சென்னை: இயற்கை விவசாயத்தை சிறப்பாக மேற்கொண்ட தஞ்சாவூர், திருப்பூர், காஞ்சிபுரத்தைச் சேர்ந்த 3 விவசாயிகளுக்கு ‘நம்மாழ்வார்’ விருதுகளை முதல்வர் ஸ்டாலின் வழங்கினார்.
இதுகுறித்து தமிழக அரசு வெளியிட்ட செய்திக்குறிப்பில் கூறியிருப்பதாவது: உயிர்ம வேளாண்மையில் (ஆர்கானிக்/ இயற்கை விவசாயம்) நம்மாழ்வார் ஆற்றிய பெரும் பங்களிப்பை அங்கீகரிக்கும் வகையில், உயிர்ம வேளாண்மையில் ஈடுபடுவதோடு, அதை ஊக்குவித்து பிற உயிர்ம விவசாயிகளுக்கும் கைகொடுக்கும் விவசாயிகளுக்கு தமிழக அரசால் ‘நம்மாழ்வார்’ பெயரில் விருது வழங்கப்படும் என்று தமிழக வேளாண் துறையின் 2023-24 ஆண்டுக்கான பட்ஜெட்டில் அறிவிக்கப்பட்டது.
அதன்படி, உயிர்ம வேளாண்மையில் சிறந்து விளங்கும் விவசாயிகளான தஞ்சாவூர் மாவட்டத்தை சேர்ந்த கோ.சித்தருக்கு முதல் பரிசாக ரூ.2.50 லட்சம் பரிசு தொகை, ரூ.10 ஆயிரம் மதிப்புள்ள பதக்கம், திருப்பூர் மாவட்டத்தை சேர்ந்த கே.வி.பழனிச்சாமிக்கு 2-ம் பரிசாக ரூ.1.50 லட்சம் பரிசு தொகை, ரூ.7 ஆயிரம் மதிப்புள்ள பதக்கம், காஞ்சிபுரத்தை சேர்ந்த கு.எழிலனுக்கு 3-ம் பரிசாக ரூ.1 லட்சம் பரிசு தொகை, ரூ.5 ஆயிரம் மதிப்புள்ள பதக்கம் ஆகியவற்றை முதல்வர் ஸ்டாலின் வழங்கினார்.
சென்னை தலைமைச் செயலகத்தில் கடந்த 27-ம் தேதி நடந்த இந்த நிகழ்ச்சியில், அமைச்சர்கள் எம்ஆர்கே பன்னீர்செல்வம், அர.சக்கரபாணி, ஆர்.காந்தி, தலைமைச் செயலர் சிவ்தாஸ் மீனா, வேளாண்துறை செயலர் அபூர்வா, வேளாண் வணிக ஆணையர் கோ.பிரகாஷ், தோட்டக்கலை, மலைப்பயிர்கள் துறை இயக்குநர் பி.குமாரவேல்பாண்டியன்,வேளாண்மை துறை இயக்குநர் பி.முருகேஷ் உள்ளிட்டோர் பங்கேற்றனர்.