ளிகள்- 96.39%
• ஆண்கள் பள்ளிகள் - 88.98%
• இருபாலர் பள்ளிகள் - 94.78%

பாடப்பிரிவுகள் வாரியாக தேர்ச்சி விகிதம்

• அறிவியல் பாடப்பிரிவுகள் - 96.35%
• வணிகவியல் பாடப்பிரிவுகள் - 92.46%
• கலைப் பிரிவுகள் - 85.67%
• தொழிற்பாடப் பிரிவுகள் - 85.85%

முக்கிய பாடங்களில் தேர்ச்சி

• இயற்பியல் - 98.48%
• வேதியியல் - 99.14%
• உயிரியல் - 99.35%
• தாவரவியல் - 98.86%
• விலங்கியல்- 99.04%
• கணினி அறிவியல் - 99.80%
• வணிகவியல் - 97.77%

பாடவாரியாக சதம் அடித்த மாணவர்கள்!

• தமிழ் - 35
• ஆங்கிலம் - 07
• இயற்பியல் - 633
• வேதியியல் - 471
• உயிரியல் - 652
• கணிதம் - 2,587
• தாவிரவியல் - 90
• விலங்கியல் - 382
• கணினி அறிவியல் - 6996
• வணிகவியல் - 6142
• கணக்குப் பதிவியல் - 1647
• பொருளியல் - 3299
• கணினிப் பயன்பாடுகள் - 2251
• வணிக கணிதம் மற்றும் புள்ளியியல் - 210

மாவட்ட வாரியாக +2 பொதுத் தேர்வு தேர்ச்சி விகிதம்:

• திருப்பூர்: 97.54
• ஈரோடு- 97.42
• சிவகங்கை - 97.42
• அரியலூர் - 97.25
• கோவை - 96.97
• விருதுநகர் - 96.64
• பெரம்பலூர் - 96.44
• திருநெல்வேலி - 96.44
• தூத்துக்குடி - 96.39
• நாமக்கல் - 96.10
• தென்காசி - 96.07
• கரூர் - 95.90
• திருச்சி - 95.74
• கன்னியாகுமரி - 95.72
• திண்டுக்கல் - 95.40
• மதுரை - 95.19
• ராமநாதபுரம் - 94.89
• செங்கல்பட்டு - 94.71
• தேனி - 94.65
• சேலம் -94.60
• சென்னை - 94.48
• ஊட்டி - 94.27
• கடலூர் - 94.36
• புதுக்கோட்டை - 93.79
• தருமபுரி - 93.55
• தஞ்சாவூர்- 93.46
• விழுப்புரம்- 93.17
• திருவாரூர் -93.08
• கள்ளக்குறிச்சி - 92.91
• வேலூர்- 92.53
• மயிலாடுதுறை - 92.38
• திருப்பத்தூர் - 92.34
• காஞ்சிபுரம் - 92.23
• ராணிப்பேட்டை - 92.28
• கிருஷ்ணகிரி - 91.87
• திருவள்ளூர் - 91.32
• நாகை - 91.19
• திருவண்ணாமலை - 90.47
• காரைக்கால் - 87.03
• புதுச்சேரி - 93.38

தமிழக பள்ளிக் கல்வியில் பிளஸ் 2 பொதுத்தேர்வு கடந்த மார்ச் 1 முதல் 22-ம் தேதி வரை நடைபெற்றது. இந்தத் தேர்வை சுமார் 7.8 லட்சம் மாணவ, மாணவிகள் எழுதினர். இதையடுத்து மாணவர்களின் விடைத்தாள்களை திருத்தும் பணி, மாநிலம் முழுவதும் 83 மையங்களில் ஏப்.1-ல் தொடங்கி 13-ம் தேதியுடன் நிறைவு பெற்றது. தொடர்ந்து இணையதளத்தில் மதிப்பெண் பதிவேற்றம் உட்பட இதர பணிகளும் நிறைவு பெற்றன.

இந்நிலையில், தமிழகத்தில் பிளஸ் 2 பொதுத் தேர்வு முடிவுகள் ஏற்கெனவே அறிவிக்கப்பட்டபடி இன்று (மே 6) காலை 9.30 மணிக்கு வெளியிடப்பட்டது. அரசுத் தேர்வுகள் இயக்ககத்தில் அதன் இயக்குநர் சேதுராம வர்மா தேர்வு முடிவுகளை வெளியிட்டார். அதன்படி, மொத்தம் 94.56% பேர் தேர்ச்சி பெற்றுள்ளனர். கடந்த 2023 ஆம் ஆண்டு 94.03% விகிதம் தேர்ச்சி பதிவாகியிருந்த நிலையில் இந்த ஆண்டு மொத்த தேர்ச்சி விகிதம் சற்றே அதிகரித்துள்ளது.

தமிழகம் முழுவதும் அரசு கலை அறிவியல் கல்லூரிகளில் சேர இன்று முதல் இணையதளம் வழியாக விண்ணப்பிக்கலாம். இதேபோல், பொறியியல் மாணவர் சேர்க்கை்கான ஆன்லைன் பதிவும் இன்று தொடங்குகிறது.

முதல்வர் ஸ்டாலின் வாழ்த்து: “பள்ளிக் கல்வியை நிறைவுசெய்து, கல்லூரி வாழ்வுக்குச் செல்லும் மாணவர்கள் அனைவருக்கும் வாழ்த்துகள்! உயர்கல்வியில் சிறந்து விளங்கி, தலைசிறந்த பொறுப்புகளில் நீங்கள் மிளிர வேண்டும். இம்முறை குறைவான மதிப்பெண் பெற்றவர்கள் மனம் தளர வேண்டாம். அடுத்து காத்திருக்கும் வாய்ப்புகள் உங்கள் முன்னேற்றத்துக்கான துணையாக அமையும் என்ற நம்பிக்கையுடன் முன்னே செல்லுங்கள்!” என்று முதல்வர் ஸ்டாலின் பதிவிட்டுள்ளார்.

புதுச்சேரி: பிளஸ் 2 தேர்வில் புதுச்சேரி, காரைக்காலில் 92.41 சதவீதம் தேர்ச்சி பெற்றுள்ளனர். இது கடந்தாண்டை விட 0.26 சதவீதம் குறைவு. மேலும், 55 அரசு பள்ளிகளில் ஒரெயொரு பள்ளி மட்டுமே நூறு சதவீத தேர்ச்சி பெற்றுள்ளது. இந்நிலையில், புதுச்சேரியில் வரும் கல்வியாண்டில் அரசு பள்ளிகளில் 12-ம் வகுப்புகளில் சிபிஎஸ்இ பாடத்திட்டம் அறிமுகமாகிறது என்பது குறிப்பிடத்தக்கது.